E loloto le moana ae ua iloa ala o i‘a, e toatele foi e valaaulia ae toaitiiti e filifilia. O le tofiga Sui o le Fono a Sui Tofia o se tofiga maualuga ma mamalu ma e lē soona filifilia i ai se tagata, seia vaganā lava ua agavaa ma talafeagai i ai e tusa ma aiaiga o le faavae.
E leai se isi o faasala ese i le filifiliga a le faigamalo o le HRPP lea ua filifilia ai tamalii e toalua ua afu le tautua i tausaga e tele sa lotolotoi ai i upufai o le Malo e ala i tofi faipule o le itumalo o Lefaga ma Faleaseela ma le itumalo Safata ma Falealili.
O le tofa Tuiloma Lameko o se isi o toe ulutaia o upufai ae o totonu foi o le Kapeneta aemaise o le vaega faaupufai e puipuia aiātatau o tagata le HRPP( Human Rights Protection Party).
O le afioga ia Le Mamea Ropati Mualia ua tele foi tausaga o lana tautua i upufai aemaise o le filifilia pea e lona itumalo o Lefaga ma Faleaseela e tauaveina le tofi faipule. O ia o se tasi o sui faavae o le HRPP ae e pei lava ona silafia na solomuli ese ma le vaega faaupufai i ni tausaga ua tuanai ona o ni mataupu faalotoifale.
Na see ane ma tautua i upufai i le Itu Agai ma le vaega faaupufai o le SNDP a o taitai ai le afioga i le Tamaaiga Tui Atua Tupua Tamasese Efi a o avea ma faipule o le Palemene. Na faaauau ai lana tautua seia oo ina filifilia e avea ma taitai o le Itu Agai.
O loo manino aiaiga o le faavae o Samoa e faasino i le filifilia o se Ao o le Malo ma tofiga o le Sui o le Fono a Sui Tofia. E leai se faaupuga o iai e na o Tama Aiga e seei i ia tulaga tofi maualuluga. O lona uiga e soo se tasi ua iai agavaa o loo manaomia e le faavae e avanoa ona filifilia i ai.
Na faaleo se finagalo o le taitai o le Itu Agai le afioga Palusalue Faapo II i tusitala ma ia ta‘ua ai, o loo seei i le latou vaega faaupufai se tasi o toe ulutaia o le Palemene le faipule o Falealupoi le afioga Aeau Peniamina Leavaiseeta, atonu o se isi taimi ona silasila lea i ai o le faigamalo.
Ua mae‘a ona pasia e le Palemene i le paeaiga ua faata‘ape atu nei le teuteuga o le faavae ua ave ai le filifiliga o se Ao o le Malo, ma le Sui o le Fono a Sui Tofia, i le vaega faaupufai o loo iai le numera fulisia o nofoa e 49 o le Palemene. E faapena foi i le filifiliga o se Palemia ma se Fofoga Fetalai o le Palemene.
O le faigapalota o le 2011 na tulai mai ai se suiga ina ua toe talia i le vaega o le HRPP e tauva mo lana fu‘a i lea palota tele a le atunu. Na toe manumalo mai ai ma faapea ona tofia ai e le taitai o le HRPP e avea ma Minisita o le Kapeneta e pei ona seei ai nei.
O taimi o avea ma sui o le HRPP a o lei faamavae ma alu ese, sa filifilia ai foi i le Kapeneta e pei ona sa avea ma Minisita o Aoga ma o ia foi na faavaeina le fuafuaga a le Malo mo le faatuina o se Iunivesite.
Ua 70 ma ona tupu tausaga o lona soifua. O le tofa Tuiloma ua valusefulu ma ona tupu tausaga o lona soifua. Ia manuia tele le filifilia o nei tamalii o le atunuu i tofiga Sui o le Fono a Sui Tofia poo le Sui Ao o le Malo. E tuuina atu lenei lipoti mo le faasalalauina e lei faamautuina mai se polokalame o le sauniga o le faatautoga i le vaiaso nei.
