I le maea ai o le faitauga muamua o palota mo le faiga palota tele a le atunuu e pei ona faatautaia ai i le faaiuga o le vaiaso, ua tulai mai ai nisi o tamalii o le atunuu i upu fai a le malo o Niu Sila ina ua faamauina le palota silia i itumalo na tauva ai. O le afioga Peseta Sam Iiga na soifua mai i Apia ae mulimuli ane malaga mai i Niu Sila nei ma alala ai ma si ona faletua o Jules i Onehunga. O Iiga na aoaoina i le aoga maualuga Auckland Grammar ma agai atu ai i le Iunivesite o Aukilani ma o loo avea nei ma loia ma umia foi faailoga taua mai le iunivesite o Cambridge. Sa tauva mai Peseta i le itumalo o Maugakiekie lea na palota silia ai ile faitauga muamua o palota. O le afioga Su’a William Sio ua faamanuiaina nei i le nofoa o le itumalo o Magele e pei ona finau ai foi i lenei lava faigapalota ma aupito i sili ai ana palota mai sui tauva uma na iai o le itumalo o Magele. Faaalia e Su’a i se faatalanoaga ma le Samoa Times o le vaiaso nei o le a faimalaga ai i Ueligitone mo le faamoemoe o le malo e pei ona masani ai pe a maea faiga filifiliga a le atunuu.O Peseta sa tauva mai i le vaega faaupufai a le National i lalo o le taitaiga a John Key ae o Su’a sa tauva mai i le vaega faaupufai a le Leipa taitai e le tamaitai palemia o le atunuu sa iai o Helen Clark.
O se vaaiga felanulanuai na molimauina i le atunuu i le faaiuga o le vaiaso ao tau fai gasolo le atunuu i fale palota mo le faia o a latou filifiliga i sui tauva. O nisi o fale palota na asia e le Samoa Times na molimauina le matua leai o se ofi i le toatele o le mamalu o le atunuu na paau atu i nei nofoaga eseese mo le faia o a latou palota. O le vaiaso nei o le a tulituliloa ai pea e le Samoa Times le faitauina faalua o palota seia oo lava i se faaaliga aloaia mai le malo i le faaiuga o le faiga palota o lenei tausaga. E silia ma le 80 pasene o tagata na resitala mo le faiga palota na faataunuuina a latou palota ma o se tasi o le uluai tausaga lenei ua maualuga ai faapea le fuainumera o palota a tagata o Niu Sila. O le tele o nisi o nofoa i itumalo o loo talia pea le faaiuga o le faitauga faalua ona e le tele se eseesega o palota mai le uluai faitauga. O leisi tulaga maualuga e pei ona matauina i lenei tausaga o le aofai o palota faapitoa lea o loo talitali iai nisi o vaega faaupufai pe ono toe faamanuiaina ai le taumafai o isi o a latou sui tauva.
