O saunoaga a uluai tuaa sa mua i malae i le Talalelei ona o le faanaunauga ina ia aua ne‘i motu le gafa o le aiga i le tala‘iina o le talalelei e iai le uiga o le igoa o le Au Salamo, ona o le tele o lupe faalele o alo ma tamafanau a le aiga ua faaaogā le soifua e tala‘i ai le finagalo o le Matai.
O le viiga ma le faamanū i le Atua ona o lana tausiga i nai toe ulutaia o le aiga o loo maua pea le soifua laulelei i le tina matua ia Peka Petaia, faapea le Toeaina Penisione Faaeaina Manumalo ia Rev Samuelu ma le faletua ia Tima Tuiai, o i laua na uluai faavaeina le Ekalesia EFKS i totonu o Brisbane nei.
O mataupu faamamafa lava ia e talosia i fonotaga uma o alo ma fanau ua ofoina le soifua i le galuega tala‘i, o soifua o nai mātua matutua faapea alo ma fanau i aoga ma Iunivesite faapea taaloga e pei ona iai i le Au a le QLD REDS, faamanuiaina i tulaga tau Musika aemaise i latou ua faamanuiaina i galuega tau loia i totonu o matagaluega a le malo o Ausetalia ma nisi lava vaega ua faaeaina ai le tele o alo ma fanau a le Au Salamo.
Ua (105) selau ma le lima i latou na faamauina sa auai i le lotu o lenei tausaga 2012, pe a faatusa i le tausaga ua tuanai sa lei atoa se selau. Sa taitaia le sauniga e le susuga i le Toeaina ia Rev Tauaaga Mataafa. O talosaga faafetai sa fofogaina e le faafeagaiga asiasi mai Niu Sila ia Rev Ieriko Sopoaga.
O le Talosaga o Faatoesega o le faletua o le A‘oa‘o Fesoasoani o Taalolo Anae Leleiga Tu‘ifao. O le Tatalo o Manaoga o le faletua ia Senerita Mataafa, o le faletua o le Toeaina Taitai.
O le Faitauina o le Tusi Paia, o le tamaitai o Tasha Sautia (Feagaiga Tuai) a o le Feagaiga Fou o C.J Sopoaga. O le Aoina o le Taulaga o le tamaitai o Tima Mataafa ma Salamo Anae Leleiga. O Viiga o le sauniga sa taitaia e Fuatia Sailimalo Petaia faapea le susuga i le faafeagaiga ia Rev Petaia Tu‘ifao.
O lupe faalele a le aiga sa ofoina soifua mo le galuega a le Atua e aofia ai le Toeaina Penisione Manumalo Faaeaina ia Samuelu ma le faletua ia Tima Tu‘iai, sa uluai asaina le gasū o le taeao i le Ekalesia EFKS i Brisbane i le tele o tausaga ua tuanai, faapea le toatele o i latou ua momoe mai tiasā.
O i latou o loo galulue pea i le taimi nei o le susuga ia Rev Tauaaga ma le faletua ia Senerita Mataafa o loo la tausia le Ekalesia EFKS a Southwest o i laua foi o loo taitaia le Pulega EFKS a Saute.
O le susuga ia Rev Lance faatasi ma le faletua ia Lite Tautiepa o loo la tausia le Ekalesia EFKS a Westside o le pulega a Sisifo.
O le susuga i le faafeagaiga ia Rev Petaia ma le faletua ia Sarai Tu‘ifao o loo galulue nei i le Ekalesia EFKS a Saute.
O le susuga ia Rev Ieriko ma le faletua ia Mata sa galulue i Alamagoto peitai ua malaga ane i Dunedin i Niu Sila ona o sailiga gasegase, ae sa mafai ona auai mai i le lotu o lenei tausaga.
O taumafataga sa tapenaina lava e le aiga, ona alo lea i faafiafiaga sa faaalia ai taleni ua faamanuiaina ai alo ma fanau. Na faaiuina i le fonotaga e soalaupule ai le lelei atili ma le manuia o le alualu i luma o le nofolelei o aiga, ma faia ai loa le palota.
Ua toe tulai mai lava le laulau tuai e toe taitaia le tofi i le isi 3 tausaga. Taitaifono – Maiava Tutasi Manusina; Failautusi – Anae Leleiga Tu‘ifao; Teutupe – Liliuese Anae Maa Tu‘ifao.
E tolu ona lala e pei ona amata mai Samoa o le isi o loo i Niu Sila faatasi ma le lala lenei ua savalia nei le ono tausaga talu ona faavaeina i Kuiniselani e pei ona amataina e le Toeaina Penisione ma le faletua Rev Samuelu ma Tima, faapea le toe ulutaia le tina matua ia Peka Petaia ma le loaloa o le aiga aemaise o lupe faalele ma faletua.
Ua 110 tausaga o le lotu talu ona faatū mai Samoa e tuaa ua momoe mai fai i lagi folauga.
