Ile feiloaiga a tusitala i Niu Sila ma le afioga ile Palemia a Samoa le Susuga Tuilaepa Aiono Sailele Malielegaoi ile Maota o Samoa ile afiafi ole Aso Lua 22 o Novema, faapea David Higgins mai le Duco Events oloo pulea fusuaga a Lupesoliai Laauli Joseph Parker, na faamanino ai ele afioga ile Palemia i lea feiloaiga le fiafia ole malo o Samoa e tuu atoa mai le lagolago ale malo e lagolagoina ai le fusuaga ale alo ole atunuu le afioga ia Lupesoliai Laauli Joseph Parker lea ole a faia ile masina fou.
E iai lona taitonuga ua lava tapena le alo ole atunuu mo lana taaloga ile malosi ile tino mafaufau faapea le agaga. Na faailoa foi ele Palemia ole fusuaga lenei ose fusuaga maualuga ile maimoa ale lalolagi ma ua lua ai foi lea o tamafanau a Samoa i totonu o Niu Sila o lea ua mafai ona ausia lea tulaga maualuga o taaloga o faipeleaga ile fusi ole lalolagi.
Muamua ole afioga ia Toaletai David Tua, lua ole afioga ia Lupesoliai Laauli Joseph Parker. Ma e iai lona lagona ose avanoa lelei lenei e ono mafai ai e Lupesoliai ona ia ausia se tulaga maualuga e ono manumalo ai i lea taaloga.
Ae lē gata i lea ose avanoa lelei foi ole a mafai ona maualuga ai le faalauiloaina o Samoa ile lalolagi mo tagata ole a maimoaina le taaloga e ono maua ai avanoa e asiasi atu ai i Samoa ma fai a latou pisinisi.
Na manino foi ile saunoaga ale Palemia ia Tuilaepa Aiono Sailele Malielegaoi nisi o alo pepese o Samoa le SOL3 MIO ole a latou usuina le vii o Samoa ile taimi ole taaloga, ae o lea foi ua lafo lana tusi valaaulia ise tasi o alo o Samoa ua iloga ile lalolagi i ata tifaga faapea le taaloga ole pii, ia Seiuli Dwayne (The Rock) Johnson e auai mai e tapuaia faatasi le fusuaga a Lupesoliai Laauli ile masina fou.
E ui lava la e lei maua mai se tali o lea valaaulia ae e lototele lava le Palemia e ono maua mai le avanoa o lana malo faaaloalogia lea ile taimi ole taaloga.
Ile osigafeagaiga ale Duco Events ma le malo o Samoa i luga o lenei fusuaga ua faaalia ai le agaga fiafia ole faatonu ole Duco Events le susuga ia Segialii David Higgins i lenei feagaiga, ma ua iai lona lagona ose fesootaiga malosi ole a oo iai le Duco ma le malo o Samoa ma ole a faaauauina pea lea sootaga mo tagata Samoa ina ia faalauaitele ai pea le mafutaga ale Duco ma le afioga ia Lupesoliai Laauli Joseph Parker.
Faatalanoaga – Tui Eti Taualapini & Palemia
Ile faatalanoaga ale susuga ile alii faasalalau ia Tui Eti Taualapini ma le afioga ile Palemia, na fesiligia ai ele alii faasalalau poo ā ni vaega tāua se lua e ono saunoa iai le Palemia ile lagolago malosi ole malo o Samoa ile fusuaga ma faaalu ai lenei tupe tele?
Palemia: A faatusatusa i faamanuiaga oloo maua e Samoa, e laitiiti le tupe lea ua foaiina mai, na ole $100,000 tala Amerika, lea sa faatalosagaina atu, e laitiiti la le tupe lea ua aumai nai lo faamanuiaga e maua mai i tagata e asiasi atu i Samoa ma faaalu ai a latou tupe e tele. Ole mea lea oloo taumafai atu ai foi le malo o Samoa ina ia mafai ona agai atu le toatele o tagata Saina ma palalagi ma tafafao ma nonofo i faletalimalo i Samoa ma atili tele ai lava tupe ale atunuu.
Tui Eti: O e mitamita ile fusuaga auā o lea ua oo mai le tama fanau o lou itumalo?
Palemia: Ioe, ole mea lena, e mitamita uma ai lava le itumalo. E lē gata la ile itumalo ae ole atunuu atoa, auā o lea ua ta‘u ai lava le igoa o Samoa, aemaise ole taimi foi lenei o lea e tau faaletonu mai tatou ile lakapi, ole mea lelei la lea, oloo iai tatou, ole tau faaletonu mai ile isi mea, ae lifi a‘e i luga ele isi mea. Ma ole naunautaiga foi lea ole malo e taumafai uma taaloga e tauaveina ai le igoa o Samoa.
Tui Eti: E malosi lava lou siufofoga. O ai e manumalo ile taaloga?
Palemia: E tatau ona manumalo tatou, e tatau ona mamao lava le tatou malo, e faavae le mea lena ile mea sa ou ta‘ua ile fusuaga a David Tua. E kele a faafitauli ile mea sa feagai ma le susuga ia Toaletai David Tua a‘o fusu ai ile fusi ole lalolagi, ona ole puupuu e faapena foi le pupuu o ona lima. Lea lava sa tatou matamata uma iai ile faigata ona tau aapa i lana paga ona e puupuu, ae ole fusuaga la lenei e umi atu Lupesoliai Laauli nai lo lana paga, ma e uumi foi ona lima ma e lē tatau foi ona uma taamilosaga.
Na maua foi le fesootaiga ale alii faasalalau ma le Minisita o Tupe a Samoa, le susuga ia Sili Epa. Na fesiligia ai foi le Minisita i vaega o taaloga lea e maitauina le tele ole tupe ale malo oloo faaalu. O laugatasia uma ai taaloga ile faasoasoa ale malo?
Minisita: Ile faiga faavae ale malo, e lagolago ele malo le faatupeina, aemaise lava pe a tapena aufili ale atunuu e pei ole au netball, taitoafitu, lakapi 15 ma le Toa Samoa. Ile tuuina mai foi o lenei seleni e lagolagoina ai le faamoemoe o Lupesoliai Laauli Joseph Parker, ina ia faaosofia ai le lagona o mātua ma fanau e iai foi le lumanai manuia e maua i taaloga aemaise lava ole fusuaga, auā e lē o fanau uma e au ile Iunivesite, ae iai nisi o fanau e lauiloa ona o taaloga.
