O le toe amata ai o le taamilosaga lakapi o lenei tausaga ua maitauina ai le ofo atu o le lagolago a nisi o kamupani mo aulakapi a nisi o afioaga i Iuni taitasi i totonu o le tatou atunuu.
O le au tele o le Senior A a Levi i Saleimoa ua faapaiaina le latou togiga fou e pei ona agalelei atu i ai le kamupani a le Biogene3.
O lea fesoasoani na talia aloaia e le susuga i le faafeagaiga ia Rev. Isaako Viki, faatasi ai ma le susuga i le Taitaifono o le Iuni Lakapi a Tuamasaga le susuga ia Tuisa Tasi Patea, o le Tofi Faipule o lea Itumalo, faatasi ai ma le mamalu o le Kalapu Lakapi a Levi Saleimoa.
O le sauniga e faapaia ai le togiga fou na taitaia e le susuga ia Rev. Isaako Viki le faafeagaiga o le Ekalesia Faapotopotoga Kerisiano Samoa i Levi Saleimoa lava, ma na auai uma sui o le kalapu i le tauaaoina o lea foai.
T a‘ua e le afioga i le Teutupe o le Kalapu le susuga ia Taupaū Maturo Paniani, o lea foai mai le Biogene3 e tusa ma le $3,840.00 lona tau aofai, ma na faatupe uma lava e le kamupani o le Biogene3. O le Biogene3 o se tasi lea o kamupani o loo latou suesuea le faaaogaina o vao ma laau ina ia maua ai le eletise. O loo maua ai foi galuega a nisi o sui o lea lava itumalo i le auauanga a lea kamupani fou.
O le Iuni a Tuamasaga o se tasi lea o Iuni ua leva i totonu o le atunuu, ma o loo aofia ai au mai Tufulele, Nono‘a, Salepoua‘e, Utualii, Lotoso‘a, Leauvaa, Faleula ma Levi Saleimoa.
Na ta‘ua e le sui o le Kalapu a Levi Saleimoa o Taupaū Maturo Paniani, ua fai si tuai o le togiga a le au sa iai, e pei o le mafuaaga lena o le sailia o se togiga fou mo le au, ma ua tatau foi i le au ona siitia le taaalo ona o lea ua fou le togiga.
E masani lava o kamupani o loo ofoina atu a latou lagolago i soo se ituaiga taaloga lava, ina ia mafai ona faalauiloa atu le kamupani, e ala lea i le lelei o le taaalo a se au, ma faapena foi ona siitia le tomai o tama taaalo e faatino ai le taaloga ma maua ai le avanoa e latou te se‘ia ai le talita o le Iuni a lea foi faaitu o le atunuu.
Tele nisi o tama sa filifilia ma taaalo i le Manu Samoa i tausaga ua tuanai, sa faapea ona atia‘e mai o latou tomai i le taaloga o le lakapi mai lea Iuni, e pei o Pati Maligi, Suliveta Lilomaiava, Lolani Koko, Vaiula Matai‘a, Mefi Luatua, Semi Epati, Jerry Meafou, Isaia Toeava, Laki Mulipola, Fuauli Mavaega, Koneferenisi Uili faatasi ai ma le aumatutua e pei ona iai i le Golden Oldies e pei o Patea Satini Epati ma Sapa‘u Lolesio.
Peitai ua fai si umi e le o toe filifilia mai se sui taalo mai lea Iuni ma e talosia ia avea le maua ai o le togiga fou a Levi Saleimoa, o le a mafai ai ona fili mai nisi tama taaalo mo le taitoa 7 ma le au tele a le atunuu.
