E eseese lava faiga ae tumau lava lona faavae, e eseese foi lona faatinoina ae tumau lava le tāua ole feau momoli oloo auina mai ai. Ile tatou iai la ile tapenaga ole Kirisimasi, ma le tausaga fou i lenei tausaga, ole tasi lea faailo i tagata kerisiano uma i totonu o Aukilani ole polokalame lenei o Pesepesega ole 13 aso e pei ona sa faatinoina ai ai ele Ekalesia EFKS Puaseisei Magele i Sasae, mai le tele o tausaga.
Ma o nei tausaga uma talu ona amata mai lenei faamoemoe e vaaia ai lava le faatumulia ole malumalu ole ekalesia EFKS Puaseisei i taimi faapenei o i latou e agai atu ma molimauina le tāua o pesega ole Kirisimasi mai i aulotu taitasi ua filifilia latou te molimoliina feau ole Kirisimasi i lea tausaga ma lea tausaga.
Ile tāua o lea polokalame oloo mafai ona molimauina ai taleni ma meaalofa oloo i tagata taitasi e ala lea ile faatinoina o tala ole Kirisimasi faapea o latou siufofoga mālie oloo faaaogāina mo viiga ile Atua.
Ole tele lava la o tausaga, auā o lea ua savali ile valu tausaga talu ona faatinoina lea faamoemoe, e 13 aso atofaina lava e pepese ai aulotu taitasi i lea aso ma lea aso, a‘o lenei tausaga ua faaitiitia ifo ai i lalo le aofai o aso ua faatinoina ai lenei faamoemoe ona oloo nafa le ekalesia ma le galuega tele ile fausiaina ole malumalu tapuai ole Atua. Ile amataina ai ole suiga fou i lenei tausaga ose vaaiga ese lea ua sili ona maitauina ile maimoa ma le faafofoga a tagata sa molimauina le amataina ma le tatalaina aloaia o pesepesega ole Kirisimasi, e pei ona tatala aloaiaina ai ele aulotu Anglican Church Lotu Vakaviti Community Church mai Onehunga. Ua ese foi le faaaogāina o lea ekalesia o auala e ono kiliva ai le feau tāua ole tapenaga ole Kirisimasi, e pei ona latou faatinoina ai le faitauina o le Tusi Paia ile gagana Fiti, gagana Samoa, ma le gagana Peretania faatasi ai ma le lagiina o pese i nei lava gagana e tolu.
Ae lē gata i lea ua mafai ona galulue faatasi ai tagata uma lava e pei lava ole faatinoina ole sauniga ile Aso Sa e pei ona masani ai tatou, e faitau faatasi le Tusi Paia, o le usuina o pese faapea le faatinoina ole tatalo auā sa ta lelei lava le latou polokalame atoa ae tufa i tagata sa iai i lea afiafi ole Aso Sa.
Ae na faailoa se finagalo ole susuga ia Rev Victor Pouesi ile suiga ole polokalame i lenei tausaga, pe iai se faamoemoe e toe foi ile 13 Aso e pei ona amata mai ai le polokalame, pe ole a faaauau pea le suiga fou lea ua iai lenei tausaga?
Ae na saunoa manino le faafeagaiga, talu ai ona ole toatele o aulotu oloo faatalosagaina le fia auai pea ile polokalame i tausaga taitasi, oloo iai la se lagona e ono toe foi ile 13 aso e pei ona amata mai ai, ae iai foi se isi lagona, ole taimi foi lea e toe fetuutuunai ai muniao i finagalo ole ekalesia poo fea le mea e sili ona fai.
Auā e moni lava oloo misi aso e ono ile polokalame i lenei tausaga ae oloo iai foi le isi faamoemoe ole ekalesia ile aso 24 o Tesema e tuufaatasia ma aoaoina ai ni meaalofa e tufatufa mo i latou oloo fia maua se fesoasoani, ma e lei tupu muamua lea galuega lelei mo nei tagata vaivai.
Ise lagona faitoatasi lava la ole susuga ile faafeagaiga ia Rev Victor Pouesi, e ono aumai le polokalame fou lenei ole 7 aso o pesepesega e faaauau pea ae aoao mai ni meaalofa e ono tufatufa mo tagata oloo fia maua le fesoasoani auā ua talafeauga lelei ma le vaitaimi o faigameaalofa, ae a leai, ole a toe foi lava ile 13 aso e pei ona masani mai ai.
E lei maoti lelei mai se finagalo mautu ole faafeagaiga mo le toe faagasoloina ole faamoemoe ile lumanai, ae ole a fai mea faalogologo lava ile faasinomaga ale Agaga Paia ole Atua faatasi ai ma se finagalo autasi ole ekalesia, auā le faaauauina o Pesepesega ole Kirisimasi.
E lē o iai se eseesega tele o tapenaga ole 13 Aso ma le 7 Aso e pei ona iai i lenei tausaga, ua na ose suiga laititi e pei ona tapenaina ai nei faigameaalofa.
Faatasi ai ma aufaipese oloo aumai i Samoa e fai foi so latou sao ile polokalame i tausaga taitasi.
