Ua faagasolo ai galuega tau i le tala’iga ole tala lelei mai Isaraelu e le failauga, Benjamin Berger i Samoa. O le taeao o le Aso Gafua 21 May, na alausu ai lava uso Kerisiano Samoa, i le faletalimalo o le Taumeasina i Moataa. E faitaumafataga faatasi o le taeao ma le failauga mai Isaraelu, Mr Berger.
Na talanoa ai le failauga, o le mafuaaga tonu lava o le oo mai Samoa ma isi atunuu o le Pasefika ina ia maua se sootaga ma Isaraelu, aemaise ai lava o se sootaga a Samoa. Na ia amanaia le toatele o tagata Samoa ua malaga atu i Isaraelu, ona o le lagona o le Atua, o le sootaga lea faaletagata.
O lana malaga mai i Niu Kaletonia, lea na valaaulia atu ai ia e uso mai Samoa e malaga mai i Samoa. Na maualuga lana faafetai i le avanoa, ma le sootaga i le va o Samoa ma Isaraelu. Ua ia lagona foi le faalogona fiafia i le taunuu mai i laufanua o Samoa. Na oo atu foi i le atu Papua Niu Kini ma Indonesia, ae maeu lava foi lo latou taliaina o ia. Na fiafia lava e faasoa atu i uso i Papua Niu Kini.
E tatau ona iloa e tagata le fuafuaga a le Atua, i mea o folafola mai le Tusi Paia, ua taunuu ma mea e lei taunuu. Na talanoa foi le failauga i le Feagaiga Tuai ma le Feagaiga Fou.
Ua tele ina taulai tagata o aso nei i le Feagaiga Fou, ae e tatau ona silafia le sootaga o le feagaiga Tuai i le Feagaiga Fou. E lē mafai ona malamalama tagata i le feagaiga fou, pe afai e lē o malamalama i le feagaiga tuai.
O le sootaga a Samoa ma le failauga lenei, na talanoa i ai le Susuga i le faafeagaiga ia Nuuausala, ua lauiloa i lona suafa Pastor Nuuausala o Apia. I lana talanoa e pei ona oto mai ma tuuina atu i lalo:
“Na amata mai lenei fesootaiga i le tausaga talu ai, sa malaga atu ai tagata Samoa mai isi atunuu, Niu Sila, Amerika ma Ausetalia, sa matou faimalaga i se koneferenisi sa faia e le auuso lenei, o le au Iutaia ua talitonu i le Mesia, ua latou talia foi le faaolataga na faia e Iesu Keriso.
Sa masani ona o atu isi ekalesia mai itu e fia i le lalolagi, ma fai latou fono i Ierualema, ae o le taimi muamua ua valaau ai le au Iutaia ua talia le Mesia, i le tatou itulagi.
O le ala lea na faia ai le Koneferenisi lea Isaraelu ma matou o ai matou mai Samoa e fai ma sui o Samoa ma isi foi atunuu.
O iina sa maua ai le sootaga ma le auuso lenei i totonu o Ierusalema. Pau le matou mea na fai e matou o le totogi o pasese ma feoaiga ma faletalimalo. Ae na matou o e tali le latou valaau mai.
Maeu lava le faalogologo atu i ai i le loloto o le mataupu silisili oi ia i latou, aemaise o Iutaia ma atunuu. O le upu atunuu ua latou faaaoga nai lo le ta’u o le upu nuu ese.
Aemaise lava foi le fofola mai ei latou o le afioga a le Atua, mai le amataga i le Au perofeta i mea ua tutupu ma mea e lei tutupu.
I le faatalanoana lava lea ma Pastor Nuuausala, na ia talanoa ai, i le Malaga mai a Pastor Benjamin Burger i Niu Kaletonia.
“Ae ina ua matou iloa e ui mai Niu Sila, na faapotopoto loa matou ma faia se auala e oo mai ai, ma fai lona pasese ma mea e alala ai, ina ia faailoa ia Samoa mea e lē o iloa.
O le polokalame o le vaiaso lenei a le uso lenei mai Isaraelu, o le Aso Lua o le vaiaso nei, e feiloai ai ma le Ao o le Malo, faasolo atu ai ma le feiloa’i atu i le Fono tele i Malua, ma sosoo ai ma le asiasiga i le Kolisi faafaifeau i Piula. O le Aso Lulu o le AOG, ma le feiloaiga i le One in Christ.
O isi fuafuaga agai atu i le lumanai, o ta’ua e pastor Nuuausala, e iai le isi uso e faimalaga mai ia Aokuso, mo le faia o Koneferenisi. E tāua ia i latou le upu. O le o atu e tala’i le talalelei seia oo i tulu’iga o le lalolagi.”
O a latou lotu e faia i le gagana Eperu e pei ona sau ai le Tusi Paia i le Feagaiga Tuai, pei ona molimau mai Pastor Nuuausala.
E toatele i latou o loo umia tofi failauga o faifeau, faapea a’oa’o na auai, na maua foi le avanoa o le Susuga Kasiano Leaupepe e talanoa ai, ma ia molimau i le alofa o le Atua ia te ia, ua 82 ona tausaga, ae o loo ia faaaogāina nei le matatioata a Iesu, o le pupula fua, e leai se tioata.
I le taimi lava lea o le failauga a le Katoliko ia Kasiano Leaupepe, na ia tatalo ai i Ekalesia e lei auai mai i le Fono a Ekalesia Tuufaatasi, pei o le Aso Fitu ma isi, ina ia galulue faatasi, ia vaai ia Samoa, o lea ua uulima fanau a le Atua, ma maua e Samoa le to’afilemu.
