Ua faailoa nei e le nofoaga tutotonu o le faalapotopotoga o fefaatauaiga faavaomalo le International Trade Center, o tina ma tamaitai ua maualuga atu lo latou sao i le atinae o tagata lea e 90 pasene, faatusa i le itupa o alii e na o le 40 pasene.
O ia fuainumera ua faailoa e se sui o lea faalapotopotoga o le pule faatonu le tamaitai o Arancha Gonzalez a o tauaofia le fono a atunuu laiti tau atiae o le lalolagi lea ua tapunia ma ua mae‘a.
I se pepa o faamatalaga mai le Faalapotopotoga o tina faipisinisi i lo tatou atunuu le Samoa Women in Business, ua faaalia ai e tolu ni faiga paaga ua faamautu nei a le faalapotopotoga o tina faipisinisi a le atunuu ma lea faalapotopotoga tele i le lalolagi.
O se faiga paaga o le a saga unaia ai taumafaiga a tina o Samoa e atinae soo se taumafaiga tau pisinisi e fesoasoani ai i o latou aiga aemaise e sasaa atu foi le manuia o ia taumafaiga i le tamaoaiga o le atunuu pe a oo ina tulaga lelei.
Ua faaalia e le Sui palemia le tofa Fonotoe Nuafesili Pierre Lauofo, o se tasi lea o vaega tāua i taumafaiga a tina ma tamaitai faipisinisi o Samoa ma o le faamoemoe foi lea o le Malo ia siitia tulaga i atinae mo tupe maua e manuia ai tina ma tamaitai o le atunuu.
O tina faipisinisi o Samoa o loo latou atinaeina le suauu popo le virgin oil o loo faatau atu nei i le kamupani tele o le Body Shop i Peretania. Faaalia e le Pelesetene o le faalapotopotoga le faletua o Adimaimalaga Tafunai, o se tulaga lelei tele ua oo i ai taumafaiga o lea oloa gaosi ona ua manuia ai aiga o loo latou atinaeina. O aiga lava o loo galulue faamaoni i le gaosiga o le suauu e oo le latou tupe maua i le vaiaso i le $2,000 tala.
O le fono a atunuu laiti tau atiae ua mae‘a nei, sa folasia ai e nisi o faalapotopotoga mai fafo le tele o auala e mafai ona fesoasoani ai i le atinae o tina ma tamaitai i le faia o a latou pisinisi laiti.
O se molimau foi lea a sui o ia faalapotopotoga i le malaga mai i le fono ma latou silafia ai galuega o loo feagai ma le faalapotopotoga o tina faipisinisi o le atunuu, auā e le gata ina latou atinae le gaosiga o le suauu popo ae ua taumafai atu foi i le suauu e maua mai i le fua o le laau o le fetau.
E lei iloga ona tulai mai lea taumafaiga i le taimi nei ae o le faamatalaga a le faletua o Adimaimalaga, e iai le taimi o le a maualuga ai foi le tau ma lelei ai tupe maua mo aiga latou te atinaeina.
O loo atinae foi e tina faipisinisi le maketiina i fafo o le fa‘i pula misiluki lea o loo faafailele le tapenaina o le ave i fafo o lea fua tau faatoaga, i le nofoaga o le faalapotopotoga o loo i Nuu.
