Ua galulue faatasi nei le polokalame ole Leadership Samoa poo le Taimua Samoa, ma le faatasiga o tupulaga talavou ua faaigoaina ole YouthLead e aapa atu e fesoasoani i tama ma teine talavou o Samoa.
Ole naunautaiga ia mafai ona fesoasoani ile siitia o lo latou tomai ma le silafia ini atinae oloo naunau latou te faia pe a avea ma tagata matutua ma taunuu ai ina avea ma taitai e lē gata i totonu o galuega, totonu o faalapotopotoga, ae faapea foi i totonu o nuu ma ekalesia ma le Malo.
Ole faaiuga ole vaiaso ua mavae ile Aso Faraile na faalauiloa ai lenei taumafaiga ile faatasia ai ole pulega ole Leadership Samoa ma sui o lea aufaatasiga e amata ona faataatia se alafua e mafai ai ona faatino le faamoemoe.
Faaalia ese tasi ole YouthLead le tina talavou le afioga Iliili Lagipoiva Cherelle Jackson, ole faamoemoe sili ona naunau e faatino ole tapenaina o tupulaga talavou e avea ma ni taitai faamaoni, ma ni taitai e galulue mo le lelei o isi tupulaga talavou aemaise ole lelei ai ole atunuu atoa.
E lei ma‘oti mai poo ā tonu taumafaiga o lenei fuafuaga ini polokalame ma ni aoaoga ae na faaalia e Lagipoiva e fia taunuu lava le galuega i totonu o nuu ma afioaga oloo taumamao ese ma le taulaga, aemaise o nuu i tua i Upolu ma Savaii oloo toatele ai le tupulaga talavou oloo galulue i atinae e pei o faatoaga, faigafaiva, poo ni pisinisi laiti.
Sa folasia ele faauluuluga ole Taimua Samoa le afioga Peseta ose taumafaiga tāua lenei ua mafai ona galulue faatasi ai ma nisi o faalapotopotoga tuma‘oti, oloo naunau e faaaupega mafaufau o tupulaga talavou o Samoa ini polokalame e mafai ona latou momoli ai ise tulaga silisili ma maualuga le atinae o aiga, nuu ma le atunuu aemaise ole Malo e ala ile aoaoina ia popoto ma atamamai i tiute faatino ose taitai, ma le faagaioia o atinae ma galuega ise tulaga e mafai ai ona faatuatuaina e tagata aemaise oo latou aiga ile avea ai ma ni taitai aoaoina lelei.
O sui na mua i malae ma faavaeina le polokalame ole YouthLead e mai faalapotopotoga e pei ole Young Women Christian Association, ole 350.org youth advocates, Matai Youth group, Samoa Family Health Association, Youth Ambassadors, NOLA poo le Nuanua ole Alofa youth ambassadors, ma sui taitoatasi ma isi faalapotopotoga tuma‘oti e sefulu i totonu o Samoa.
