Na matuā faatumulia le Dockside Pavilion i Darling Harbour ile po ole Aso Faraile talu ai ile Faaaliga o ofu ma mamanu 2016 sa faaigoaina ole Pacific Runway Fashion Show.
O lenei faamoemoe sa faafoeina ese tamalii iloga ole atunuu le faletua ia Failepou Peni ua tolusefululima tausaga o galue ma faatinoina lenei auaunaga o laei ma mamanu eseese i Sini ma Ausetalia i lana pisinisi ole ‘Lepou’.
Na matagofie tele le nofoaga sa faia ai i luga ole sami ile ogatotonu ole ava i Sini Darling Harbour lea e si‘o e fale tetele maualuluga ma fetaula‘i ai vaa faila ma meli tetele ma matagofie ile vaai.
E pei ua toe feiloai Malo faaaloalogia i Samoa ma le valaaulia ile ulufale atu ile kapeta mumu ile va o fitafita Pasefika i teuga faaleaganuu anamua o faatalitali mai le vai taumafa ma nai taumafataga māmā e feiloai ma fesilafa‘i ai le aofia ma feofoofoai ma fetufaa‘i ae lei amatalia le faaaliga.
Sa maualuga ma matagofie lea aso ile paau mai ole Afioga ale Hai-Komesina o Samoa mai Canberra e molimauina ma faafetaia lenei matatia fou ua ausia ma ua aofaga faatasi ai le mamalu o faimamanu ma su‘isu‘i lelei uma o Samoa ma le Pasefika i Sini a‘o silasila Ausetalia ma le lalolagi atoa.
Ole susuga ile A‘oa‘o ia Roy Saipaia na tatalaina le faamoemoe ise tatalo puupuu ma saunoa ai le Afioga ile Faatonu Failepou Peni ile saunoaga autu ma fai se talaaga o lenei miti ua taunuu mai le tele o tausaga na fuafua mai ai.
Ose vaega na iloa i lea saunoaga ole tatala ai ole avanoa mai o oloa nei ale Pasefika ma Samoa e faailoa ma faatauina ai e tagata o Ausetalia ma le lalolagi nai lo tatou lava itulagi ole Pasefika.
Na muamua lava momoli lana faafetai ile faatasi mai ole Atua Soifua i nei gaioiga uma ma kamupani tetele sa latou silasila ile tāua o lenei Faamoemoe ma ofoina la latou lagolago e pei ole Naturally Fiji, Samoa Fashion Week, Papua New Guinea Fashion Week, Pacific Island Trade Investment, Lepou, IMG, FTM, the Liquor republic, Ben Pati Photography, Star Central Magazine ma isi.
Ose vaaiga maoae le felanulanuai ma le feilafi o laei ma lanu aemaise sitaili eseese mai le Pasefika ma faavaomalo sa molimauina. E fai ole lalelei ma le tino lelei o i latou sa faaleleina ma ofu i nei oloa matagofie ae ole maofa foi ole silia ma le 400 tagata maimoa.
Mai lenei faamoemoe muamua e toafā paaga faavaomalo sa latou galulue, tolu kamupani sa sapalaia le faaaliga ma le 14 tagata faatonutonu laei (designers) na malaga mai Polenisia, Maikolonesia ma Melanesia sa laeiina ma faailoa e tamaitai ma alii (models) e 67 sa auai.
Sa iloga foi le taupati ma le sogasoga o galuega mamanu ma su‘isu‘i a tamafanau a Samoa o alala i Ausetalia e pei o Peter Henry Tamasese (Brisbane), Roz Tuiletufuga ma le Tui o SivaMalie Wearable Designs (Sini) Grace Wallflower, Oliveta Creations, Danitta Fretton-JO’LI, Brandon Peni-Brandon Sewtec Fashion (Aukilani), Vaoese Kava & Lydon Felise Liebregts (Beast Sporting Apparell Brisbane).
Na matagofie ma ese foi le lasi o taumafaiga a isi sui Maori, Papua Niu Kini, Rarotoga ma Fiti.
Ose fiafiaga sili ile toatele o aiga ma uo sa auai ole taimi na faailoa ai taleni a sui iloga mai Samoa ia Dane Mulinuu Fabricious ole DMF Fashion Line, Pearl Passi Sheck – Sofa‘i Creations, Eveni Carruthers – Sport & Koko Pacific aemaise Cecilia Keil ole Cecilia’s Fashion House. Ua tatala nei avanoa sa lei iai muamua e faatau ma laei ai le lalolagi o tagata i atunuu eseese i galuega taulima ma mamanu Samoa ma le Pasefika ise maketi e lelei tele mo i latou na auai.
