$450,000.00 tupe Amerika e totogi e Samoa mo taaloga ale Pasefika 2019

Peresetene ole SASNOC, le susuga Patrick Fepuleai
Peresetene ole SASNOC, le susuga Patrick Fepuleai

Ole aofaiga atoa lea ole tupe e totogi ele malo o Samoa agai ile komiti o taaloga ale Pasefika ina ia talimalo ai i taaloga ale Pasefika lea e faia mai i Samoa ile tausaga fou. Na faamaonia mai ele Peresetene ole ofisa o taaloga ale atunuu le SASNOC, le susuga Patrick Fepuleai ise feiloaiga ma le tatou nusipepa.

O lea tupe atoa ua vaevaeina ini vaega se fa lona totogiina pe totogi auauai ai ele malo o Samoa agai le komiti o ia taaloga. Saunoa Fepuleai, o aiaiga lava ia o taaloga nei ale Pasefika e fitu tausaga e tapena ai soo se atunuu e manao e talimalo ai, e pei foi ona talimalo ai Samoa ile tausaga e 2007, peitai ole avanoa ua toe talimalo faatopetope ai Samoa ile tausaga fou ina ua togi mai ai le solo ale malo o Toga. Peitai ole vave ona tali atu o Samoa i lenei avanoa ona oloo lelei uma ana malae taalo ma faletaalo lea na talimalo ai i taaloga ale Pasefika ile tausaga e 2007.

Ole tupe foi lenei na totogi uma ele malo o Samoa ona e leai lava se atunuu ole Pasefika se’i vaganā ai Niu Sila ma Ausetalia e mafai ona totogi ai e se faalapotopotoga o taaloga se tinoitupe tele faapea auā e leai ni tupe, a lē seanoa la ma le lagolago iai ole malo e lē mafai ona totogi lea tupe tele.

Ta’ua foi e Fepuleai, e tele lava le toe sikuea mai ole tupe lenei ale malo pe a fua atu i tapenaga o taaloga nei, ma e amata lava ile tausaga lenei le tele ole mau fono o komiti ole taaloga ale Pasefika e faia uma mai i Samoa, e mautinoa ole a maua ai tupe ale atunuu e ala i faletalimalo, taavale totogi poo rental cars, fale’aiga ma isi lava tautua ale atunuu.

Saunoa foi Fepuleai, ole faatupega lava e Samoa o taaloga nei ile 2019, e faamoemoe lava i kamupani ma pisinisi ole a avea ma lagolago malosi poo sponsorship, ma ole taimi lenei ua amata ai ni talanoaga ma le kamupani telefoni ale Digicel, auā ole kamupani foi lenei na lagolago autu ai i taaloga laiti ale Pasefika na faia talu ai i Vanuatu.

Ole taimi nei, oloo tālia ai se tasi e filifili e nate tauaveina le avanoa Ofisa Sili mo ia taaloga poo le CEO. Na faasalalau talu ai ele SASNOC le avanoa, e na’o le toatolu i latou na tusi talosaga ma faatalanoa ai, lea na maua ai e se tasi na avea muamua ma sui a Faipule ole Palemene talu ai e  iai lona tomai faapitoa ile itu tau i taaloga peitai e lei taliaina ele Kapeneta nisi vaega o lea filifiliga, e pei ole totogi lea ei le va ole $130,000.00 agai ile $150,000.00.

Ole manatu ole Kapeneta e tatau ona tutusa le totogi o lea avanoa ma totogi o faauluuluga o Matagaluega ale malo poo CEO lea e $120,000.00 ile tausaga. Afai ae mae’a loa ona filifilia se Ofisa Sili o ia taaloga ona sailia loa lea o isi tofiga poo isi avanoa mo le faatamo’eina o tapenaga o taaloga nei lea e taitaifono ai le afioga ile Minisita o Taaloga, Aoga ma Aganuu, le afioga ia Loau Solamalemalo Keneti Sio, ae sui taitaifono ai Patrick Fepuleai.

Ua maua foi ele tatou nusipepa le filifilia ai ose tasi na avea muamua ma sui tuai ole Manu Samoa 15, e nate tauaveina le tofiga ole Ofisa Sili ole SASNOC e sui tulaga ia Faamausili Taiva Ah Young lea na faamavae talu ai, peitai na ta’ua e Fepuleai, oloo tālia ile taimi lenei pe talia ele sui tuai lea ole Manu Samoa le totogi ole CEO ole SASNOC pe leai ona e fai si laititi tele ole totogi.

Na faamaonia mai foi e Fepuleai le toe ofo mai ole fesoasoani ale malo o Saina e toe faaleleia ai isi a tatou malae taalo ma faletaalo mo taaloga ole tausaga fou, masalo e na’o le pau faletaalo e manaomia ai se galuega tele, ole fale lea e faia ai taaloga netipolo ile Apia Park lea na matuā faaleagaina lava ele afā o Eveni faatasi ai ma se tasi o fale matamata ile Apia Park, ae ole tele lava o malae taalo ma faletaalo e na’o le toe faafou lava auā taaloga ale Pasefika ile tausaga fou lea e talimalo ai Samoa.