‘O le 70 tausaga, o le tapulaa lea o le soifua o le tagata, ae o le 80 o tausaga, o tausaga ia o loo iai puapuaga ma faigata, peitai o le alofa ma le faamaoni o le Atua ua mafua ai ona maua le malosi ma le manuia ma aulia ai nei tausaga e tele.’
O upu tomua ia na saunoa i ai le susuga i le tausi matagaluega o le Ekalesia Metotisi i Otara ia Iosia Faleupolu e faamalosi ma toe fafagu ai i loto ma agaga o tagata uma sa auai i le molimauina o le atoaga o le 80 tausaga o le soifua o le tina ia Tausa Tuluvao Tausa Futi.
O lana Ekalesia Metotisi i Otara, uo ma ē masani, faapea aiga na lua sa auai i le Greyhound House i Manukau e alaga faatasi le viiga ma le faamanu i le Atua ona o nei tausaga e tele ua aulia mai e le tina.
O le susuga i le faafeagaiga ia Faleu Tausa Futi o le alo matua o le tina sa fai ma fofoga o le aso. O se aso matagofie ma le laufofoga fiafia sa vaaia e tagata uma ua lē gata i le fanau, ae o uo a Tausa Tuluvao i tina ma tamā matutua i totonu o le Ekalesia.
Sa faapea foi ona faafiafia ai ma le ausiva o le La o Samoa, ma le Malu Measina, faatasi ai ma faafiafiaga a le fanau sa momoli ai o latou alofaaga ma faamanuiaga mo le aso soifua o le latou tina. O faaaloaloga sa tu tootoo ai le afioga ia Vui Kamu e fai ma sui o aiga na lua e momolia se leo faafetai mo le paia o le valaaulia sa molimauina le faamoemoe.
O le Afioga Tausa Tuluvao Tausa Futi, na soifua mai i le aso 29 o Aukuso i le tausaga e 1935, ma o le mafuaaga foi lea ua faamanatuina ai lona aso soifua i le Aso Toonai ua mavae auā o lea sa pa‘ū tonu ai le aso 29 o lenei masina.
O lona afioaga o Safotu ma Sagone i Savaii, ae na malaga mai ma le tamā ia Tausa Talafaaifo Futi i Niu Sila i le tausaga 1960 auā le sailiga manuia. E toalima ona alo, e tolu tama ae lua teine, ae o ana grandchildren e silia i le 20.
O laua foi sa auai i le faavaeina o le uluai Ekalesia Metotisi Samoa i Grey Lynn, o ia foi o le failauga tina muamua o le Ekalesia Metotisi i Niu Sila a o avea le susuga ia Kamu ma Peresetene o le Ekalesia faatasi ai ma nisi o tamā. E lē o toe mafai ona faaauauina lona tofi i le taimi nei ona ua lē atoatoa lona malosi i le tino. O se tina e tele lona sao ma lona soifua galue i le lotu, ma e fiafia foi i aoga Tusi Paia, ae toaga ma faamaoni foi i galuega sa galue ai a o maua lona malosi.
E lua ana galuega sa tausi ai lana fanau ma ona aiga, e finau ma faamalosi i lana fanau e o i le lotu, ma o loo mulimuli ai lava ona alo i laasaga ma auaala lelei a le tina i le taimi nei.
E fiafia i mafutaga a tagata matutua e faia i vaiaso taitasi, aemaise o le fiafia e faitau le Tusi Paia, ma o le talitonuga o le fanau, ua mafua ona maua nei tausaga e tele, o le fiafia e maua e le tina ma le fai o le mea e manao ai, aemaise lava o le lotu, auā o le vailaau sili lea ona aogā ma tāua i le soifua o tagata matutua.
