Afaina le Reds a McKenzie

E lē o mailoa pe iai se aafiaga i tapenaga sauniuni a le faiaoga fou o le Wallabies ia Ewen McKenzie a o lei oo mai le taaloga muamua a Ausetalia talu mai le malolo matagā a lana au faaitumalo o le Reds 38-9 i le Crusaders.
E pei ona silafia le mananao o nisi e suitulaga Ewen ia Robbie Deans ae pagā lea, ua avea ma tulaga e faateia ai e le ‘au mai Niu Sila.
O le sini o McKenzie talu ona avea ma faiaoga a le Reds o le fia laasia lea o se manumalo lona fā i le ‘au a Todd Blackadder lea faatoa faatasi ona manumalo ia la fetauaiga.
I le uma ai o le lami a Canterbury, ua tolu ai nei manumalo a le Reds ma le lua a le Crusaders.
O lea taaloga na misia ai tele le alo o Samoa ia Digby Ioane lea e tuua le Reds i le tausaga nei.
Sa vaaia foi le faamalosi o le alo fou ia Chris Feauai Sautia i le laina i tua ae na matautia le osofai a le Crusaders.
O se taaloga na vaaia ai foi le tigaina o le laina i tua a Kuiniselani i le osofaiga a le ‘au mai Christchurch ma na fiu Ben Tapuai ma le vaega e poloka le Crusaders ae maua lava o latou avanoa e maua ai sikoa e
lua a Ryan Crotty, Dan Carter ma Tom Marshall.
O le isi alo o Samoa sa i le nofoa o le aufaaleoleo a Kuiniselani e aofia ai Albert Anae ma o se taaloga faagalogata mo ia.
O le taimi nei ua pusinofo le Reds ae o le a tapuai le Crusaders mo se ‘au latou te feiloai i le Semifinal.
Afai e manumalo le Brumbies i le Cheetahs lona uiga o le a Semifinal le Crusaders ma le Chiefs i Hemilitone i Niu Sila.
I le ono manumalo ai o le Cheetahs i le Brumbies lona uiga o le a malaga le Crusaders e Semifinal ma le Cheetah i Pretoria, Aferika i Saute.
Mo McKenzie ma Ben Tapuai faapea sui o le Wallabies i totonu o le Reds…ua amata tapena nei loa mo le filifilia o le aufili auā le tauvaga a le SANZAR.