E olaola pea nisi o muagagana ma upu a le atunuu, “E momoe ma manū ae sau mala e atia‘e”. E ui lava foi ina malu-alii le tapuaiga a le mamalu o Samoa i nisi vaega o le atunuu, peitai e moni ai a upu o le Tusi-“A TIGĀ LE VAE POO LE LIMA E LOGO UMA AI LE TINO ATOA”.
E le o toe po foi malaē aua ua logo i tuluiga uma o le lalolagi le tulaga mafatia o si o tatou atunuu pele aemaise o nai aiga loto faavauvau i le motusia faafuasei o mafutaga ma aiga ua maliliu.
E toatele le mamalu o le atunuu o alaala i Kuiniselani ua malaga atu i Samoa ona o le faamavae atu i nai o latou aiga ua motusia faafuasei mafutaga.
Na molimauina le fesoasoani malosi o le ofisa malaga lauiloa, le Sina World Travel le susuga ia Steve ma le faletua ia Patricia Sevele e fesoasoani mo nai o tatou tagata e ala i pasese ma tusi folau, na mafua ai ona vave maua avanoa o isi e malaga atu ai i Samoa.
Na usuia se fonotaga i le nofoaga o le leitio 4EB 98.1FM i le po o le Aso Tofi, 1 Oketopa ma sa faatumulia i le mamalu o tupu ma tamalii ma failauga, faapea taitaifono o mafutaga eseese, aemaise le au faipisinisi ma faatonu o isi leitio e tolu.
O lea fonotaga na faaiuina ma a‘e ai se tofā i se sailiga seleni, ma ua maea nei ona faataunuuina leitiofoni e pei ona sa feagai ai ma nei alaleo e 4 i totonu o Kuiniselani.
O le leitio a le 4EB 98.1FM o loo avea ai le susuga ia Savea Levale Lio ma Faatonu, o le Siufofoga o le Talalelei 1701AM o loo nafa lea ma le susuga ia Terry Filimaea Fauea ma le fetalaiga ia Patea Taefu, o le leitio a le Penina o Asuisui 1197AM, o le Faatonu o Fiu Tamala Malatai Fiu, ma le Siufofoga o Tagata Pasefika 997FM o loo faafoeina e le susuga ia Seinafo ma le faletua ia Mulitalo Tauline ma le susuga ia Faasavalu.
O le seleni ua faamaopoopoina nei e le paia ma le mamalu o Samoa i Kuiniselani, e tusa ma le $53,000.00 Ausetalia. Faamoemoe o le amataga o Novema o le a fuafua e tauaaoina atu ai lea seleni aua le manaomia mai Samoa.
Sa molimauina le lagolagosua o susuga i Faafeagaiga ma ekalesia eseese, au faipisinisi ma leitio, le mamalu i mafutaga ma fono i Kuiniselani ma le lautele o le mamalu ma le paia o le atunuu i lea faamoemoe.
Sa iai nisi o pisinisi sa faimeaalofa e ala i mitiafu e auina mo i latou sa foai e pei o le Enchiro Laei ma le Island Freights -Galumalemana Harry Timoteo & Apu ma le nofoaalo, faapea le susuga ia Niko ma Ruth Burgess o le Runik Polenesian Town e ala i laptops sa foaiina ma nisi lava o faipisinisi ma le lautele o le atunuu.
O le komiti sa filifilia faapitoa e faamaopoopoina le seleni mo lea faamoemoe e aofia ai:
Peresitene: Afamasaga Fereti Mu’a
Failautusi: Sala Brunt
Teutupe: Ianeta Hadsfield
Sui o le Komiti:
Teresa Buttler
Elisabeth Hunt
Nigel Hunt
Emma Puletiuatoa
Lemalu Felise
Niko Burgess
Galumalemana Koleta
Patricia Slade Sevele
Lorry McMahon
Talosaga Nonu
Marina Tuautu
Taefu Patea Taefu
Tapuala Taufaalelei
Leaupepe Aiono
