Afea e le Island Storm mai Melepone le Setete o Kuiniselani

E talanoa loa i faaili, e mautinoa lava le faafiafiaina o le auvaega foi lea e fiafia e one, two, three and four ma faamalosi tino i luga o le dance floor ma alu faasoloatoa.

E iai lava nisi e tulimatai i le Aso Faraile poo le Aso Toonai e malolo mai ai i feau ma galuega masani o le vaiaso, ae sei fai sina kepu poo le ta‘u lea e sāua i le faalogo o le gagana o aso faisoo a le au tafafao poo le au eva i le musika lea o loo faaaogāina faaili.

Na logologoā mai tala o le faaili a le Island Storm e fia malaga asiasi mai i Kuiniselani nei, lea la ua taunuu ai le faamoemoe e pei ona sa faafiafia ai i le hall a leoleo (PCYC) i Logan i le po o le Aso Toonai ua tuanai.

Sa vaaia le faatumulia o le tupulaga ae lei tuumāmāina foi e le au faiama poo ulugalii, le lolofi atu e fia faafofoga i siufofoga mālie ma fia maimoa ia i latou nei o loo tautuaina le faaili a le Island Storm.

E tasi le vaiaso o le latou tafaoga ma o se avanoa tāua lelei lenei ua mafai ai ona feiloai fiafia ma se tasi o faaili o loo lauiloa foi i lenei itu, le Simply Savaii, susuga ia Daniel ma le au boys ma nisi lava o faaili o loo faafiafia i Brisbane.
Sa faamanuiaina le faamoemoe auā sa vaaia le lagolago o le atunuu e ala i siva Samoa ma le tele o le aao foai ona o le logomalie o pese o usuina e i latou nei mai le Island Storm.

O i latou o loo i totonu o lenei faaili a le Island Storm e aofia ai le alo o le atunuu ua loa foi ona silafia i le mālū o ana fātuga, susuga ia Taufi Faaosofia (Neiafu & Siumu), faapea tama tuai nei o le musika, le susuga ia Agaimalo Asu Kaio (Lefagaoalii & Saleimoa) ma Kasiano Leofo (Laulii).

O nisi o tamā e aofia ai Peter Seuseu (Afega) le tamaitai o Lora Manupenu (Fasitoouta) faapea le taitai poo lē na fofoaina mai le faaili, le Susuga ia Suelaki Sapolu (Nofoalii). O Faufautua, o Ili Tolai Tanuvasa (Nofoalii) ma Gaseata Seniolo Tanuvasa (Nofoalii).

O se tasi o uo mamae a le Island Storm ua aumau nei i Brisbane o le susuga ia Ufi Finau (Lefaga) sa ia opogi le faamoemoe i lea po, faatasi ai ma nisi o aiga e pei Agaseata Lufia & Perise Hunt, Alo & Aulafo Fesola‘i, Agaseata Neemia & Sulieta Auvaa, Faapea Uo: Pula & Meripa ma Nonu & Aiga.

O le afiafi o le Aso Sa na toe taliu atu ai le faigamalaga i laufanua o Melepone ona o feau ma galuega faapea tiute ma faiva alofilima masani.

Matagofie le togiga a le Island Storm ae o se saunoaga a le susuga ia Taufi Faaosofia ma Agaimalo Asu o loo tele latou togiga, peitai ua manaia tele le togiga lea e faaaogā e silafia ai e Kuiniselani o le Island Storm e lē tele a i se pito le fiafia e vivii, Amene! E moni, Malo le eva Island Storm!