Faamanatu le 91 tausaga o le tina matua ia Laupa‘u Mo‘aga
soifua mai le aso 27 Ianuari 1919
E tele aso faamanatu eseese e fiafia ai aiga ma uo a o faagasolo aso o le tausaga. Peitai o se tasi lenei o aso e sili ona faatāua i agaga o fanau, pe afai ua ausia e o latou matua poo se tasi foi o matua, ni tausaga se tele o lona soifua a o latou mafuta ai pea. E faapena lagona moni na molimauina i foliga vaaia o alo ma fanau faapea paolo ma gafa e malu ai le tina matua ia Laupa‘u Mo‘aga, a o latou sagai atu e faamanatu le atoaga o le 91 tausaga o si o latou tina matua.
O le tau gaga ifo o le la i le Aso Faraile talu ai, aso 29 o Ianuari, na faataunuu ai lenei aso fiafia, i se taumafataga tele na tapenaina lava e alo o le tina matua ia Laupa‘u. Sa amataina i le sauniga lotu na saunia e le susuga ia Maulupe Fou Mo‘aga o se alo lava e faasino i le tina matua ia Laupa‘u, sa malaga mai i Tutuila Amerika Samoa. Ua malaga mamao foi o ia, ona o le fia mafuta i si ona tuaa i ni nai masina a o lei toe taliu atu i aiga o aumau ai.
Na soifua mai Laupa‘u Mo‘aga i le alalafaga o Saipipi i le Motu tele i Salafai, ae o loo alaala nei i Collinwood i Brisbane.
O le viiga o le Atua le Tamā ona o lana Pule faasoifua i nei tausaga e tele, sa faaalia lea i lo latou sagisagi fiafia e faia mea lelei uma mo ia a o ia maua le malosi ma le soifua laulelei.
E maeu le aao taitai o le Tapaau i le Lagi auā o tausaga o le soifua o Laupa‘u Mo‘aga, ua maofa i le tele, peitai o lona siufofoga mālū ma foliga vaaia e faigata ona mateia ai ua ausia ia tausaga e tele e le tina matua.
E le manaomia e le tina se vaaiga pe a faitau ana tusi, e lelei atoatoa foi lana faafofoga, o itu ia e faamaonia ai le lava saunia ma le tausi matua o le nofoaalo e ala i le tausiga o lona soifua maloloina ma faafualoa ai pea lona soifua ua mafai ai ona laasia nei tausaga e tele, e faigata ona ausia e le tele o nisi o matua.
O le tina ia Laupa‘u Mo‘aga na ia mauaina se meaalofa i luga o le alaleo a le Siufofoga o le Penina o Asuisui 1197 am i Brisbane, i lona avea ai o se tina pito matua ma ua laasia foi le 91 tausaga.
O le faamomoe sa faamanatuina ai le 91 tausaga o le tina, sa faataunuuina lava i le maota o se tasi o le nofoaalo, le faletua ia Lesa ma le susuga ia Loau Vili, ae faapea ona potopoto atu i ai nisi o ona alo aemaise o fanau ma fanau a fanau. Sa felanulanuai taumafa eseese na tapena lava e le aiga atoa.
O nisi o le nofoaalo a le tina matua ia Laupa‘u ma le tamā ia Mo‘aga Su‘a Mo‘aga (ua fai-i-lagi le folauga a le tamā), e aofia ai Pr Alele Mo‘aga ua maliu i Hawaii, Ane Aana Puni, Maulupe Fou Mo‘aga, Iese Mo‘aga, Lesa Loau Vili, Aiaraisa Ilimatogafau Limu, ma Alofa Tauloa Mene.
O le tami nei o loo mafuta lava le tina matua ma le faletua ia Aiaraisa faapea le susuga i le Toeaina ia Ilimatogafau Aukuso Limu ma le nofoaalo, ae tuuasiasi lava i ai le aiga atoa i aso uma o le vaiaso.
Ia manuia tele lou 91 tausaga Laupa‘u Mo‘aga mai le Siufofoga o le Penina o Asuisui-1197am i Brisbane.
