O se tagata sa faapea ona maliu i le afioaga o Faleasiu i le tausaga e 1970 ona o se gaioiga solitulafono na faia e se tasi poo nisi, ua faapea ona toe suesueina e leoleo. E leai se faamatalaga auiliili mai leoleo o lea mataupu ae o loo ta‘ua e faapea e iai se lipoti na tuuina atu i se fasioti tagata faamoemoeina i Faleasiu i le tausaga e 1970.
O le taimi nei ona ua fai si tele o tausaga o lenei faalavelave o loo faaauau pea i ai suesuega. Tasi lea o faafitauli ua feagai nei ma le galuega a tusitala talu ona le toe maua se feiloaiga ma le sooupu i faatalatalanoaga masani i Aso Lua o vaiaso taitasi o le lē mafai ona aumai ni tali i fesili.
O fesili foi o loo tuuina atu i le matagaluega e ala atu i le ofisa o le Komesina, e tuai ona maua mai ni tali ma tuai ai ona tapena lipoti mo le faasalalauina. I le lipoti mai le ofisa o leoleo o mea na tutupu ua lē toe aumaia ai le lisi o ofisa eseese o leoleo ma solitulafono na lipotia i ai, ae ua na o ni mataupu ua faailoa mai ma ni faamatalaga e lē atoatoa ona malamalama ai le atunuu.
Faitau ane i le lipoti o le aso 9 o Me 2013 na meli mai i auala televavave faaonapo nei:
“Pepa o Faamatalaga mai le Matagaluega o Leoleo”
Inu le Vailaau Fagavao
O le Aso Tofi 02 Me 2013 na logoina mai e le alii fomai ia Doctor Ali se alii, 24 tausaga sa ia inuina se vailaau, peitai i le taimi nei ua toe tea i tua ua toe manuia. O le mafuaaga i le va o ia ma lona aiga.
Tauai maa
O le Aso Tofi 05 o Me 2013 i le itula e 11.30 i le po sa tulai mai ai lenei tauaiga maa i se fale i Faleasiu. E tusa ai ma lipoti ma faamaumauga ua oo mai i le matagaluega sa faamanu‘alia ai se tane o Faleasiu.
Mataupu e uiga ia Hans Dalton
O le taimi nei e toalua ni alii leoleo o le Falepuipui Tafaigata ua faamalolo i lo la faatamala i le faatinoina o lo la tiute, ua mafua ai le maliu o le alii o Hans Dalton.
Suesuega i le Maliu o Rapi o se Tane o Faleatiu
O loo tālia lava faaiuga o suesuega sa tuuina atu i Niu Sila mo ni faamaoniga o pulufana sa aafia ai lē ua maliu ona e moomia ni ripoti maumaututū e tusa ai ma le mataupu lenei.
Maliu (Fasioti Tagata Faamoemoeina)
E iai se lipoti na tuuina mai i se fasioti tagata faamoemoeina i Faleasiu i le tausaga e 1970. O le taimi nei ona ua fai si loa o tausaga o lenei faalavelave o loo faaauau pea i ai suesuega.
O le faailogaina o le saolotoga o faamatalaga ma le saolotoga o galuega tusitala ma faasalalau le Press Freedom Day, na tautalagia ai e nisi o tusitala sinia i lo tatou atunuu le mataupu i feiloaiga masani a tusitala ma le sooupu o le Matagaluega o Leoleo ma Falepuipui. O atugaluga ona ua saunia nei na o pepa o faamatalaga e pei o le lipoti tusitusia na aumai i le aso 9 o Me 2013, e pei ona iai se fautuaga a le Palemia na ave i le Komesina o leoleo, ae ua lē maua ai le saolotoga e masani ai e fesiligia ai le sooupu i solitulafono eseese e lipoti i leoleo.
