Ua manino nei le tuma‘oti ai o le ekalesia o le Fountain of Salvation Ministry i Niu Sila, ina ua mae‘a le tatala aloaia ai o le latou faamalu i lalo o le taitaina a le Peresetene, le susuga i le faafeagaiga ia Sili Lam ma le faletua ia Mele Lam.
E 9 ekalesia ua mafai ona tutufaatasi ma faavaeina lenei itu o le galuega a le Atua; e 8 o loo i luga nei i Aukilani ma le tasi mai Kalaiesetete. Sa galulue muamua nei aulotu i lalo o le faamalu o le The Pacific Island Assembly of God, ae peitai ua tafa se finagalo i susuga i faafeagaiga ma o latou faletua e tatau ona o ese mai i latou.
O lea sa faia ai loa le tusi faamavae ma tuuina atu i le taitai o lenei ekalesia le susuga i le faafeagaiga ia Oka Muasau, ma agai ese mai ai loa. O lenei fuafuaga sa polokalameina mai lava i le tausaga e 2012.
O le Aso Toonai, 21 o Fepuari 2015 na faatinoina ai loa se sauniga lotu i le hall a le Ekalesia o le Assembly of God i Magele, e tatala aloaia ai lenei faamalu fou poo le Fountain of Salvation Ministry i Niu Sila.
Na valaaulia nisi o susuga o faafeagaiga mai isi tovine faapea aiga ma uo e molimauina lenei faamoemoe tāua. O se aso matagofie i aiga ma ekalesia taitasi ona ua mafai ona latou ausia lenei vaega maualuga o le galuega.
O le susuga i le faafeagaiga ia Esau Leituala na faafeiloai ma faatulima i le mamalu o le auvalaaulia, ae o le faafeagaiga ia Iosefa Tamalii na taitaiina le sauniga.
O le pule aoga aoao o le aoga o le Agape Bible College le susuga ia Peniamina Williams na saunoa i le upu faamalosi a le Atua mo le aufaigaluega aemaise ekalesia e 9 ua patino i ai lenei faamoemoe.
O le tatalo faamanuia na fofogaina lea e le sui taitai o le Assembly of God ia Tafunai ma o loo ia tausia foi le Ekalesia i Mt Roskill.
O le taualuga o lea aso, o le taumafataga, na saunia lava e ekalesia e 9, ma sa faia lava i totonu o le hall na faataunuu ai le sauniga. O le a‘oa‘o ia Fusi Fatialofa sa fai ma Fofoga o le aso aemaise lava faaaloaloga e pei ona taualuga ai faamoemoe faapenei.
O le laulau filifilia o lenei ekalesia, o le susuga i le faafeagaiga ia Sili Lam ma lona faletua ia Mele Lam ua tofia e fai ma Peresetene o loo galulue i Te Atatu. O le Failautusi o Pastor Iosefa Tamalii ma Elisapeta o loo tausia le galuega i Papatoetoe.
O le Teutupe o le faafeagiga ia Misa William Huch ma le faletua ia Faaea o loo faifeau i Three Kings, ma le Taitaifono ua filifilia ai le susuga i le faafeagiga ia Esau Leituala ma lona faletua ia Asoono Leituala o loo tausia le ekalesia i Otara.
O nisi o Ekalesia o lenei pulega, o New Lynn o loo galulue ai le faafeagaiga ia Tapelu Ifopo ma le faletua ia Sina Ifopo. O Glen Eden o le susuga i le faafeagaiga ia Suluape Lotam ma le faletua ia Fale Lotam. O Manukau o le susuga i le faafeagaiga ia Fasia Misiuepa ma le faletua ia Faafou Misiuepa.
O Otara o loo tausia e le faafeagaiga ia Mafi Sape ma le faletua ia Feauina Sape, ma le aulotu e tasi mai Kalaiesetete o loo gaulue ai le faafeagaiga ia Ioane ma le faletua ia Rosalina. Ua saunoa le aao tusitusi o lenei pulega le susuga ia Iosefa Tamalii, ua uma ona faataatitia tulafono faavae o lenei ekalesia ma o le a faatino ai foi le galuega e pei ona tofia ai e le Atua.
