50 Tausaga Iupeli Auro EFKS Otara

O le alaga a le faisalamo a Tavita, ‘se mea ina a lelei o uso ae nonofo faatasi’, a ‘o lupe foi sa vao eseese a ua fuifui faatasi’. O le vaaiga matautia lea sa iai le faamanatuina o le 50 tausaga o le ekalesia EFKS i Otara i le Aso Lulu e oo i le Aso Sa, 5 – 9 Mati, i le toe mafuta ma talatalanoa faatasi o tamafanau a le ekalesia o loo aumau i isi atunuu aemaise o i latou o loo galulue i isi tovine i totonu lava o Niu Sila nei. O le uluai po o le faamoemoe, Aso Lulu, na amata lava i le sauniga lotu na taitaia e le susuga i le faafeagaiga ia Rev Tanielu T. Mamea, ona tuu atu lea o le avanoa i aiga taitasi e faalauiloa ai le vaitaimi na lolotu ai ma le faifeau sa latou mafuta, na mae‘a le faamasani ona fai lea o taaloga, o le pele suipi, mu, ma le ping pong a le fanau, na faaiu le po i le iputi ma tofafa ai i le maota o le matagaluega, a o nisi lava na tuuaoina i le toe faamanatu o aso ma taimi a o lolotu faatasi.

 
O le Aso Faraile na faataunuuina ai loa le po fiafia ma faafiafiaga. Na tatala le polokalame i se faamalosiau mai le afioga Paia a le Atua e ala i le mafuta ma le nonofo faatasi o se aiga. Na saunia lava e le tamā o le galuega, Rev Tanielu T Mamea, ona sosoo ai lea ma faaevagelia, mauluulu, sāsā na tapenaina e le tupulaga talavou. Na faaiu le afiafi i le ‘ata i le mālie o le ausiva maoae a faafafine o le Pearl of Magnesianz mai Rarotonga, ae faaiu ai foi i le iputi ma faasoifua ai lea po.

 
O le taualuga o le faamoemoe o le tapuaiga tele na faatinoina i le Aso Sa, ma le tutuina o moliga‘o e faamanatu ai i latou ua fai i lagi le tuligasi‘a, o ē sa tofu sao uma i le malaga o le faatuatua a le ekalesia EFKS Otara. O se sauniga mamalu lona faagasoloina, aemaise o le taimi na tutu ai moliga‘o i le fetagisi o tagata i le misia o tamafanau a le ekalesia. Na auai ai foi le afioga i le alii Faipule, Tofa Su‘a William Sio ma nisi o lona auaiga faatasi ai ma lupe faalele a le EFKS Otara o loo galulue i isi fata faitaulaga. Na faaiu le polokalame o le Aso Sa i le toonai na saunia, e lē taumalae faapea le tipiina ma le lufilufiina o le keke na tapena e le tina o le galuega ma ona alo.

 
Le molimau a le susuga i le faafeagaiga, Rev Tanielu T Mamea. E fia ta‘ua, o le sini aoao o sauniga o le faamanatuga o le 50 tausaga talu ona faavae lenei aulotu EFKS i Otara, “O le Atua le Agaiotupu”. Ma o le manulauti lea ua valaauina ai le usoga i Otara ina ia lagi vii ma lagi solo, patipatia ma faapaleina le Matai o le Galuega i le mamalu ma le viiga, ma ia ‘aua lava ne‘i ia te i matou faapei o la le fatupese Eperu, auā o Ia e toatasi le Agaiotupu ua tuta ai i nuu tau le malaga o le faatuatua ua aulia ai lona 50 tausaga, talu ona faafailele le fua o le sinapi.

 
E faamataitusi lenei tusiga ma le manatua o le agaga faafetai i le Atua ona o uso a Toeaiina o le Upu ma le Sakarameta, Auauna Faifeau ma Faletua ma auaiga, o ē na mua i malae i le tala‘iga ma le tau asaasaina o le taeao asa gatā o amataga fou o soo se faamoemoe. E faapena foi ona tumau e lē mafai ona soloiesea le loto faafetai ia i latou na latou uluai totō ma faafailele le fatu, le ‘au faatuatua o le EFKS i Otara i augatupulaga, i latou uma na tofu sao i soo se ala mo le atina‘eina o lenei aulotu, o ē ua fai i lagi, i latou ua tuua le mafutaga ma malaga ese atu i tafā o sailiga, aemaise le usoga ia Keriso o loo tali mau pea ma matou galulue e oo mai i nei ona po.

