Ua amata faamamaluina nei le suiga fou a le Faalapotopotoga mo Faaputugatupe mo le Lumanai Manuia o Samoa (NPF), auā ana sui faisaofaga.
E 45% lea ua amata faamamalu e agavaa ai soo se sui faisaofaga mo tupe nono i nonogatupe laiti mai lana saofaga.
E pei ona silafia e 50% lea sa masani ona agavaa soo se sui faisaofaga e nono mai nonogatupe laiti.
O le Aso Gafua 5 Ianuari 2015, na amata faamamaluina mai ai lea suiga fou.
O lea suiga fou e mo le silafia e le mamalu o le atunuu, e pei ona faamalamalama mai i se pepa o faamatalaga mai le Faalapotopotoga, o loo ta‘ua ai e faapea, talu ai ona o suiga foi i taiala ma faiga faavae a le NPF, lea ua afua ai le faiga fou. I le pepa lava o faamatalaga mai le NPF o loo faapea mai ai foi, o le a faaauauina pea ona tuuitiitia mai tai 5% i le tausaga i totonu o le tolu tausaga o lumanai, seia oo ina ausia le 30% mo tupe nono mai lau saofaga.
E oo foi i nonogatupe faavaitaimi (STL) ua iai foi lona suiga, peitai e iai ona aiaiga faapitoa. O lea suiga e pei ona faailoa mai e le NPF, o le a agavaa ai le sui faisaofaga e fai nonogatupe faavaitaimi pe a mae‘a le tolu masina, talu mai lana nonogatupe mulimuli mai le fā masina sa iai muamua.
Peitai, o nei suiga fou, ua iai nisi o sui faisaofaga ua gugulu ai, ona o le latou mau e faapea, afai o lea ua faataunuu lea suiga fou, o lona uiga o le a siitia a latou tupe totogi, ina ia agavaa ai mo nonogatupe laiti.
E oo foi i nonogatupe faavaitaimi na ta‘ua e nisi, e lē iloa poo le ā le uiga, auā afai e agai atu le sui faisaofaga ae laitiiti le tupe e mafai ona nono mai i tua, o lona uiga e lē aogā lea suiga fou. O nisi foi o sui faisaofaga, na latou ta‘ua e faapea, sa sili ai le 50% lea sa iai muamua nai lo le suiga fou lea ua iai.
Peitai i se faatalatalanoaga a le Savali ma le Pule o le Vaega o Auaunaga mo Suifaisaofaga, Susuga Tanya Toailoa, na ia ta‘ua ai e faapea, e leai se tulaga o le a faapopoleina ai fua le aufaisaofaga i suiga fou ua iai. E iai nisi o loo faapea o le a siitia a latou tupe totogi ina ia agavaa mo nonogatupe laiti, peitai na saunoa Tanya, e tumau pea le peimeni o loo iai nei.
Na ta‘ua foi e Tanya e faapea, o loo faagasolo le faamamāina o paleni o loo iai, ona toe foi lava lea o nonogatupe laiti i le mea na iai. O le masina o Iuni agai ia Iulai o le tausaga lava lenei, lea ua faailoa mai e toe foi ai lava le faiga o nonogatupe laiti i le mea sa iai.
O le auga poo le sini autu o le faamoemoe o le Faalapotopotoga, ina ia faaitiitia aitalafu a sui faisaofaga a le NPF, ina ia oo atu i le lumanai, o loo tele se seleni e mafai ona talaina i tua.
O loo iai foi nisi o auaunaga a le Faalapotopotoga e ofoina atu mo sui faisaofaga pe a moomia se fesoasoani.
E pei ona faaalia e Tanya mo se faataitaiga, o se maliu e moomia ai se seleni mai le saofaga a le sui faisaofaga o loo mafai lava ona fesoasoani i ai le Faalapotopotoga i lea tulaga.
E pei foi ona faamatalatalaina mai i le pepa o faamatalaga e faapea “o nei suiga fou ua faia ina ia ogatasi ma Faiga Faavae a le SNPF, ina ia tele se teugatupe e sefeina mo oe le Sui faisaofaga, pe a oo i le taimi e malolo ritaea ai i le lumanai.”
