Ua tele aafiaga o faigamalaga ile va o Aukilani ma Samoa aemaise aiga ua mae’a ona totogi pasese mo Samoa ile Kirisimasi, ina ua taofia ele Malo o Samoa malaga ale Virgin Samoa ile va o Aukilani ma Apia. E tusa ma le 6000 tagata ua aafia a latou faigamalaga ona o lenei faaletonu.

Ile lolofi atu ole toatele ole atunuu ile ofisa ole Virgin Australia i Manukau mo se fesoasoani ile vaiaso na tea nei, ae faailoa ane ele ofisa, ua tumu uma malaga ia na fuafua e ui atu i Sini ma agai atu i Samoa, e pau le fuafuaga oloo totoe ole toe faafoi mai o pasese ua uma ona totogi.

Na faailoa ele tamā ia Ioane Tui o Magele, ua toe aumai atoa i tua le pasese na totogi mo ia ma lona aiga na totogi ile Virgin. Sa taumafai atu e saili se avanoa ile Air New Zealand, peitai, e taugata atu le pasese na maua mai le Air New Zealand, e le o gafatia ele tupe na totogi ai o latou pasese ile Virgin. Na ta’ua e Ioane, ua sili ai loa le nonofo.

E le na o tagata malaga oloo aafia ile faafitauli lenei, oloo faapea foi ona aafia ai ma ofisa malaga. Na faailoa mai ele alii pule ole Flight Center, ia Sean Benson. E tusa ma le 1000 tagata malaga ale latou ofisa ua aafia ile faafitauli ua tulai mai. Na ia ta’ua foi le faatupula’ia pea o tagata malaga i Samoa i tausaga taitasi.

“O Samoa ose atunuu e fiafia tele tagata Kiwi e tafafao iai ae ole faaletonu ua tulai mai, e le ose tulaga lelei mo le maketi o tagata tafafao i Samoa, aemaise vaitaimi o aso malolo ole Kirisimasi”.  Ole taimi nei oloo taumafai foi le Flight Center e saili ni avanoa mo a latou ua aafia pasese ile Air New Zealand, ae o isi tagata malaga ua toe faafoi  a latou tupe.

Na fesiligia foi le ofisa malaga ale House of Travels e tusa ai ole faaletonu ua aliali mai, na ta’ua ai ele alii o Brent Thomas, ole tulaga masani lava lea ona fai e soo se kamupani vaalele, ole faatau mamao o pepa malaga e pei ona faia ele Virgin, peitai, ole faaletonu e afua mai ina ua poloka e Samoa malaga ale Virgin. Oloo valoia ele House of Travels le siitia ole tau o pasese i Samoa ile lumanai.

Na ta’ua e Thomas le fiafia ole latou ofisa malaga ina ua faalauiloa mai e Samoa lana kamupani vaalele. Sa iai foi le talitonuga, ole a avea le tulai mai ole vaalele o Samoa ole a pa’ū ai pasese i faiga faatauvaga, peitai, ole mea mautinoa o lea ua faaitiitia avanoa e malaga ai tagata mo Samoa, ma ua ia valoia ai le alu i luga o pasese i Samoa ile lumanai.

Na faaalia ele Malo, ua ioe le Fiji Airways, nate tauaveina uma pasese ale Virgin lea ua faaletonu, peitai, ole toatele lava o tagata malaga, e le fiafia e malaga ile Fiji Airways, ona ole umi ole taimi e faatalitali ai ile malaevaalele i Nandi, faatoa toe faaauau ai malaga i Samoa.  E tusia lenei lipoti e lei maua se faamatalaga ma’oti mai le pulega ale Samoa Airways ise fesoasoani mo tagata ua aafia faigamalaga ile taimi nei.

Ole Aso Lua 14 o Novema ile itula e 6pm, ua faamoemoe e faia ai se sauniga faapitoa ile Maota o Samoa i Magele, e tatala aloaia ai malaga ale Samoa Airways mai Aukilani i Apia.

Comments

comments