 
O la outou faapolopolo ma le taulaga lea i le Atua, ua avea ai a‘u ma tusiupu e tusia lo outou faasolopito i le agaga maulalo ma le loto faafetai i le Atua, ona o la outou ave mo le Ia, le nuu sa le‘i avea ma nuu. E lē galo foi le agaga faafetai i le tapuaiga ositaulaga a le Ekalesia faa-Tina i le aoao o le EFKS, auā o oe lava o le to‘ala faa‘autama o le fatu na sunu‘i o le faatuatuaga, lea ua laasia ai e au tamafanau atu vasa o lanu ma gagana, ma usi ai le āu i le matagi e tusa o le malelega a le Ao o le Ekalesia ina ia fai nuu uma lava ma so‘o.

 
Mulia‘i ae lē itiiti ai, le loto faafetai i le tu‘itu‘i malofie a nai o matou aiga, uo ma aumea mamae i la outou tapuaiga ma moomooga lelei atoa ma faamanuiaga, a o ala le le mafua i le ola tapuai ma auauna atu i le Matai o le Galuega i totonu o le EFKS i Otara nei. Faafetai tatalo. O le aso 1 Mati 1964 na faatuina ai le EFKS i Otara ina ua mavae ona faatuina le uluai lotu Samoa i Leighton/Sussex Street i Grey Lynn ia Tesema 1962. O le Susuga lava i le Tamā Toeaina ia Siaosi Ieriko na faia le sauniga na faavaeina ai. E to‘a 8 i latou na amataina lenei aulotu. To‘alua tiakono o Avauli Galu ma Sofeni Fonoti, toafā tagata faaekalesiaina, Toalepai Togi Losia, Fianiusila Galu, Malama Fonoti ma Kuini Losia, ma tamaiti e toalua o Max & Evelyn Galu.

 
E oo mai i le 50 lenei o tausaga, ua maliliu le toalima, a ua toe o le tina ia Kuini, Max ma si ona tuafafine o Evelyn o loo soifua pea. Aso 8 Ianuari 1965, osi feagaiga le aulotu ma lo latou uluai faifeau, le Susuga ia Ofisa Nuualiitia ma le faletua ia Litia, na avea ma faifeau Toeaina mulimuli ane i le Matagaluega Niu Sila i Mātū. O ona po ia na fausia ai le uluai falesa e faatatau lava i tulaga tau amata ma le faitau aofai ia ona aso. Iulai 20, 1971 amata le galuega ae faaulufale i le aso 30 Tesema o lena lava tausaga, a o le aso 25 Setema 1973 na tatala ai le feagaiga a le aulotu ma le faifeau.

 
Novema 3, 1973 osi feagaiga ma lūlū aao le ekalesia ma lona lua o ana faafeagaiga, le Susuga ia Aneterea Polataivao ma le faletua ia Olita. O o laua taimi na fausia ai le Hall sa faaigoa o SAMOANAGALO, lea na amata fausia i le aso 2 o Aperila 1976 ae umusa i le aso 25 Setema o lena lava tausaga. Aso 14 Ianuari 1980 tatala le feagaiga a le aulotu ma le auauna, ma tuumuli atu ai i si o la aiga. O le 1980 ia Setema 13, na to‘ai taunuu ai le Susuga ia Uala Evagelia ma le faletua ia Savaia, o lē na avea ma Faifeau Toeaina mulimuli ane i le Pulega Aukilani Sisifo, Matagaluega a Aukilani. Ma o le agaigai pea i luma o le galuega, na tōfā ai le Faifeau ma le usoga ina ia toe sosoo faatelē le falesa. Me aso 1, 1984 amata le galuega ae faaulufale ia Tesema aso 8 i le faaiuga o lena lava tausaga.

 
Oketopa 1986 ina ua mae‘a le Lotu a Tamaiti, na tuumuli ai le Toeaina ma le Faletua mo la laua faamalologa i le 3 masina ma faamoemoe e toe taliu mai le faaiuga o Ianuari 1987. Peitai, e momoe ma manū e lē fati, ae sau mala e atia‘i. Talofa, na maliu faafuasei ai le Susuga i le Toeaina i Samoa i le agai atu ina soliata le la o le aso 8 o Tesema 1986. Na iloga uno‘oa o le ie talatala ma le efuefu o le faanoanoa i le faamuli, aemaise le faamalumalu ifo o ao uli o le faavauvau e lē tali ai ni vai. Ui ona o lea, e lei mataoge ona faamaise mai le Agaga o le Matai, auā ina ua to‘a le āuāu o uno‘oa i le muāava o manino ma faamafanafanaga, ona ‘amia ai lea e le aulotu i Samoa le sa o lo latou tamā, le faafeagaiga.

