Ua toe tasi nei le vaiaso o totoe o le faigamalaga a le Ekalesia Katoliko a Safotu e pei ona iai i lana malaga taamilo e ala i ana faafiafiaga o loo faagasolo pea i Aukilani.
Ae o loo vaaia pea le agalelei ma le lima foai o le atunuu aemaise o tamafanau a le afioaga o loo i totonu o le mafutaga i Niu Sila i le tausiaina ma le lagolago i le faamoemoe na tauasa mai ai lenei Aufaipese.
O le po o le Aso Tofi, 23 o Oketopa na toe faataunuuina ai foi se isi fiafia ma se taumafataga i le hall a le Ekalesia Katoliko i Onehunga, ma o lenei faamoemoe na tuufaatasia lea e le tofa ia Faimalo Muliagatele Allan Stowers ma le kamupani o le Pacific Ezy Money, Galumalemana Tai Galumalemana ma le faletaavale o le G-Mana, Leilua’s family, Sonia Puipui Fatu’s family faapea le faletua ia Faga ma le fale‘aiga o leTalimanao.
O le auga ma le faamoemoe autu o lea Dinner, o se po faapitoa e fiafia ma mafuta faatasi ai le aumalaga mai Samoa ma le mafutaga a le afioaga o loo i Aukilani aemaise o ana lupe faalele o loo tu i matagiolo i le talalelei a le Atua.
E 30 laulau sa fuafuaina, e to‘a 8 tagata i le laulau e tasi, a o le isi 5 laulau sa faaavanoa lea mo le aufaipese. O se po lagilelei i le alofa o le Atua, ma sa vaaia ai le fiafia o nai tamā ma tina matutua, o aiga uo ma ē masani aemaise o afioga i Patele sa auai uma i lea taumafataga. Sa faapea foi ona faatasi atu i ai ma le susuga i le faafeagaiga ia Rev Aleki Leauanae ma lona faletua ma nisi o faalapotopotoga o le Vatikano ma Malisi e tausoa faatasi lenei faamoemoe.
O le fofoga o le po o le tofa ia Faimalo Muliagatele Allan Stowers, ma sa tatala le polokalame i le tatalo a le afioga ia Patele Michael Enderman, ona saunoa loa lea o le tofa ia Faimalo e faafeiloai le mamalu o le auvalaaulia.
Na tomua faafiafiaga i le pese a le aufaipese a le Ekalesia mai Safotu ma faagasolo ai loa ma le polokalame o le po.
Na malie i le maimoa ma le faalogologo a le auvalaaulia i le fesuisuiai o faafiafiaga i musika a le DJ, le tofa ia Seumanu Francis Ioane, faapea le alii faatinoiti o Mautoatasi ma lona leo tagitagi, a o le toe fafagu mai o fatuga tuai a le susuga ia Willie Tavita ma le fa‘ili o le Fiafia Band.
Sa maua foi le avanoa e faafiafia ai le Nato Brothers i nisi o ana pese fou o loo iai. O le Vatikano, ma le Malisi ma nisi o auaiga sa iai sa faia a latou siva Samoa e tauala lava i nisi o tamafanau o le afioaga.
Na tatala faasoloatoa le siva e pei lava o le fale faafiafia, ae sa mataina ai lava le faiga o vae o toeaiina ma loomatutua, ma ua maua ai foi se faamalositino auā ua ova le tausami i le manaia o kuka felanulanuai a le Pacifi Ezy Money.
Na faamatafi le po i le saunoaga a le afioga a Patele Felise Lemi e momoli ai lana faafetai i le mamalu o Samoa potopoto sa auai atu, faatasi ai ma le saunoaga mulimuli a le tofa ia Faimalo Muliagatele Allan Stowers i lona agaga faafetai mo i latou sa tuufaatasia lenei polokalame ma tauaao atu i ai ma ni teu fugalaau e talimasineia ai lo latou tautiga i lenei faamoemoe.
Ma o le taimi lava lea sa tuulima atu ai ma le seleni $7,500 i aao o le failautusi o le mafutaga le faletua ia Gaono Lusia Smith auā le aumalaga, ae $1,000.00 sa fai meaalofa ai mo le aufaipese a le Nato Brothers.
O le susuga i le faafeagaiga ia Rev Aleki Leauanae mai le EFKS i Kelston na saunia le tatalo mulimuli e faamae‘a ai le polokalame ma tatala ai loa le filialii.
