Mai i le vaa laupasese o le MV Limulimutau i le 1975 ma le aufaigaluega na o le toafā (4) i se tasi o faalapotopotoga malosi i le unaiga o le atinae o Samoa i lenei vaitaimi, o le Faalapotopotoga o Vaa o Samoa, ua faamanatu i le vaiaso atoa lenei lona tulai mai o se kamupani a le Malo o Samoa.
O se sauniga na faatautaia i Apia i le afiafi o le Aso Sa na amata ai sauniga o le faamanatuga o le 40 o tausaga o lenei faalapotopotoga. O le aso ananafi (Aso Gafua) na amata ai faaaliga o taavale teuteuina, faia ai se sauniga faalemalo i le Eleele Fou, faatino ai ma faalauiloa ma se fiafia a le Kamupani Vaa, ma o le asō ua faaauau lea faamanatuga lea e aofia ai ma se solo tele i le motu tele i Salafai ma se faatasiga foi auā lava le faafetaia o le pule faasoa a le Atua i lenei atinae.
O le faamanuia a le taitai o le Malo na faia i luga o le TVONE e pei ona momoli ai le faafetai na avea ai le alii Palemia le susuga Tuilaepa Lupesoliai Sailele Malielegaoi ma sui o le malo ma tagatānuu uma o Samoa ona o lenei auaunaga tāua mo tagata o le atunuu. Sa ia faafetaia i latou uma na tauasa mai le gasu o le taeao ina ia taunuu le Faalapotopotoga i le tulaga lelei ma le malosi o iai nei.
O lea ua i Samoa se vaa na faatau mo le faalautele ai o le auaunaga tau i uta felaua‘i a lea faalapotopotoga na faafoe mai lava e le auvaa a le Faalapotopotoga na malaga i Meleisia ma faatautaia mai ai le faigamalaga a le SSC Fasefulu. O se igoa ua avea ma pine faamau o le aso fanau lenei ua faagasolo.
E lē gata i lea ae ua faapea foi ona iai ma isi vaa e 15 ua atoa i ai le auaunaga i lenei taimi ma e lē gata i le va o Savaii ma Upolu ae o vaa nei ua faaaogā foi e Amerika Samoa, ese mai i le MV Naomi o loo agai atu lava i Upolu mo Amerika Samoa i Fagatogo i vaiaso uma.
Ua faaapea foi ona iai nisi vaa o loo faaaogā mo le felaua‘iga o oloa i le va o Samoa ma isi atumotu laiti o le Pasefika ma o le SSC Fasefulu ua faaopoopo i femalagaaiga ia mo isi motu tuaoi o Samoa e pei o le Atu Kuki, o Niue, Tokelau pe a manaomia atoa ai foi Manu‘a ma Tonga.
O le mau a le malo a lē lelei femalagaaiga tau i vaa laupasese atoa ai vaa lau uta e lē mafai ona sii i luga le tupe maua a Samoa aemaise i le unaiga o ana oloa gaosi ma faatau atu i fafo. O le vaiaso la lenei o le a toe faamatala auiliili ai le faigamalaga a lenei faalapotopotoga mai i le 1975 seia oo mai i lenei tausaga.
O se tasi o suiga tele ua vaaia o le itu lea ua lafo atu nei e le Malo o Samoa i lana kamupani lea le galuega o le vaaiga ma le atinaega o uafu e tolu o Salelologa, Mulifanua ma Satitoa ma o le faatamoega atoa lava o nei uafu i le taimi lenei ua faatautaia e lea faalapotopotoga. O le uafu i Apia ona pau lea o le uafu ua i lalo o le Pulega o Uafu ma Taulaga a le atunuu.
O le taimi lenei o le Susuga Papalii Uili Nansen o se alii ua leva ona galue o se inisinia o vaa a le Faalapotopotoga lea o loo faauluulu i ai le SSC (Samoa Shipping Corporation) ma o loo faapea ona i le tofi Minisita le afioga Manu‘alesagalala Enokati Posala.
