O tofi o le tino e mavae ma mou, a o le olioli, mealofa ma le faauuga a le Agaga o le Atua e lē mafai ona aveesea i le tagata e saili pea, ma valaau ia te Ia, i le agaga ma le faamaoni
O le Fetii-o-Fatuga Fou (Album) ua faaautuina e faapea, E ILOA OE I LAU GAGANA, a le aufaipese lauiloa a le Punialava, ua mae‘a tapenaina nei mo le umusaina ma le faalauiloaina faalauaitele i le vaiaso nei lava.
E sefulutasi pese ua filifilia ma tuufaatasia i totonu o le Fetii o Fatuga e pei ona sauni e silasila ma faafofoga i ai. O le Punialavaa e lē toe tau faailoaina lana tautua e ala i fatufatuga, tusiaina ma le faaleoina o pese mai le tele o tausaga ua alu.
Ae o le faamoemoe lava ia e pei ona alo atu i ai mo le vaiaso nei, o nisi o pese fou faato‘ā mae‘a lava ona fatu, tusia ma tuufaatasia mo lenei vaitau ma lona foi fuata. E iai mafuaaga ma faamoemoega ‘anoa, na mafua ai ona toe lalaga le taleni a le Punialavaa.
E pei ona silafia o le lima tausaga talu ai, o le taimi mulimuli lea sa faalauiloaina ai se tasi o ana lipine poo le Fetii o Fatuga e pei ona liliuina i ai le upu palagi Album.
O le feiloaiga a le Samoa Times ma le susuga i le taitai, le faafeagaiga ia Rev Lale Peteru, ma le faatonusili o le Punialavaa, le faletua ia Vini Lale Peteru, sa ta‘ua ai le mafuaaga o lenei faamoemoe, e pei ona fesiligia ai.
1. O se fesoasoani i le tulaga tau seleni mo le faavaeina ma le toe amataina o le galuega fou a le Atua, Le New Vision EFKS i Magele
E lei mamao atu ona tuua e le susuga ia Lale ma Vini, le ekalesia a le Savali o le Filemu EFKS sa galulue ai, ma o laua lava foi sa faavaeina. Peitai ona o le finagalo faaoo o toeaiina o le Matagaluega a Niu Sila, ma sa usitaia foi e ui ina o se faaiuga sa feteenai ma le faavae o le Ekalesia Aoao.
O le mafuaaga lea na tuumuli ai Lale ma Vini, ae mulimuli ane sa lē mafai ona taofia finagalo o le toatele o le aulotu a le Savali o le Filemu, ae ua piipii pea ma mulimulitai i le latou faifeau.
Na oo ina toe vaeluaina ai le ekalesia a le Savali o le Filemu, ma ua faatasi atu nei le toatele o matafale e lagolago le susuga ia Lale ma Vini.
O lea gaioiga sa toe tulai mai ai se isi galuega fou, ma ua malilie faatasi foi ina ia faavae se amataga fou, la lea ua faaigoaina ai o le New Vision i lalo lava o le faamalu a le EFKS, ae tumau pea ona avea Rev Lale ma Vini Peteru ma o latou faifeau ma taitai i le galuega.
O le New Vision sa amata lava i le leai ma se mea e tasi, e oo lava i se seleni, auā sa tuua le Savali o le Filemu, tuua ai foi ma mea uma e pei ona sa iai. O le tulai mai o le New Vision, e pei ona silafia soo se galuega fou e tatau lava ona amata ma gaoioi i ona faagaioiga masani. O le tupe le isi vae ma lima e sili ona manaomia, ma o le amataga lea o le toe fatufatu o le Faafeagaiga ma le faletua, ma toe aapa ai i le taleni pese ma maealofa e ala i le Punialavaa.
O le ofo a le Punialavaa, o le a tapenaina ni pese ma tuufaatasia, ae fesoasoani le ekalesia i le faatupeina o nisi o vaega, a o le faamoemoe atoa i le faalauiloaina ma le faatauina o le CD, o tupe uma e maua ai, o le a sasaa ma ave uma e amata ma faavae ai le New Vision ma ona manaoga.
O se saunoaga sa mālie i le faalogo, ona e foliga mai, sa i aao lava o le Faafeagaiga ma le faletua le tali o le faafitauli, ma le manu e osi ai le taulaga.
Atonu e toe faamanatu mai le tala a le Atua na fai ia Mose, na fesili ai le Atua, poo le ā le mea o loo uu i lona lima? Fai mai Mose ua na o le tootoo, fai mai le Atua, togi i lalo e fai ai le vavega. O se ata faapea le tulai mai o le Punialavaa ma lana fesoasoani i le tau sosofaina o le vaofilifili mo le faatuina o le aulotu a le New Vision.
