O le aso ananafi na tuua ai le atunuu e le aulakapi a tamaitai o le atunuu, a le Manu Sina mo Niu Sila ma agai atu ai i Aialani auā le taamilosaga faavaomalo taitoafitu o loo faagasolo i lea atunuu. O le taamilosaga lenei ua faamoemoe tamaitai o Samoa e maua ai ma le avanoa e ofi atu ai i le taamilosaga o le taitoafitu i taaloga o le Olimipeka i le tausaga fou, 2016 i Rio.
O lea na manumalo tamaitai o Samoa i lana taitoafitu i le pine apamemea i taaloga o le Pasefika lea na faatautaia i Papua Niu Kini, ae na o Samoa le ‘au a le atunuu lea ua valaaulia e le Lakapi a le Lalolagi e tausinio i le taitoafitu i Dublin Aialani ona o le sailiga ai o sona avanoa mo taaloga o le Olimipeka.
Talu ona toe foi mai le ‘au a tamaitai mai Papua Niu Kini na amata ai loa ona faapotopoto auā a latou sauniuniga ma na ta‘ua e le taitaimalaga le afioga Toleafoa Mara Hunter o loo malosi le ‘au ma e toaiva i latou ua filifilia mai i Samoa nei ae toatolu ua filifilia mai i Niu Sila lea e agai faatasi atu i Dublin mo a latou taumafaiga i le taitoafitu lea.
O se avanoa o le a mafai ai e le ‘au a tamaitai o le atunuu ona taaalo i tausinioga faavaomalo e pei lava o ‘au a alii i le Manu Samoa. O avanoa nei ua faafetaia e le taitaimalaga e pei ona ia faaalia o le tele lava o taaloga faavaomalo e mafai ona tausinio ai tamaitai o le ‘au a Samoa, o le maualuga foi lena e siisii i ai le tomai ma le malamalama o tamaitai i le taaloga aemaise o auala e mafai ai ona manumalo i nei taaloga tetele. O tamaitai mai i Aukilani i Niu Sila ia ua filifilia na ta‘ua e Toleafoa, o le a faaopoopo lo latou tomai i le malosi o loo moomia e Samoa ina ia lelei ai sona tulaga i lenei taamilosaga. E lei maua se avanoa o nei tamaitai mai Niu Sila e taaalo ai mo Samoa i taaloga a le Pasefika, ae o le avanoa lenei o le a mafai ai loa ona tausinio faavaomalo mo le ‘au a le atunuu.
O Samoa i le faasologa a ‘au lava ia a atumotu o le Pasefika lea o loo tulaga tolu ai i le faasologa mai ia Fiti faapea ai ma Papua Niu Kini.
