O le tau gagaifo o le la o le Aso Lulu na se‘i mavae atu nei, na avea o se afiafi fiafia o le feiloaiga a le Puleaga Katoliko poo le Matagaluega a Kuiniselani i le Ekalesia Katoliko ma le Taitai Aoao ole Ekalesia mai Samoa le Akiepikopō afioga ia Alapati Lui Mata‘eliga.
Ina ua taunuu mai i Kuiniselani lana faigamalaga, o se feiloaiga fiafia talu mai le lua tausaga ua tuanai na ia asia ai foi le Aiga o le faatuatua i Perisepeni i le 2013.
Sa saunoa le Afioga i le taitai o Kuiniselani, le Afioga Patele Epati Tamati Aiolupotea,e iu ina puupuu le taimi ae ese le tāua o lea feiloaiga. Na mae‘a le ‘ava o le feiloaiga ona sosoo ai lea ma le Semina ,o ni mataupu lava i totonu o le Ekalesia Katoliko i le ola faatuatua ma le talitonuga o tagata lotu auā lo latou malamalamaaga.
Sa malaga mai le Taitai ma lana Faleupolu poo lana tulafale le Afioga i le Tiakono ia Etuale Ulugia. Sa auai uma foi le Itu Aiga Sa i le faamoemoe i le afiafi, ma sa faaiuina ma le manuia. E tolu aso o le malaga, Aso Lulu, Aso Tofi ae toe foi i le Aso Faraile. O le po la o le Aso Tofi i le ono i le afiafi na toe faaauau ai le mafutaga i le Semina a le taitai ma le Misasa Paia, ae o le aano ma le ute o lana afioga, ia nofo malamalama tagata lotu auā o lou fiafia ma lou saoloto e te mafuta i le Alii e ala i lau tapuaiga pe a e malamalama i faavae ma tapulaa ma suiga o le Ekalesia.
Na faaiu le Semina i le sauniga o le Misasa na osia lava e lana Afioga i le Akiepikopō Alapati Lui Mata‘eliga. Na auai nisi o faifeau susuga Rev Milo Faaleava (EFKS Brisbane) ma le nofoaalo aemaise foi o nisi o Asosi o tama ma teine tuai sa aotauina i Aoga a le Katoliko. Na mae‘a le Taulaga Paia ona afea foi lea o le faaaloalo a le Puleaga e ala i le taumafataga ma faaaloaloga auā le Taitai ma le faigamalaga ona taumavae ai lea.
O le tootoo lava o Tevaga ma Vaifale na fai ma fofoga o le Puleaga ma le Matagaluega a Kuiniselani. Ma sa tali faitau mai i ai le Tiakono e tusa ma faaaloaloga mo le Akiepikopō, ona lafo lea i le saunoaga mulimuli ma le faamanuiaga a le taitai mai Samoa ma taumavae ai loa le aofia ma tuuvaa atu ai le faigamalaga i nisi setete ma nisi atunuu a o lei toe taliu i Samoa.