E fetaui lava polokalame a le Atua e pei ona saunoa i ai le faifeau, o taleni o loo iai pea ma o se avanoa lelei foi lea ua talafeagai ma le tatau foi ona toe vaai le Punialavaa mo se isi laasaga mo le lumanai. Aemaise ai ua fai foi sina umi, e lei toe tuufaatasia se isi galuega. O le faamoemoe e pei ona lupe nei, i le Aso Faraile o le vaiaso nei, aso 15 o Aperila, o le a faataunuuina ai le koneseti a le Punialavaa i Malaeola i Magele.
E pei ona saunoa Lale ma Vini, o tupe uma o le a maua i lea faamoemoe, atoa ai ma se seleni o le a tali mai ai le atunuu, e ala i le faatauina o le CD fou, o le a ofoina uma lava mo le ekaleisa e pei ona malilie i ai ma faitaulaga ai.
2. Ua 40 tausaga talu ona amata mai ma fanau le Punialavaa
O le a faapea foi ona faamanatu ai le atoaga o le 40 tausaga talu ona fanau mai ma amata le tautua pese a le Punialavaa.
E lē o mafai ona manatua ma faitauina e le susuga ia Lale pe ua fia le aofai o lipine ma CD ua ausia e le Punialavaa talu ona amata mai, na pau le tulaga o loo molimauina foi e le toatele, a ao le malo ua tele. O le tausaga e 1970 na amata ma faavae ai le tautua a le Punialavaa, ma ua oo mai i le 2011 o loo faaauau pea.
O le isi lea vaega sa taloto ai foi i totonu o le faamoemoe lava lea, ina ua amata ona fatufatu ma tusitusi le Fetii o Fatuga e pei ona o le a tatalaina nei. O se taimi umi pe a toe tepa i ai, auā sa amata mai a o faato‘ā fuafua ma fetaui le tama ma le teine, seia oo lava ina tuufaatasia ma mafuta.
Na mavae ia taimi, ae valaau loa le Atua e ala i le ulufale i le kolisi Faafaifeau i Malua a le EFKS, ma sa faaauau ai pea lava. E oo lava ina tuua le laumua i Malua, maua le nuu ma faanofonuu ai seia oo mai lava i le asō, o loo agai pea lava i luma e lei faavaivai.
Sa ta‘ua e Lale, o pese uma lava o le a faato‘ā faamatala ma faailoa o latou uiga i le po e pei ona atofaina.
3. O le faatāuaina o le galuega o Faasalalauga ma le au Tusitala
E ese le tāua o le galuega o loo feagai ma le au faasalalau i leitio, faapea le au tusitala i luga o nusipepa. O le tasi lea o mafuaaga ua afua ai ona taulai i ai, ma avea o se isi feau momoli e ala i pesega ma le faamoemoe o le Punialavaa.
Ona e o faatasi le galuega faasalalau, tiute faatusitala, ma le galuega fatufatu ma le tusiaina o pese. O le amanaia ma le tāua o ia galuega i lenei vaitaimi ua tatou iai, ma ua avea o se isi taulaiga o le faamoemoe lava lenei o le galuega faatusipese.
4. O le galuega o le faiaogaina o fanau laiti i totonu o aoga amata
O le tasi lea o galuega tāua ma le telē o lona sao i aiga ma fanau fai a‘e o le atunuu. E lē faigofie le faafeagai ma le a‘oa‘oina o fanau i aoga amata, auā o le matua lea e ao ai ona tapue ma lelei tapena ai le mafaufau o le tamaitiiti ma le teineitiiti mo lona lumanai. A o se galuega foi e matuā telē sona fesoasoani ma e iai sona faiā tele ma le galuega a le Atua i totonu o aulotu ma ekalesia.
5. Fatufatuga ma pesega mai lea vaitaimi i lea vaitaimi
E tāua tele le taumafai e vaai poo fea lea ua agai i ai le soifuaga ma le taaviliga o le lalolagi i lenei vaitau. Ua televave ma ua saoasaoa ma ua mulimulitai i ai tupuaga, a o tupulaga fai a‘e foi ia o le malosi lea ma le poutu o le galuega i le lumanai. E tatau foi la ona suia fatuga ma iai ni pese ina ia fetaui ma manaoga o tupulaga, e faafaigofie ai ona uumau pea ma taofi mai i totonu o ekalesia ma aiga, nai lo le avaga atu ma tosina pea i musika ma fatuga faaonaponei o le lalolagi e fano ai o latou agaga.
