Ua pale mai nei le tamaitai talavou o Maree Angelica Wright, i le tofi o le Miss Samoa Niu Sila poo le Tausala Lalelei Samoa o Niu Sila, mo le 2010-2011.
E lei faigofie le galuega sa feagai ai ma faamasino auā sa tau fai matagofie ma lava saunia uma tapenapenaga a tamaitai tauva, aemaise o le lalelei o tamaitai uma. Peitai o le upu masani lava, e lē mua uma ni vaa.
E toafitu ni tamaitai lalelei sa faataunuuina lenei polokalame i le po o le Aso Toonai na mavae atu nei, ma sa faatumulia foi le Telstra Clear Pacific Events Centre i lenei faamoemoe i le mamalu ma le paia o Samoa i ē na auai atu e molimauina ma lagolagoina lenei faamoemoe matagofie.
O tamaitai nei sa faataunuuina le tauvaga Tausala mo lenei tausaga 2010:
O Toaiva Gloria Burnadette Fuatino Malufaitoaga, na lagolagoina e le kamupani faatau taavale a le G-Mana Wholesale i Papatoetoe.
O Sharon Leatigaga, na lagolagoina e le kamupani (JICS Sreen Printing Ltd). O Grace Tinetali-Gafa, sa lagolagoina e le Island Pearl Limited.
O Nyah Unasa Laufiso, sa lagolagoina e le Pasefika Finance. O Helene Tamasese-Tiatia, sa lagolagoina e Tamasese-Tiatia Family.
O Miriama Siolo Fiu Aloese, sa lagolagoina e le MBrace Pacific Dance Group, ma Maree Angelica Wright, sa lagolagoina e le Paula Chan Designs.
E lima vaega ma‘oti sa tauva i ai tamaitai faatasi ai ma nisi vaega e pei o le Friendship, Personality ma le Photogenic.
O le tulaga i le Miss Friendship na manumalo ai le sui tauva lona 7, le tamaitai o Maree Angelica Wright.
O le Miss Personality na manumalo ai le sui tauva lona 2, le tamaitai o Sharon Leatigaga. O le Miss Photogenic na manumalo ai le sui tauva lona 4, le tamaitai o Nyah Unasa Laufiso.
O vaega ma‘oti e lima o le tauvaga e iai le Laei faa-Samoa moni (Traditional Native Wear), Laei Taele (Sarong Wear), Taleni (Talent), Puletasi, ma le Taliina o Fesili (Interview).
Sa faigata ona fai faaiuga a faamasino ona o le mataina o faaaliga a tamaitai sa tauva, peitai na matuā sola lava ma aoao tetele le fu‘a a le sui tauva numera 7 i lona manumaloina o nei vaega uma o le tauvaga.
O se tauvaga mataina tele auā sa tulaga ese mai lava le faatinoina o vaega ma‘oti o le tauvaga e le tamaitai o Maree Angelica Wright, lea la ua faapaleina ai nei Maree e avea ma Tausala Lalelei Samoa o Niu Sila o le tausaga 2010 i le 2011.
E talitonu o ni faaiuga sa faia ma le faautauta ma le faamaoni lea ua faaeaina ai nei le tamaitai o Maree Angelica Wright, ma ua avea ai loa ma Miss Samoa New Zealand 2010-2011.
Ua 17 nei tausaga talu ona amatalia le polokalame lenei, Tauvaga Tausala Lalelei Samoa o Niu Sila.
O le 17 ai foi lenei o tausaga talu ona faagasolo pea le faataunuuina o le tauvaga lenei, i le sailia ai pea o se tamaitai e agavaa lelei mo lea foi tauvaga o loo tausinio pea i ai alo tamaitai Samoa i lea tausaga ma lea tausaga.
Ia o le 17 ai foi lenei o tausaga sa tauaveina mai ai e le afioga ia Sala Sally Newsham le tulaga o le faatonu o lenei faalapotopotoga mo le faataunuuina o le polokalame Miss Samoa Niu Sila i Aotearoa nei.
Sa tulaga ese foi la le polokalame i lona faagasologa auā na faamamafaina ai le faamanatuina o galuega lelei uma sa mafai ona faatinoina ma faataunuuina e le afioga a Sala Sally e tusa ma lona tulaga sa ia tauaveina ai lenei polokalame i le 17 tausaga ua mavae atu nei, aemaise ai foi le faamavae aloaia ai o Sala Sally Newsham ina ua faalauiloa mai lona malolo mai i ona tofi i totonu o le faalapotopotoga Miss Samoa NZ Pageant.
