O le afiafi o le Aso Faraile i le faaiuga o le vaiaso nei, o le a faia ai se tauaofiaga tuufaatasi a nisi o aupepese ma fa‘ili a i latou o loo tapenaina pese ma viiga aemaise o tapuaiga i le Atua, mai le tele o ekalesia eseese i Aukilani. O lenei tuufaatasiga, ua tolu ai nei tausaga talu ona amata ma faavaeina.
O se tofa mamao sa faailoa e le Atua i se tasi o ana auauna, sa mafua ai ona laga ma faataunuuina lenei polokalame. O se polokalame o fetufa‘iga o taleni ma meaalofa mai au eseese, auā le faamaualugaina pea o viiga o le Atua, i totonu o ekalesia o loo galulue ai. E le gata i le faasoaina o taleni ma meaalofa, ae o se auala foi o loo mafai ona fesootai ai le auuso Kerisiano, mai soo se ekalesia lava.
O se mafutaga e faia i le agaga saoloto, ma le loto fuatifo lelei e tuufaatasia ma fesoasoani ai le isi aupepese, i le isi foi au fa‘ili i le faamoemoe maualuga lava e tasi e pei ona auga i ai, e mo le atinaeina o Viiga o le Atua, atoa ai ma le soifua tapuai, i totonu o malumalu tapuai taitasi.
Ua savali i le tolu tausaga o faia pea lea sauniga tāua faapitoa mo aupepese, ma sa maitauina mai tausaga ua mavae, le alualu pea ma le agai i luma, o lea foi faamoemoe.
Sa faaalia e le susuga i le Faafeagaiga, Pastor Tuilagi Meke Leilua e faapea, e lē mafai ona toe taofia lenei faamoemoe, ona o loo vaaia faamaoniga o le agalelei mai i ai o le Atua i tausaga uma talu ona amata mai.
E ui ina faigata nisi foi o vaega mo le taumafai ia tuufaatasia, ma galulue faatasi ma uso a auauna ma aupepese, peitai e lē mafai ona taofia ai se feau tāua o loo taumafai e momoli pea ma faailoa i lea mafutaga.
E lē o le igoa o le lotu, ae o le suafa e tasi sa ia totogi le tau mo soifua e toatele, o le autu lea, ma le savali o le manumalo, ma le faasalalauina o le Talalelei e pei ona finagalo i ai le Tamā. E iai foi le talitonuga, o le suafa lava lea e tasi o Iesu Keriso e ao ina sisi pea i luga, ma ona pau foi lea o le auala, e mafai ona tuufaatasia ai tagata, lanu ma gagana uma.
O lenei tausaga, e ono ni ‘au mai ekalesia eseese i Aukilani, faatasi ai ma se tasi o ‘au mai Ueligitone, o loo taitai mai e se tasi o alii pese lauiloa o le Tiamaa, le susuga ia Fafo, ua avea nei o se Faifeau. O nisi o ‘au e mai ekalesia lava i Aukilani, ma ua faamoemoe o le a tele ni feau tāua o le a momoli mai i tapenaga a au ua valaauina faapitoa i lenei tausaga, e ala i pesega ma taleni. O loo tatala foi le avanoa mo soo se tasi e fia auai, ma avea ma tagata tapuai i lea afiafi.
O le nofoaga a le Encouter Christian Centre i Avondale o le a faataunuuina ai le sauniga i le faaiuga o le vaiaso nei. O le a iai foi se Failauga faapitoa o le fofogaina le Afioga a le Atua i lea afiafi.
O le a maua foi sina taumafataga māmā mo le mamalu o i latou o le a auai atu i le mae‘a ai o le sauniga.
