Ole Aso Faraile, 20 o Oketopa na fofogaina faalauaitele ai tofi Minisita ale vaega faaupufai ale Labour, i lalo ole taitaiina ole palemia fou o Niu Sila ia Jacinda Ardern. E lei faailoa po ua manino mai matagaluega taitasi ole a galulue ai nei sui Minisita, ae pau le vaega o lea ua faailoa mai o suafa o sui faipule ole Labour lea ua fai iai le filifiliga ale taitai e tauaveina nei tofiga ile isi tolu tausaga ole paeaiga faapalemene.
E lima tofiga Minisita lea ua tuuina atu ia Maori e aofia ai Kelvin Davis, Nanaia Mahuta, Peeni Henare, Willie Jackson ma Meka Whaitiri.
E fā Minisita lea ua faamatuu mai ile Pasefika e aofia ai le tamaitai ia Jenny Salesa, Carmel Sepuloni, Kris Faafoi ma Aupito Su’a William Sio, ma le faamoemoe ole Aso Lulu ole vaiaso nei, ole a faalauiloa faalauaitele ai loa Minisita o pati nei e tolu ole Labour, ole Green ma le NZ First faatasi ai ma matagaluega ole a galulue ai nei Minisita taitasi.
Ole Aso Lua, 24 o Oketopa e faalauaitele ai ma faamanino aloaia ai feagaiga na osia ma tusitusia ile va ole Labour ma le NZ First faapea ai ma le Labour ma le Green Party. O Jenny Salesa ma Carmel Sepuloni o tamaitai ia o lea ua filifilia e avea ma Minisita i totonu ole Kapeneta, ae ole afioga ia Aupito Su’a William Sio ma Kris Faafoi o Minisita ia ua filifilia i fafo ole Kapeneta, faatasi ai ma le tamaitai ia Poto Williams ua tofia nei e avea ma taitaifono ole Komiti ale Palemene.
Ta’ua e Aupito Su’a William Sio, e lei faigofie le finauga ma le talanoaga ale Pati i mataupu faapenei, ae i lona talitonu, ose taimi muamua lenei ua filifilia ai ni minisita se toafā ale Pasefika ile Kapeneta, ile lua i totonu ole Kapeneta ma le lua i fafo ole Kapeneta, e tutusa uma tofi minisita e lavevea i totonu ole faigamalo, pau le eseesega laititi o minisita oloo i fafo ole Kapeneta, e le auai i fono ale Kapeneta, ae sei vagana ua iai ni mataupu e patino ia latou matagaluega, ona faatoa auai lea.
E 12 sui o Maori lea ua ofi i totonu ole Palemene ae toaono sui ale Pasefika lea ua militino ai foi i totonu ole faigamalo a Niu Sila.
E foliga mai la e le faigofie nei finauga ona ole taumafaiga lava ia faapaleni le itupa o tamaitai auā ua toatele alii lea ua umia tofi minisita, ae le gata i lea oloo vaavaai foi le pati i nisi o itumalo oloo i tua atu o Aukilani e pei o Kalaiesetete ma Ueligitone e tatau ona faasoo uma nei pitonuu uma o Niu Sila ile tofi minisita.
I faamaumauga o faiga faaupufai poo faigamalo a Niu Sila ua tulai mai, ose taimi muamua lenei ua tofia ai ni Minisita se toalua Pasefika ma le toatolu minisita Maori ua galulue nei i totonu o Aukilani i Saute. Ma ose faiga lea ua maua ai se malosiaga i sui faipule Pasefika ma Maori e galulue ma faatino ai anavatau auā le fesoasoani ma le sailiga ole manuia mo le atunuu lautele.
Ile tulai mai foi o tofi minisita nei e fā i totonu ole Pasefika ua avea ose faamanuiaga i tagata lautele ole Pasefika aemaise ai ua faailoa mai ai i tagata le amanaiaina ma le faatāuaina ele tamaitai ia Jacinda Ardern ole lagolago atu ma le leo o tagata Pasefika, ae faapea foi se vaaiga i tagata Maori ina ua faamatuu atu iai ele taitai tofi minisita e lima mo i latou.
Ile faatusatusaina o nei tofiga i totonu ole Kapeneta ile Maori ma le Pasefika, e tele lava se faamanuiaga ma le faatāuaina ele taitai ole Labour o tagata Pasefika pe a fuafua ile ono sui ile Palemene a’o lea ua mafai ona faamatuu mai iai minisita e lima ma le tofiga ole taitaifono ole komiti ale Palemene.
Tele le faafiafiaina ole sui faipule o Magele le afioga ia Aupito Su’a William Sio ile faigamalo fou ua tulai mai aemaise ai o tofiga o lea ua filifilia ai ele Kapeneta e galue ai mo le malo. Ile finagalo ole faipule, ole aogā ma le tāua o nei tofiga ina ia faatino galuega auā le manuia ole atunuu lautele. Oloo naunau le faipule ma unaia le vave faatino o galuega oloo taumafai le faigamalo fou e fai ina ia iai se suiga fou e vave tino mai mo tagata.
Ole Aso Tofi 26 o Oketopa o lea ua fuafuaina e faatauto ai tofiga minisita ole Kapeneta, ae ole aso 6 ma le aso 7 o Novema ole a fai ai loa le faatautoga ole Palemene ma fai ai loa le filifiliga ole Fofoga Fetalai ma amata ai loa galuega ale Palemene.
