O le Pelesitene filifilia fou o le sosaiete a Tausi Soifua o Samoa le faletua o Solialofi Papalii ma le ata o le Pelesitene ua tuumalo le susuga Fesolai Faamanatu Nielsen

O le Pelesitene filifilia fou o le sosaiete a Tausi Soifua o Samoa le faletua o Solialofi Papalii ma le ata o le Pelesitene ua tuumalo le susuga Fesolai Faamanatu Nielsen

O le tausaga e 1978 na amata tauave ai e le faletua le susuga Fesola’i Faamanatu Nielsen ua tuumalo le tofiga Pelesitene o le sosaiete a Tausi Soifua a Samoa.

E fasefulu tausaga o tauave e lea tina o le atunuu le tofi ma e lei toe au ese ai finagalo lagolago o sui o le sosaiete seia oo lava ina valaau le matai i le tina matua.

O le tausaga nei faato’a toe palota ai e sui o le sosaiete se Pelesitene ma o le fono faaletausaga i le Aso Tofi ma le Aso Faraile ua mavae na vevela mataupu o le fono a le sosaiete.

O le tasi lea o mataupu sa mamafa iai finagalo o vaega eseese o le tautua a tausi soifua o le lē toe faatuatuaina o le laulau poo le komiti faafoe sa faaauau mai e le faletua o Solialofi Papalii i lona tulaga sui Pelesitene.

“O le mataupu muamua lenei a le falema’i o Tupua Tamasese Meaole le TTM ua lē toe faatuatuaina le Komiti faafoe ma ua tatau ona faia le palota e toe saili ai tofi”.

O le folasaga lea o mataupu a le falema’i i Motootua na amata ai talanoaga i mataupu a lala o le auaunaga faatausi soifua i Samoa. E lei ‘alo le sui pelesitene i lona faailoa i luma o le fonotaga o le tulaga lea ua tatau ona fai o le toe palotaina o sui o le laulau.

 O se vaaiga i le taimi na faatino ai le palotaina o le Pelesitene o le Sosaiete o Tausi Soifua a Samoa ma isi tofiga o le laulau o le Komiti Faafoe

O se vaaiga i le taimi na faatino ai le palotaina o le Pelesitene o le Sosaiete o Tausi Soifua a Samoa ma isi tofiga o le laulau o le Komiti Faafoe

O fafo o le hall a tausi soifua i Motootua na faia ai le fonotaga, o tala taumuimui sa lagona ai le leo o le lē fiafia i le faafoeina o le sosaiete e le laulau o iai nei. “Ua kakau a ga sui se pelesekege magaia foi se suiga fou”.

O se isi lea leo na lagona i fafo a’o saofa’i le tusitala i lalo o le vi i autafa o le hall a’o vevela finagalo o sui auai i le talanoaina o le tala o le tupe.

  O le isi lea mataupu na sili ona gugulu ai lagona o tausi soifua. Peitai na faato’ato’a ma faamalamalama lelei e le sui pelesitene ma le failautusi vaega taitasi na faaalu iai seleni aemaise o le selau tausaga o le sosaiete na faamanatu i le tausaga ua mavae a’o lei tuumalo le Pelesitene sa iai. Ina ua mae’a mataupu uma o le fonotaga ma toe masuiga mālie finagalo siisii o nisi o sui na faatino loa le palota.

E toalima sui na faatutu e saili ai se pelesitene.

O Solialofi Papalii, Minni Matalavea, Iosefa Iosefa, Asomaliu Tupuola Misi, ma Latana na faia iai le filifiliga.

O le faaiuga na mamao palota na maua e Solialofi e 72 pito iai Minni e 50. E ui ina sa lagona le leo e sui se pelesitene ae na faatoa iloa le moni o le lagolagoina o le faletua o Solialofi ina ua mae’a le faigapalota. “Ou te lagona le faatauvaa i luma o le Atua, ma ou te faafetai tele ia i latou sa lagolagoina lou toe avea ma ta’ita’i ma e leai lava se isi mea e sili ona tāua ia te au o le maopoopoga o sui o le sosaiete”. O se finagalo lea o Solialofi Papalii ina ua mae’a le palota ma ua manumalo.

“O le a tuli pea se ‘ai o tausi soifua ma mulimuli pea i galuega a le tina o Fesola’i Faamanatu sa ia taitaia ai le sosaiete i le tele o tausaga, o se ta’ita’i e lē mafai ona faagaloina lona tu malosi mo le lelei o tausi soifua uma i le atunuu”.

O le sui Pelesitene fou ua filifilia o Minni Matalavea, ae ua tumau le susuga Iosefa Iosefa i le tofiga failautusi.

O le teutupe filifilia iai le tausi soifua le faletua o Latana ae ua lē maua lona faaiu. E tolu tausaga ole nofoa’iga ale laulau e tofia poo le komiti faafoe.