Postgraduate & Master of Educational Leadership…AUT 16 Tesema 2014
Lo‘u agaga e, ia e faamanu atu i le Alii, o mea uma foi oi totonu ia te au ia faamanu i lona suafa paia.
O le lagona faagaeetia ma le olioli loloto, ina ua a‘e malo faiva ma le faatamasoalii sa feagai ai Sarai T. Patolo-Tokuma i aoaoga i totonu o Iunivesite i Niu Sila.
E lē faigofie le taunuu mai Samoa, ma taumafai ia ulufale i aoga i Niu Sila. Ae sa tuu atu pea i le Atua e ona le poto ma le atamai, ia alofagia le taumafai o le afafine.
O Sarai Tuileisu Patolo-Tokuma (Toamua Faleata/Fasitoo-Uta), o le ulumatua o le fanau e to‘a 7. Sa amata mai lana galuega mai le Ofisa o le Soifua Maloloina i Samoa (Health Department) i le vaega o le falema‘i o oloa poo nifo, i le 12 tausaga seia oo ina faimalaga mai i Niu Sila nei. Na faaauau ai le aoga faafaiaoga i Epsom i Aukilani ma le AUT Manukau ma North Shore.
2005-2008: University of Auckland Epsom – Diploma of Teaching ECE in Pasifika.
2009-2011: University of Auckland Epsom – Bachelor of Teaching
2013-2014: Auckland University of Technology – Postgraduate of Teaching & Master of Educational Leadership
O se mea faigata, faagalo gata, musuā ma augata, ae sa lē mapu le lagolago malosi ma faamalosiau mai o ma‘ua mātua o loo nonofo mamao mai Samoa, ia Leaoaniu ma Lima Patolo, uso ma tuagane ma aiga pele.
O le tamā o le aiga ia Moanatuli Ruatesi Tokuma ma le fanau i le latou pitolaau ina ia faamalosi ma filiga ia iu le taumafai.
O le tapuaiga a le Susuga Eperone ma le faletua ia Mafa Futi, faatasi ai foi ma le tatalo a le Susuga Dr Eletise Sulufale ma le faletua ia Rosa (Faafeagaiga i Toamua), a o salalau ai alo ma fanau o le alalafaga, lea ua faataunuu ai ma le manuia le taumafai o le afafine.
Faafetai le tapuai, faafetai tatalo ma le faamalosi. O se lu‘i tele lea mo alo ma fanau lalovaoa a Samoa, e lē gata i fanau ae o tina o loo mafai ona aoaoina auā se lumanai o si o tatou atunuu pele o Samoa, a o se lumanai o fanau ma aiga o loo nofo tapuai mai Samoa.
Faamatalaga na tuuina mai.