 
Ma o le mae‘a o toe sauniga alofagia e le Ekalesia aoao ma le atunuu, ona molimoli ai lea o le sa o le auauna a le Alii i lona oliolisaga mau i laufanua o Papatoetoe, e sauni alafa‘i mai ai i lena Aso atofa, pe a mavae le po. Aso 28 Tesema 1986, faamavae atu le aulotu i le Tina ia Savaia ma le nofo-a-alo, ina ua tatala e le maliu le feagaiga. Aso 4 o Aperila 1987 faaipoipo le usoga i Otara ma lona fā o ana faifeau, Tanielu T Mamea ma le tina o le aiga ia Feū, ua oo mai nei lava i le faamanatuga o le 50 tausaga o lona Iupeli Auro. Sa galulue lava ma usi le āu i le matagi i le faasinoga a le Agaga o le Matai o le Galuega.

 
Ma ina o ala le mafua i le taunuu mai ma galulue, sa matuā lagona lava le loto faafetai i le Atua ona o le mātauga i le maelega ma le faatuatua alualu o uso a auauna ua mavae atu, faapea le mamalu o le aulotu. Auā la, a fua i le ausage o le uluai taeao, ona maofa lava lea ma faagaeetia le agaga auā ua vave ona manatua le moni o malelega a le Alii faasino i le Malo o Lona Tamā lea na faatusa i le fua aupito itiiti o le sinapi, ae na iu ina ofaga i ai manu felelei i lona mafalā.

 
E tau mai la o ma tausi mea e sootō le tovine, ua usiusi ma amata fetiitii mai ona fuata. Ma e lei pine, ae ‘itea i le mātau ma le vaai le tatau ona toe iloilo tupetoa ma toe fili le manoa, auā ua ōia uluai maota na fausia talu le tuputupu pea o le galuega, tainane foi le itu i le saogalemu. Ma o le tofa lava na saili ma tuufesili i le Atua, faatasi ma le fetuutuunaiga o muniao i le faautautaga a le aulotu, na ‘afa e tasi ai ina ia toe fausia faatelē le maota tapuai, fau se Hall e tali ai i manaoga o tupulaga ma fanau mo aoaoga ma taaloga, aemaise le maufaitua i ai o le tautuaina o le Galuega a le Atua e tusa o manaoga faaneionapo, ma ia fausia foi se fale lelei e apitaga i ai faafeagaiga autovaa mai a Otara i lea tupulaga ma lea tupulaga.

 
Aso 29 Fepuari 1996 amata le galuega tā‘otolua o le falesa ma le hall na faasuafaina lava e le Ekalesia ia Lady Siotara Hall e pine faamau a‘i le mafutaga, aemaise se uluai faatāgataga a le Atua i sa latou faifeau i totonu o le galuega talu mai a latou faafeagaiga ua mavae. Aperila aso 4, 1997 faaulufale ma faapaia le falesa ma le hall. 18 Oketopa 2004 fausia le fale o le galuega ae umusa i le aso 9 Aperila 2005. E aulia mai le faamanatuga o le 50 tausaga, ua faamauina faaletulafono meatotino a lenei aulotu e aofia ai le fanua, falesa, hall ma le fale o le galuega o loo fausia ai, atoa ma totoga o maota uma, lea ua umia saoloto (mortgage free) i lalo o le suafa o lenei ekalesia, ma o loo faamalumalu i ai lana fono (Otara EFKS Church Council), faapea lana Board of Trustees o loo fausia i ona sui (matafale) auai e to‘a 20.

 
Ua na o se otootoga o le talafaasolopito i lona faavaeina, lea a toe tu nei ma toe tepa i le 50 tausaga ua tuana’i ma le ausage o lona amataga mai, ona maofa lava lea ma le agaga  faamaulalo i le mamalu faaalia o le Atua na Agaiotupu lea ua molimauina, e pei ona totonugalemu i ai le faamanatuga o le Iupeli Auro o le EFKS i Otara nei. Ua manatua vave ai i le loto malelega a le tupu o Tavita ina ua topule e le Atua faamanuiaga mo ia ma lona aiga:  “Le Alii e le Atua, o ai ea i matou nei? O ai foi lo matou aiga ina ua e faaoo mai ia te i matou i lenei aso? Ua e silasila mai foi ia te i matou e pei o ni tagata silisili.”

 
O lagona faagaeetia na o le usoga uma EFKS i Otara i lenei aso tele ma le taūa. O le leai o se agatonu o le Atua silisili i lenei aulotu, talu mea tetele ua na faia. Le Alii e, le Atua, Lau pule lea ua toto tetele, ua matou talisapaia faatuaeleele. Ia tumau atu i lou nofoalii o aofaga i ai paia ma mamalu, lou lava viiga e faavavau. I le iuga o lenei tusiga, ua faamanatu mai ai le fetalaiga a le Matai o le Galuega, “Pe a uma ona outou faia o ia mea, tou te faapea ane: O auauna lē aogā i matou nei, auā o mea ua matou faia, o mea lava ia e ao ina o matou fai…”
view gallery