Fai mai foi o Samoa o le atunuu alolofa toe ola felagolagomai, ae o lea e sa‘o ai le agaga a le tupulaga, ‘e toe ta suti lava e tatou tatou.’
O se mea na tupu i se tasi o tina Samoa i le taulaga faatau o Otahuhu i le aoauli o le Aso Lulu na tea nei pe a o le tea o le itula e tolu, na alu atu ai ma paka sese lana taavale i luma o se tasi o faleoloa, a o lea nofoaga o loo faapipii ai ni faailoilo e faapea, e tow pe loka ma toso ese lau taavale pe a e paka ai.
Na alu lenei mafine e faafoi lana oloa i se tasi o pisinisi, ae foi ane ua loka e le au tusipaka pa‘u o lana taavale, ona ia fesili ai lea i le security pe aisea ua loka ai pa‘u o lana taavale? Tali i ai le tamaloa e sā o ona paka se taavale i o, ae finau atu i ai le fafine e lei atoa se minute na alu ai i totonu, ae tasi lava le tali a le tusipaka e $200.00 e tatala ai lana taavale faatoa mafai ona alu.
Ona oso lea o le fafine ma nofonofo i totonu o lana taavale, ae lei leva ae sosolo atu se taavale laitiiti a se tasi o tamā Samoa ma la tutufaatasi. E oso le tamā lea i fafo e alu e fai lana faatau, ae leai ma se fai i ai o le tina e sā ona paka taavale i luma o le faleoloa lea, ae ua ia tuu lava se‘i fai pe loka foi pa‘u o le taavale a sia toeaina.
E lei leva ona alu le tamā ae toe foi atu ma le lilo i lona manatu le mea ua fai e lenei tina i lana taavale, ua alu finau i le tusipaka pe aisea ua lē loka ai pa‘u o le taavale a lea tamā, e solomuli le taavale a lea tamalii o le a alu ae oso atu le tina lea ma fai i ai, ‘vaai oe e lē o se taufaaleaga, ae na ou alu o‘u finau i le tamaloa security pe aisea ua lē loka ai lau taavale, ae loka na o a‘u’.
O iina na faatoa iloa ai e lea tamā le mea o loo tupu i lea tina ma lona sā, leitioa a nofonofo umi ai i totonu. Sa iloa atu e le security lenei tamā ma alu loa ma talanoa i ai e sā ona paka se taavale i totonu o le nofoaga lea, ma faasino i ai faailoga ua uma ona tusia i ia nofoaga, ma ua laki ia ona e lē o iloa mai e le latou boss.
Na alu fiafia lenei tamā ona ua lē maumau lana $200 ma ua le pa ai ma le pulu a le loomatua lea na utu e fana ai sia toeaina a o tau saili ni lavalava o le Lotu a tamaiti, a o si tina lea na totogi lava lana $200.00 faatoa tatala ai pa‘u o lana taavale ma ua lusi atu ai ma lea seleni.
O le faamanatu foi lea mo le mamalu o le tatou atunuu, i nofoaga taitasi ua uma ona faapipii ai faailoga, e tatau ona tatou mataala ai mo le pakaina o tatou taavale. Ua leai se car park e lē totogia, ma e tatau ona e mautinoa muamua ua saogalemu lou sā a o e lei alu ese, ma ia e siaki lelei poo se nofoaga ua faatagaina mo le pakaina o taavale.
