E matalasi meaalofa, ae tasi lava le Agaga ia, e matalasi foi faiva, ae tasi lava le Alii ia. E matalasi foi mea mamana, ae tasi lava le Atua, o lē nate matuā galue i mea uma i tagata uma lava. Ua faapena le loto gatasitasi ole ekalesia EFKS Northside e pulupululima e lagolago le faamoemoe ole Mafutaga a Tina.
E lei amoina toatasi le avega ale Mafutaga a Tina auā na galulue faatasi vaega taitasi uma ale aulotu, ua le gata ole autalavou, le vaega a Tamā ae faapea foi le faamalosiau ale susuga ile Toeaina Faatonu, ole faifeau foi lea ole Ekalesia, Rev Elder Lauie ma le faletua ia Autalaga Lupematasila. Na matuai faatumulia le nofoaga masani e faia ai faamoemoe tetele i Lawnton ile itu Matu ile po ole Aso Toonai na tea nei, sa faataunuuina ai le po fiafia poo se taumafataga tele na tapenaina ele Mafutaga a Tina Ekalesia ole EFKS Northside.
Ole faletua ia Autalaga Lupematasila, o ia oloo tu ile foe ma avea ma taitai ole Mafutaga a Tina. Na opogi ele toatele o faafeagaiga ma o latou faletua faapea le toeaina ia Rev Lance ma le faletua ia Lite Tautiepa mai le isi Pulega ale Matagaluega a Kuiniselani. E lua Pulega, o Sisifo ma Matu. Ua leva ona tapena mai le mafutaga mo lenei faamoemoe ona ole sailia ose seleni auā meafai ale Mafutaga a Tina aemaise ole fia lagolago ma soosoo tau’au i soo se meafai ale ekalesia.
Na faia siva Samoa e aualofa atu ai susuga i faafeagaiga ma faletua faapea le lautele ole aofia e fesoasoani ai ile faamoemoe ole Mafutaga a Tina EFKS a Northside. Na tauaaoina ele ekalesia le ma’au ole aofia e tusa ma le $22,000 tala ma ona tupu.
Na sioa le auvalaaulia a’o alo le autalavou i faafiafiaga matagofie. Talitonu na faafiafiaina le toatele ile felanulanuai o taumafa, laufofoga fiafia ole ekalesia, ae ole mālie o siufofoga ale faaili ole Island Eagle aemaise le aulelei o tagata uma i lea po ua lē ‘ole lea.
Ole pule ole tausamaaga sa faafoeina le po atoa, ole susuga ile A’oa’o fesoasoani ole ekalesia EFKS Northside, Lupematasila Asotasi Talana’i.
