Ua lofia le aai tuai o Falealupo i ona matafaga matagofie ma le atu Sisifo e oo atu ile pa sopoia ile itu i Sasae.
Ua matua āia le faga oneone aemaise lava le nofoaga, lea e afua mai ai le muagagana, “E lutia i puava ae mapu i fagalele”. E oo lava foi i maa ia e talitonu lea oloo tuloto e feagai ma le fanua ia Avata.
O maa ia na faapea na totofu ai tamaitai e laga le faisua tele, na mafua ai ona suia le pese e uiga ile tatau ua le tata fafine ae tata tane, ole ato au na aumai i Fiti, na feausi mai ma tamaitai ile vasa loloa ma taunuu ane ai i gatai o Falealupo, e iai le maa lea, ose faailoilo ose talafaasolopito i lea talatuu ole atunuu.
Ua faaalia ile tofa ia Taofinuu Makaalia Lamositele, ailoga a mafai ona fai se laveai inei faailoilo i nei talatuu. E oo lava foi, ile niu lea e faapea na ae ai le tamaitai o Tapuitea, ma ia gali ai le papa, ile nofoaga tonu lea e iai le vai lea e ta‘ua ole vai Salia, ua oo iai le sami.
Tainane se taumafaiga e tanu i iliili ma maa faapea ma oneone matafaga lanulauava, oloo iai lea vavau, na mafua ai le mavaega: “Sau ole a ou alu, ou te tu mai ile vaveao i Sasae e fai ma fetu i Laga, ia faatamasoaliiga ma alofaga ole taeao”. Ua oo lava foi ile fafa o saualii ua asiasi iai le ilitata ma le lima tete, o suiga tetele ole tau. Talofa ile matafaga, i ulu niu ma ulu laau, ile Ava o Puava ma le faga i Fagalele, ua sauaina ile siitai ole tai, ae ua leai ni tagata soifua o toe nofoia lenei nofoaga, talu mai afa tetele o Valelia ma Ofa ma isi afa i tausaga mulimuli ane ai e pei ole afa o Eveni na matua iloga a latou faatamaiaga ma sauaga na olo pala ina ai lenei aai.
Ole molimau foi lea ale tofa ia Vaitogi Isaelu Seumautafa, ose tasi o Tamalii oloo alala i Falealupo tai. Na ia faailoa mai e faapea, afai ae tafea ma ōia faailoilo ole talafaasolopito ma pine faamau i talafaasolopito a lo matou itumalo, ole a matuā faigata tele ona toe maua ni pine faamau, e fai ma maaola i alo ma fanau e faasino i lenei nuu, auā e le gata i lona faalupega, ae o upu faavae a Samoa e manino mai le tāua tele ia Falealupo i talafaasoloipto.
O ona paia e afua mai ile tai samasama o Tuimanu‘a. Ole malae na to ai le faleula ile Malietoa, e afua mai ai le afa loloa, e oo atu i fili ma puletuu na tauilo ai Manu i malo.
E taofi tagata Falealupo o fili ma puletuu ole nofoaga faapitoa lea, na afio ai Nafanua. Ole auala i lenei nofoaga e iai le fanua ua faaigoaina o Falepau.
Ona oo lea ile faitotoa, e iai le ana i Agalega lea na to‘ai iai le sailiga malo ale susuga ile Malietoa ma le susuga ia Su‘a.
E pei ona faalupe ai nei i lona faalupega, Susū mai Su‘a ole maopu o Nafanua ma ole tupu na taausi i Faasalelega. O saafiafiga ile tofa ia Vaitogi, e pei ona ia faaalia ise faatalanoaga.
Na ia faailoa foi e le nao le pau ai lea, o faamanuiaga na maua i Falealupo aua tainane ole itumalo ae o Falealupo ole nuu. E manino i faalupega faavae e faapea, Afio mai Auvaa ole tupu faanofonofo, Afio mai le matua ia Lamositele, afifio mai Maopu ia Solia ma Foaimea.
Mamalu mai lo outou toafa (Fuiono, Taofinuu, Taii, Soifua) ma lau fetalaiga Silia Laei. Faapea ole malu i lauga ia te oe le tapuaiga.
Talanoa le tofa ia Vaitogi oloo taofiofi iu maea pea le mamalu ile toafa i faavae popo, na sau ai le afioaga i taimi ua mavae ma aso ua sola. Ile tulaga lava ia ma lau laau ma togafitiga o gasegase e maoae le ‘oa o laufanua o Falealupo, e pei foi ona silafia ole nuu lenei na uluai faia iai le suesuega saienitisi Amelika tomai faapitoa i sailiiliga o vailaau, e maua mai i lau laau ma pa‘u laau (traditional healing herbal plants).
O lea laau ole mamala, na aumai i Faleaulou ma faia ai sailiiliga faapitoa na gaosi ai fualaau e togafitia le gasegase ole kanesa ma le siama ole HIV e afua ai le AIDS. Ua 90% suega ua faia(test) ma ua taunuu atu ai Alii suesue ma se manatu e faapea ua faamanuiaina a latou taumafaiga mai le pa‘u ole mamala, na to mai ile nuu o Falealupo.
E ui lava inei feuiaiga ma le tele o faamanuiaga ua molimauina e le tofa ia Vaitogi Isaraelu Seumanutafa, ae ua le mafai ona aveesea ai le tulaga moni oloo taoto ai laina kolosi ole gataifale ma i ona fagaoneone e afua i Sasae seia paia Sisifo.
Ua aafia le talafaasolopito atoa ai ma lagi soifua o tala ole vavau i ona pine faamau ma faailoilo ona o suiga tetele ole tau ua molimauina ile afioaga ma le itumalo o Falealupo.
E oo lava ile tulaga vae o Moso faapea le aga o Vaatausili, ua molimauina le tulai mai ai o suiga tetele e oo lava ile nofoaga na mafua ai le upu e au le inai lau a tamaitai ua molimauina, ua tele ina soloi lalo le papa ma punitia ai le gutu ole ana ile agai i totonu o lea
nofoaga.
E iai le talitonuga ile fetalaiga ile tootoo ile taofi nuu o mala faalenatura ma suiga ole tau e pei ua molimauina ua lava ma totoe lea e fai ma lapataiaga o tagata o Falealupo ina ia tapena ma nofouta, i nisi o suiga ogaoga ma le matautia ua leo toe mamao ona feagai lea ma le afioaga.
