Agai le ‘Au Netipolo a Samoa i aoga

Ua mae‘a le vaiaso na malaga mai ai tamaitai ua filifilia nei i le ‘au netipolo a Samoa mo lenei tausaga auā a latou toleniga ma le tuufaatasiga muamua talu ona filifilia.

O le vaega lenei o le latou polokalame ua mae‘a ona faataatia ina ia mafai ona mafuta teine o le ‘au ma ia mafai ona faamaopoopo uma le aufili mo taaloga ma toleniga.

O le malaga mai lenei i Samoa, ua maua ai loa ma le avanoa o nei sui o le ‘au a le atunuu e malaga atu ai ma asia nisi o aoga maualuluga i Samoa.

Faaalia e le tamaitai faiaoga o le ‘au, o Linda Vagana, e faafetai ona o lea ua maua le avanoa o tamaitai nei e asiasi ai i aoga maualuluga i totonu o Samoa.

O se tasi o ia aoga maualuga na asia, o le Kolisi a Palalaua i le itumalo o Siumu. O le tasi lenei o aoga maualuga i Samoa ua vaaia le malosi o le atina‘e o le netipolo ia latou polokalame faaleaoaoga.

O le faamatalaga mai i le Asosi Netipolo a le atunuu, o le tāua o le asiasi atu o nei tamaitai i aoga maualuluga nei, ua maua ai foi ma le avanoa e toleni ai ‘au netipolo a ia aoga.

E lē gata i lea ua mafai ai foi ona feiloai atu teine aoga i tamaitai ua avea nei ma sui filifilia o Samoa i lenei lava taaloga.

E tele ‘au o loo i totonu o le Kalapu Netipolo a le Kolisi o Palalaua ma na maua uma lava le avanoa e talanoa ai ma tamaitai o le aufili a Samoa, e lē gata i lea o toleniga na maua mai i teine netipolo o le ‘au a Samoa.

O se feiloaiga na faia ina ua mae‘a toleniga, ma na talimalo ai loa le aoga atoa i ia tamaitai e pei ona iai se sauniga na failotu uma ai tamaitai ma alii ma  tamaitai o le Kolisi i Palalaua aemaise o le vasega o faiaoga.

Na mae‘a lea ae agai i faafiafiaga a o lei faia se taumafataga na talimalo ai lava le aoga.

O le mau a le Asosi Netipolo ua lē gata i le fanau aoga ua maua le avanoa e feiloai ma taaalo faatasi ai ma le ‘au netipolo a le atunuu, ae mo nei tamaitai, o se avanoa lea e saga unai ai le lagona lotonuu aemaise o le naunau e fesoasoani i le atina‘e o le Netipolo i totonu o Samoa.

O le taaloga lenei, ua iloga le maualuga o tausinioga ua vaaia i totonu o Samoa ma e lē o toe mamao foi ae amata le vaitau o taamilosaga netipolo ia e amata mai lava i aoga laiti, faasolo ai i aoga maualuluga i le atunuu aemaise foi o tausinioga a kalapu netipolo i soo se itu o Samoa.

Ua faamaonia e le Asosi Netipolo, le tele o aoga i tausaga taitasi ua faaopoopo atu lava a latou ‘au mo tausinioga ma o le faanaunautaiga ina ia mafai ai loa i le lumanai ona agai le filifiliga o teine netipolo mo le ‘au a Samoa mai i tamaitai o loo tausinio lava i latou i Samoa nei.

O se tasi o avanoa ua faapea ona lagolagoina e le tele o au netipolo i totonu o le atunuu.

E lua isi faigamalaga faapea a tamaitai o le Aufili a Samoa i le netipolo a o lei malaga ai i Papua Niu Kini auā lana uluai taaloga faavaomalo.

O loo iai le manatu o le tamaitai faiaoga o isi faigamalaga e lua a o lei masii atu le ‘au i Papua Niu Kini, e manaia ae e iai nisi fesootaiga e pei ona vaaia ma le Kolisi o Palalaua, ina ia saga una ai le taaloga i aoga aemaise o le lagona e pei ona ta‘ua, o le fia fesoasoani ma le lotonuu i tamaitai o le ‘au a le Atunuu.

O le toatele lava o le ‘au taaalo a Samoa ua filifilia nei, e nonofo i Niu Sila ma Ausetalia ma o le mafuaaga lea o le manaoga o le Asosi Netipolo i Samoa ina ia sasaa mai le tomai o nei tamaitai ma ia fesoasoani ai i le latou polokalame ua amata nei i aoga.