Agalelei i tina o loo leiloloa o la taitoalua i le vasa

O le agalelei o se vaega o tina mai isi atunuu i fafo o loo aumau ma o latou aiga i Samoa ona o galuega, ua latou faia ai se fesoasoani e agalelei ai i tina e toalua o Olataga Key ma Faapea Sione, lea na leiloloa i se vaafagota i le taimi o le afa o Eveni ia Tesema o le tausaga ua mavae o la taitoalua.

E oo mai i le taimi nei e lei maua lava se faamatalaga i taitoalua o ia tina pe o soifua pea pe ua maliliu.

E lei atoa le 12 masina ona faatoa faia lea o se faasilasilaga mai leoleo i lea tulaga e iloa ai pe ua maliliu poo soifua pea. O le vaiaso na tea nei na tauaao ai e Olataga ma Faapea ni teutusi ua iai ni siakitupe e lē o faailoina pe tai fia ua fesoasoani ai se vaega o tina mai fafo mo i laua.

O se fesoasoani lea mo ia tina mo le tausiga o a la fanau, a o nofo tatali ai pea i se aso e faamaonia atu ai e leoleo se tala i o la taitoalua. E lē o mafai ona faatino ni talosaga a nei tina mo ni taui o soifua o o la taitoalua ona seiloga e faia se faaiuga a leoleo, ona tuuina atu lea i le faalapotopotoga o taui o faalavelave faafuasei.

E oo foi i seleni a taitoalua o nei tina i le faalapotopotoga o le NPF, e lei faagaioia ona o loo faatalitali i le faaiuga mai leoleo. Ua na o i latou ua faamaonia na maliliu i le taimi o le afā o Eveni, ua maua faamanuiaga tau tupe mai le faalapotopotoga o taui o faalavelave faafuasei.

O le fesoasoani ua maua e ia tina ua faaaogā i meaai ma pili o a la fanau aemaise foi nisi tapenaga o fanau i le itu i le tausiga i aso uma. E le tetele ni seleni ua foai e le faalapotopotoga o tina mai fafo o aumai i le atunuu, ae o le latou talitonuga o le a avea o se fesoasoani mo tina nei o loo mafatia ina ua leai ni taitoalua sa faalagolago i ai ia la galuega sa maua ai seleni mo le tausiga o le fanau.

O se sailiga tupe na faia e tina mai fafo na mafai ona tuufaatasia ai le seleni ua tauaao e Olataga ma Faapea. O lipoti na faasalalau na ta‘ua ai mafatiaga o ia tina e toalua, na a‘e ai se lagona o sui o le faalapotopotoga e faia
se fesoasoani.

Sa maua foi e ia tina se fesoasoani tupe mai se isi Samaria agalelei, o se tagata mai fafo o loo galue i Samoa. O se fiafiaga lea i nai tina ona o le agalelei atu o nisi e lē aiga pe masani foi i ai. E sili le manuia o lē e foai nai lo lē na te talia e pei o ia upu o le Tusi Paia.