Ua faaalia le faanoanoa tele ole Peresetene ole Iuni Lakapi faaitumalo ale Apia i Sisifo poo Apia West le afioga Aiono Tony Aiono ona ole tutū gūgū atu lava o nisi o aulakapi ma agai atu e taaalo ai mo le Iuni Lakapi faaitumalo a Apia. O aulakapi nei e tolu e aofia ai Malisi Sagato Iosefo, Vaimoso ma Moamoa lea na amata taaalo ai mo le Iuni Lakapi a Apia ile Aso Toonai na tea nei. Ole saunoaga a Aiono na ia ta’ua ai, ole faagaulemalie ai o nei aulakapi e tolu ona o teuteuga ile faavae ole Iuni Lakapi faaitumalo ale Apia i Sisifo, lea na tapena ele alii Loia ia Aumua Ming Leung Wai, ole faufautua faaletulafono foi mo Apia i Sisifo. Fai mai Aiono, o teuteuga na manaomia le faatino ai i totonu ole faavae lenei peitai e foliga mai ua toe suia atoa le faavae, ose faavae fou.
E iai le talitonuga o Aiono, poo fea lava e fai agai ai ni eseesega o sui usufono ae e tatau lava ona soalaupule ai i fonotaga ale Apia i Sisifo. Ole itu oloo to’atamai ai le Peresetene ona ole leai ose tusi aloaia na tuuina atu e Malisi, Moamoa ma Vaimoso e faailoa atu ai le agai ese mai ile Apia i Sisifo. Na faatoa taunuu atu le tusi aloaia faamavae mai ia Vaimoso a’o faagasolo ai taaloga ale latou Iuni ile Aso Toonai na tea nei. Sa tatau foi ile Iuni Lakapi faaitumalo a Apia ona logo aloaia atu le Apia i Sisifo e tusa ai ma le taunuu atu o nei ‘au e tolu ile latou Iuni, saunoaga lea a Aiono.
Peitai ose mataupu oloo matuā teena ele Peresetene ole Iuni Lakapi faaitumalo a Apia, le afioga Fuimaono Titimaea Tafua. Ta’ua e Tafua, e leai se tulaga faapea e logo ai fua ele latou Iuni faaitumalo le Apia i Sisifo ona o ‘au e tolu ua agai atu i Apia.
Oloo iai lava a latou pulega, ma ole latou matafaioi lena ole logo ole Apia i Sisifo, pau lava le vaega oloo autilotilo iai le Iuni faaitumalo a Apia, ole atina’eina lea ole taaloga lakapi ma maua le avanoa e taaalo ai alo ma fanau a Samoa, ina ia filifilia ai i ‘au faavaomalo a Samoa ile lumanai.
Na fesiligia foi le finagalo ole Peresetene a Malisi le afioga Faimalomatumua Mathew Lemisio, ae ole tali a Lemisio, e lē o oese Malisi mai le Apia i Sisifo, oloo iai pea le resitala a Malisi i totonu ole Apia i Sisifo, ae ole mafuaaga ole ave ai ole aulakapi a Malisi ile Iuni Lakapi faaitumalo a Apia ina ia maua ai le avanoa e faataaalo ai pea tama taaalo ae se’i toe soalaupule nisi o mataupu i totonu ole Apia i Sisifo. Saunoa Lemisio, e iai lo latou talitonuga e lē o mulimulitaia ele Apia i Sisifo faiga faavae faatasi ai ma se fautuaga faaletulafono mai ile loia ale Apia i Sisifo le susuga Aumua Ming Leung Wai. Na faailoa foi e Lemisio, ua leva e lei toe faaaogāina le resitala ale Apia i Sisifo (deregister) i lalo ole Matagaluega o Pisinisi Alamanuia ma Leipa ae ole faavae fou na tapena ele alii loia lea na mafai ai ona toe resitala.
Na teena foi e Lemisio le saunoaga ale Peresetene ale Apia i Sisifo e faapea ua tutū gūgū atu lava ae lē se’i faailoa atu ise tusi aloaia. Saunoa Lemisio, ua uma ona tuuina atu le latou tusi muamua ile komiti faafoe ale Apia i Sisifo ina ia toe faataunuuina se latou fonotaga faaletausaga e faaaogāina ai le faavae ua resitalaina i lalo ole Matagaluega o Pisinisi Alamanuia ma Leipa, peitai na faia lava le fono faaletausaga ale Apia i Sisifo ma o latou filifilia ai le sui o Malisi e avea ai ma sui peresetene ole komiti. Na teena e le laulau ale Malisi lea faaiuga ma toe tuuina atu ai se isi a latou tusi ile tatau lava lea ona faia se isi fonotaga faaletausaga e tusa ai ma le faavae fou ua taatia nei, peitai e lei toe tali mai le komiti ole Apia i Sisifo.
Ta’ua e Lemisio, ole a faaauau pea ona tausinio ai le ‘au a Malisi ile Iuni Lakapi faaitumalo a Apia seia toe aloaia ai nisi o suiga mo le Apia i Sisifo ona aumai ai foi lea ole isi ‘au a Malisi e taaalo ai ona e silia ma le 60 tama lakapi oloo koleni ma taaalo ai mo le kalapu taalo lenei a Malisi.
E lei maua se finagalo ole alii loia ia Aumua faatasi ai ma le Peresetene ole kalapu taalo a Vaimoso e faatatau i lenei mataupu.
Ae ile faaiuga na iai taaloga a nei ‘au e tolu ile latou vaiaso muamua ile Iuni Lakapi faaitumalo a Apia, na malolo ai Vaimoso ia Apia e 26-21, o Moamoa na malolo foi ia Magiagi e 15-10, ae o Malisi na manumalo ia S.C.O.P.A. e 27-26. E pei ona silafia, o Iuni Lakapi faaitumalo malolosi lea ile tele o tausaga, ole Iuni Lakapi faaitumalo a Apia ma le Apia i Sisifo. E iai le talitonuga ole tatou nusipepa e iai nisi tala faaopoopo o lenei mataupu ma ole a mafai ona lipotia ai ile vaiaso fou.
