“E matuia le taumafai e fai se faigaaiga faamalosi”
Ua lē mafai ona tauva le tofa Tuilagi Vavae Motutoa Leo II i le faigapalota a le atunuu i le tausaga fou, ona ua nofosala nei i le falepuipui mo le umi e 4 tausaga.
O le Aso Lulu, aso 1 Tesema 2010, na fofogaina ai le faaiuga a le Faamasinoga Maualuga i le moliaga o le taumafai e faia se faigaaiga faamalosi (attempted rape) sa molia ai lea tamalii ua 68 tausaga o le soifua.
Sa tetee Tuilagi i le moliaga, ae o le toe valaauina o le mataupu i le masina o Oketopa 2010 mo le suesueina o molimau a leoleo, na suia ai le tali tetee i le ioeina e lea tamalii o le moliaga, ina ua mae‘a ona valaau nisi o molimau e aofia ai ma le molimau a le tamaitai 24 tausaga le matua na aafia i le solitulafono.
O le tofa Tuilagi Motutoa Vavae Leo II o se tasi o sui tauva o le HRPP mo le palota o le 2011, e pei ona faasalalau faalauaitele suafa o sui faatutū e to‘a 74 o lea vaega faaupufai i le faamoemoe e faia se feiloaiga i le aso 15 o le masina nei ma suifaipule e to‘a 34 o le HRPP o loo seei nei i nofoa o le Palemene.
O le faaiuga a le Faamasinoga Maualuga faasaga ia Tuilagi na faamatalaina e le afioga i le faamasino o Vui Clarence Nelson, o se taunuuga lea ua oo i ai ina ua mae‘a ona iloilo le talosaga a le loia sa tulai mo lē ua molia, sa talosagaina ai se faasalaga e lē o se faasalaga faafalepuipui.
Sa faavae lea talosaga a le tamaitai loia o Maiava Visekota Peteru i le tele o tausaga o tautua Tuilagi i le Malo ma le atunuu, a o galue i le Matagaluega o Faamasinoga lea sa avea ai ma se tasi o sui resitara.
Sa finauina foi e le tamaitai loia le tatau ona silasila le faamasinoga i tiute faalemalo o lē ua molia a o avea ma faipule o le Palemene lea sa avea ai ma Sui Fofoga Fetalai.
E lē gata foi i lea tiute tāua, ae o ia o se tamā e faasino i ai nisi o alo o le atunuu ua lauiloa i le taaloga lakapi, e pei ona tautaua ai foi le aulakapi tele a le atunuu le Manu Samoa.
Peitai i le faaiuga a le faamasinoga na saunoa ai le afioga Vui Clarenece, o mataupu uma sa silasila i ai le faamasinoga i solitulafono o le taumafai e fai se faigaaiga faamalosi, o le falepuipui lava le iuga.
O le Palemene foi na latou aiaia ma pasia le 10 tausaga o le faasalaga falepuipui o lea solitulafono.
E 6 ma le ‘afa tausaga na amata ai le fua a le faamasinoga i se faasalaga, ae na toesea le lua tausaga ma le ono masina ona o itu lelei sa ta‘ua e le loia a lē ua molia faasaga i le tofa Tuilagi, ma totoe ai le 4 tausaga ua nofosala ai i le toese. O le tamaitai na aafia e iai sona sootaga faaleaiga ma Tuilagi.
O tolaulauga a leoleo na faaalia ai, o lē ua molia na o faatasi ma le tamaitai i lana taavale e sue se galuega mo lē na aafia. Na agai i Vaitele uta i se tasi o faipisinisi e fai sona fale kalapu i le taulaga ma maua ai le galuega ma le faatonuga o le po o le aso lava lea e tatau ona amata ai. Na mae‘a le suega galuega ua manuia ona alu ai lea o le tietiega a Tuilagi ma le tamaitai i Aleisa, agai atu i Leulumoega, faasolo atu ai i Sisifo i Apolima.
Na faaalia foi e leoleo sa molimauina e le tamaitai na aafia e alu lava le la faigamalaga ma tu le taavale i faleoloa ma faatau ai fagu pia a lē ua molia. O nisi foi faatauga o meaai lea e faapea na faatau ai foi ma ni aluga ma ieafu.
O le liliu mai o le tietiega mai Apolima na agai ai loa i Olomanu lea na tulai ai le solitulafono.
Na mafai ona sola ese le tamaitai ma lē mafai ai e lē ua faasalaina ona faataunuu lona tuinanau.
O se aiga e tusa ma le 980 mita le mamao o lo latou fale ma le nofoaga na faatino ai le solitulafono na sulufai i ai le tamaitai na aafia mo se fesoasoani.
