Aga‘i mai aoga a Niu Sila i Samoa

images-cms-image-000010650E tolu lelei aoga mai i Niu Sila oloo i Samoa i lenei vaitaimi ona o le unai lava o le iloa o fanau i tu ma aganuu faa-Samoa.

O le tasi o aoga e ta‘ua o le Pacific School Tokoroa oloo malaga solo i Upolu ma Savaii, ma o Poutasi i Falealili na amata ai le latou asiasiga.

O le avea ai o le gagana Samoa ma gagana lona tolu ua aloaia i totonu o Niu Sila ua iai le faaopoopoga lenei ua faia mo fanau aoga i totonu o Niu Sila. E lē gata i lea o le aoga a Kristen i Niu Sila lava lea foi na asiasi mai ma e ese la le fesootaiga a le aoga lea ma Samoa.

O nisi o le aoga lenei na agai mai i Samoa ile vaitaimi o le tsunami o le 2009. O le fesoasoani ai ile nuu o Poutasi i Falealili na faamautu ai ma le afioga Tuatagaloa Joe Annandale se fesoasoani e avatu ai le tamaitiiti oloo sili aoao ile aoga ile tausaga valu o lea tausaga, e aoga fua ai ma nofo fua ile vaaiga a mātua ma faiaoga o le aoga lenei i Aukilani.

Ua toeitiiti mae‘a aoga a lea alo o Poutasi ae o le tausaga lenei ua iai ma se manaoga o le PTA a Kristen, e tatau ona toe avatu se isi tamaitiiti e fua lava poo ai e sili aoao ile aoga ile vasega valu i lenei tausaga ile aoga tulagalua lea a Poutasi. O avanoa lē aumaua nei ua matuā faafetaia e le aoga.

O le isi aoga oloo i Samoa ose tasi lea o aoga e 10 i Niu Sila ua maua avanoa o tamaiti aoga e to‘a 10 ma faiaoga e toalua e malaga mai ai.

Ose polokalame faalauiloa lea ua faia e le Kamupani Vaalele a le Ea Niu Sila ma ua matuā talisapaia ele Kolisi o Aorere ose avanoa e asiasi mai ai nisi o fanau e tupuga mai i tagata Samoa ma o lea faatoa oo mai lea i Samoa o nisi o i latou, ae e lē gata i lea o nisi o fanau e asiasi mai ma molimauina lenei foi itu o le Pasefika e lei malaga muamua mai ai.

O le faiga o le polokalame e fua i femalagaa‘iga uma e faia e tagata i totonu o le aoga ma e oo loa le maualuga o maka o femalagaa‘iga nei poo airpoints ile 10 afe ona maua ai loa lea o le avanoa lenei e malaga mai ai i Samoa i lenei tausaga tamaiti aoga e to‘a 8 ma faiaoga e toalua.