Sa vaaia foi la loimata maligi o le fiafia, faafetai ae toe faanoanoa ona pe a mafaufau ma manatunatu pea i le fita ma le faigata o le ala sa uia ma faafitauli sa fetaiai ma feagai ai i taimi o le tauasaina mai mo se lelei o lenei polokalame, e pei ona ua iai nei aemaise o le agai atu pea mo le lumanai.
O vaaiga masani lava auā e talitonu sa matuā faamalieina foi le maimoa ma le matamata a si o tatou atunuu i le matagofie ma le lalelei e lē gata i tamaitai sa tauva, ae na mataina foi le lava tapena ma le teuteuina lelei o o latou laei faatulagaina auā lava le faamoemoe i le sailiga o se tamaitai lalelei mo lenei foi tausaga.
O le susuga i le faafeagaiga Rev Ionatana Pouli-Lefale sa na saunia ma fofogaina upu faamalosi ma faamanatu e tusa ma le faamoemoe, ma na ia saunoa faamamafa ai lava i le faatāuaina o le ola i le Atua, savavali ma le Atua ma ia tautuana le Atua e manuia ai soo se faamoemoe ma soo se moemitiga mo le lumanai manuia o soo se tagata.
Na atili matagofie ma mamalu foi lenei faamoemoe auā sa auai mai i ai le Sui Palemia o si o tatou atunuu le Afioga Hon Misa Telefoni, ma o ia foi lea sa saunia ni upu faalaeiau mo i latou sa tauva i lea po.
Na saunoa faafetai foi le Sui Palemia ma momoli le faamalo i le afioga a Sala Sally Newsham e tusa ma lana galuega sa totōina ma faafaileleina mai ai lenei polokalame i totonu o le 17 tausaga ua mavae atu nei.
O le afioga foi ia Misa Telefoni o le taitaifono lea o le faalapotopotoga lava lenei i Samoa. Na mae‘a saunoaga faapitoa o le po ona faafiafiaina foi lea o le aofia i le saasaaga faa-Samoa a le tamaitai o Christina Faafili, o le Miss Samoa Niu Sila o le 2009-2010.
Na saunoa foi le tamaitai o Christina ma momoli lana faafetaid tele ma le faamalo i le tapuaiga a le atunuu a o alo faiva i ona tiute i le avea ai o ia ma tamaitai lalelei Samoa o Niu Sila o le 2009 i le 2010.
Saunoa Christina i le tele o lona foi a‘oa‘oina ua maua mai i le avea ai o ia ma Miss Samoa Niu Sila, ma o lona talitonuga o se faamoemoe tāua tele ma le lelei lenei polokalame auā o se avanoa lē aumaua foi, ae tele ma anoanoai ni mea aogā e mafai ona maua mai ai.
Sa na faafetaia tele foi nai ona aiga uma, o si ana faifeau ma le ekalesia EFKAS i Wiri, o i latou uma lava sa lagolagosua malosi i lona tulai mai, ia ae faasili lana faafetai tele i nai ona mātua ma le Atua ina ua faaiuina ma le manuia lona tulai mai e avea ai ma Miss Samoa Niu Sila.
Na faaalia le agaga faafetai ma le loto fiafia o le tamaitai o Maree ina ua faapaleina ma faamanuiaina i lenei laasaga fou i lona soifuaga. Sa na tautino foi o le a ia tautua ma faatino tiute uma ma le faamaoni, alofa, faaaloalo aemaise ia atagia ai le alofa o le Atua i soo se mea lava o le a ia auai atu i ai e tusa ma le faatinoga ma le faataunuuina o polokalame uma e ala i lona valaauina.
Sa faaalia foi le matuā fiafia tele mātua o le tamaitai o Maree, le susuga Mark Wright ma lona faletua o Makerita Wright, aemaise lava si ona tina matua sa auai atu lava i lenei faamoemoe ona o le tapuaia o le alo faiva o si ona alo i le Tauvaga Tausala Samoa o Niu Sila i lea po.
O le viiga sili o le Atua ia toe faafoi, ina ua faataunuuina foi lenei faamoemoe ma lenei polokalame i lona alofa ma le manuia e aunoa ma ni faafitauli.
