Ua ave le tagi ale veaga Tonga ma Amerika NFL Tongan-American NFL, faasaga ile Auckland Rugby Leaque, i mea sese ale Auckland Rugby League (ARL) ua fai ile latou feagaiga ma le ioega e galulue faatasi mo le faatauina mai ole kalapu ale New Zealand Warriors.
Fai mai Richard Fale, o loo faauluulu iai le itu tagi, ole ioega ma le ARL o se feagaiga faalilolilo. Ae ua faailoa faalauaitele ele ARL tuutuuga ole latou feagaiga ma ua tapena ai le latou tagi ile tulafono faasaga ile ARL
O lenei feagaiga na sainia ile masina o Tesema, 2017 e galulue faatasi ai itu e lua mo le faatauina mai ole NZ Warriors. Ae emo ane le ata, ua fai toatasi le tapenaga ale ARL ma tuuina atu le latou ofo mo le faatauina mai ole NZ Warriors.
Fai mai Fale e lē sa’o mea ua fai ma ua solitulafono le ARL ile latou feagaiga lilo (confidential) na sainia. E peiseai ua faaaogā latou ele ARL e maunu atu ai ni aitia, e tapena ai le latou ofo mo le faatauina mai ole ‘au. “Na matou fesootai atu ile ARL matou te galulue faatasi e tapena se ofo mo le faatauina mai ole Warriors. O lo matou talitonuga e tāua tele le sologa lelei ole faamoemoe ile faatauina mai ole ‘au, ole mafuaaga lea ole manao matou te galulue faatasi.”
Na toe saunoa foi Fale, “Ole matou ioega, na matou ofo atu ai matou te faatupeina itu ole taaloga i totonu o Aukilani aemaise ai le atina’eina ole tupulaga. Na faapea foi ona faasoa atu ile ARL e taulai le matou vaai ile lumanai ole Warriors. Na aafia foi i lenei feagaiga a matou fuafuaga faataoto ina ia mafai ona siamupini le ‘au ma le faaleleia le itu tau pisinisi ale kalapu. O nei mea uma nai lalo ole ioega lilo ua saini lima ai le ARL.” Ole faaaliga lea a Fale. Fai mai Fale ua faaleaogaina e le ARL le maliliega ina ua tapena le latou lava ofo toatasi mo le faatauina mai ole Warriors. Ma ua tilotilo ai loa latou e molia le ARL ile tulafono. Peitai, e matuā tetee le ARL i lea mau. Na ta’ua ele Taitaifono ale ARL, Cameron McGregor, ua leva ona tapena le ofo ale ARL, mai le masina o Oketopa 2017 ae e lei taitai talanoa atu Fale ma lana vaega. Mai ia tapenaga na faapea ona iai i lima ole ARL pepa uma e talafeagai mo le tauofoga. Fai mai McGregor ole masina o Novema na faaiu ai tapenaga ale ARL mo le faatauina ole ‘au. Peitai e lei ioe Eric Watson ile ofa ale ARL.
Oloo manao Watson e faatau ese le Warriors mai ia te ia, ae e lei amataina le taamilosaga ole 2018. E tetee foi McGregor ile natura ole feagaiga lilo a Fale ma lana vaega. Fai ma a ia, e lē o iai se ioega aloaia ile va o itu e lua auā na’o talanoaga lava na fai ae leai se maliega mautu.
E tetee foi le ARL ile manao o Fale ma lana vaega e uu e latou le pulea ole NZ Warriors, ae e lē o manao iai le ARL. Afai e iai se ioega faapea e tatau ona vaelua tutusa, ta’i 50/50. E na’o le pau lea o ituaiga feagaiga e manao iai le ARL pe afai e faatau e latou le Warriors faatasi ma se isi vaega.
Ole pulea ai e Fale ma lana vaega ole Warriors e lē ose mea lelei lea mo le taaloga i totonu o Niu Sila. Ole talitonuga lea a McGregor, auā e lē malamalama le vaega lea i tu ma aga ole taaloga i totonu o NZ ma Ausetalia. E iai le ripoti e toatolu ni faalapotopotoga oloo mananao latou te faatauina le NZ Warriors, faatasi ai ma le vaega a Fale mai Hawaii.