Sweet and Irie
O le ala foi lea ua faafiafiaina ai lava le mafaufau ma le agaga ina ua mafai ona matou galulue faatasi ma le ‘au lenei a le Sweet and Irie. O ni fanau na soifua ma tutupu a‘e i Niu Sila, o loo faaaogāina foi a latou taleni i le tele o avanoa i le maketi fefiloi tuufaatasi, e lei fuli mai lava mo Samoa, a o alo ma fanau a le atunuu. E lē gata i lea o le susuga ia Tua Kaisala, o loo lagolago mai foi mo le pueina o le faamoemoe o le Punialavaa.
O se avanoa tāua tele ona ua maua ai se mafutaga vavalalata a le Punialavaa ma nisi o tamafanau iloga a Samoa le Sweet and Irie Backline Band. O nisi o alii Samoa o lea faato‘ā auai ma fiafia e galulue faatasi ma se aufaipese Samoa. O ni alii e talenia tele ma atamamai i le tuufaatasiga o pese ma le taina o musika faaneionapo, ma e fiafia tele i ai tupulaga, peitai o le isi lea vaai mamao a le Punialavaa mo lenei vaitau, ma ua talafeagai tonu ma le taumafaiga a le Sweet and Irie.
O latou foi o le a taina uma pese o le koneseti i le po e pei o le a umusa ai le Fetii o Fatuga.
O le Punialavaa ma lona faamoemoe i le aso 15 o le vaiaso nei lava, ua na o le susuga ia Lale ma Vini ma o la alo e toatolu.
O le afioga ia Nanai Viellani, o le tamaitai o Vania Tutainuuma ma le fetaliaga ia Leuluaipouomalo Punialavaa Chesed ma le tamaitai laititi o Melody. O i latou uma o le a feagai ma le usuina o pese, atoa ai ma le faamatalaina o o latou uiga.
Sa molimauina e le susuga ia Lale e faapea, o se tasi lenei o galuega e ese foi le matagofie ma le ‘oa o le gagana o loo faaaogāina i pese uma e sefulu ma le tasi ua mae‘a ona tapenaina. O loo iai nisi o pese e mālie ona upu ma o latou uiga, ae o nisi foi e mālū lagona o loo usu ai ma e faapea foi nisi o mafaufauga o le a maua ai.
O le a leotele ma lautele le molimau e ala i pesega nai lo le lauga i totonu o le malumalu
Ua maua e le Samoa Times nisi o tala salatua ma uaea mosooi, ma e lei mafai foi ona faamaonia mai e le susuga i le Faafeagaiga Rev Lale Peteru, ona o loo tālia pea se feiloaiga ma le taitaifono o le komiti a toeaiina o le Matagluega a Niu Sila e pei ona sa tuutala ai.
E faapea se faamatalaga sa maua e le Samoa Times, ua aveesea tofi faifeau o le susuga ia Lale ma Vini, ona o le mataupu lava e pei ona tatala ai foi le feagaiga ma le ekalesia a le Savali o le Filemu.
Afai ae moni lea faamatalaga, o lona uiga masalo ai o le a taofia ai le laugaina o le upu folafola ma le talalelei i tua o le pulelaa, ma totonu o malumalu. Ae iai le talitonuga, atonu o le a lē afaina tele i le finagalo o le faifeau ma lona faletua lea tulaga auā o le a sili ona leotetele ma toatele nisi o le a oo i ai le laugaina pea o le talalelei e ala i pesega ma fatufatuga, nai lo se aulotu e tasi ma le pulelaa e tasi. Ma o se avanoa e pumoomoo e lē faatusalia i luga o leitio, ma upega o fesootaiga faaonaponei ua soo ai le lalolagi atoa.
O lea foi lauga e ala i pesega o le a lē taofia ma faatulagaina le oo atu i totonu o nofoaga faapitoa i gasegase, falepuipui, aai o tagata matutua, ma isi nofoaga e lē o mafai ona au i ai le malosi o le lauga i totonu o le falesa. O le isi lea faitotoa ua tatala e le Atua, ina ua tapunia ma lokaina e le lalolagi nei le isi faamalama ma le isi faitotoa. E anoanoai auala e faaaogāina ai e le Atua lana fanau, o ē faalagolago pea ia te ia. E moni o tofi e mavae ma mou atu, ae o le olioli, meaalofa ma le faauuga a le Atua e lē mafai ona aveesea ma le tagata e saili pea ma valaau atu ia te Ia, i le agaga ma le faamaoni. E manumanu le Atua i lana tagata, ma lana meafaigaluega, ae lē o le tofi ma tofiga.
