Ole ausia ole tolusefulu tausaga i soo se taumafaiga, e atagia ai se manuia lautele ma se tamaoaiga sologalelei o ona tagatanuu, aemaise lava ile itu tau ile poto salalau, ma le mafaufau aoaoina lelei. E le faigofie auā e tele ni faafitauli, o faigata ma fatia e ono faavaatuia ai le faatinoga e manuia ai, ma oo atu ise taunuuga talafeagai ma faamalieloto.

“A oo le poto i lou loto, ma ua mālie ia te oe le atamai, e faafeao le mafaufau ia te oe, e leoleo ia te oe le faautauta.” (Faataoto 2:10-11).

Ole manulauti ale Best Pacific Institute of Education, ia galulue soosootau‘au ma tagata Atu Motu, Mātua, Aiga, Nuu ma Alalafaga aemaise Aulotu ma Ekalesia, e tauala i aoaoga, ina ia ausia moemitiga ma mafuaaga na tuua ai Samoa, ae faimalaga mai i Niu Sila nei, e saili se tamaoaiga mautu mo o tatou aiga, ae tainane o avanoa lelei i aoaoga mo fanau faapea tagata matutua.

Ole vaai mamao a lenei tina o Anita Finnigan, ole alo ose tina Eleni ma se tamā Aialani, e telē se sao o tagata Pasefika mo le tamaoaiga o Niu Sila faapea foi Samoa, pe a toe tapu‘e ma faafailele lelei fanau talavou, ina ia toe faaulufale atu i Iunivesite ma isi aoga maualuluga.

Ile vaitau o faiaoga Anita i kolisi ma aoga maualuluga, na ia molimauina ai le faatupulaia o fanau Pasefika e le ausia Iunivesite ona e maualalo o latou togi ma tusipasi sa lē mafai ai ona oo ile maualuga manaomia ma talafeagai lelei mo aoaoga e faaauau ai i iunivesite ma isi aoaoga maualuga.

O lagona ia o Anita, na iu ai lava ina faamavae ma savali ese mai ai ile galuega faafaiaoga, ma amataina loa ma le Best Training ile tausaga e 1988. O lana uo mamae le tamaitai o Maina Jones sa aafia tele ile afuafuaina o lenei aoga ile amataga. E tele ni faafitauli sa aliae mai i popofou o lenei faamoemoe.

Ole mataituina ma le tuufaatasia o mataupu e feagai tonu ma le malosiaga faalemafaufau o alo ma fanau Pasefika, aemaise foi le taumafai e maitau toto‘a ia agavaa ma taleni o nei fanau, e tau faafetaui ma mataupu ma ituaiga polokalame e aotauina ai i totonu ole BEST mo le taimi faatulagaina, ma iu atu ai ini tusipasi taualoa.

Ose tasi o itu tāua sa tele le taimi o lenei tina na ofoina atu iai, o talanoaga ma feutagaiga ma le Matagaluega o Aoaoga aemaise le faiga Malo faaupufai a Niu Sila sa tulai i lea vaitaimi.

Ole finauina ma ofisa sinia o aoaoga le mau a Anita, ia tuuina mai le latou talitonuga, e oo atu ise iuga manuia fanau talavou Pasefika, pe a galulue faatasi ma Best Pacific Institute of Education ile faaaogāina o mataupu tau aoaoga e fetaui ma o latou agavaa ma taleni.

Ole vaai mamao a Anita ia ausia Iunivesite ma aoaoga maualuluga. Sa faapitoaugafa foi le silasila ale BEST ia ausia ni galuega totogi lelei, ma siisii tulaga o tagata Pasefika i pulega o galuega i totonu o Niu Sila.

E na‘o le tolusefuluono (36) nai fanau talavou Pasefika, ae numera tele lava Samoa na uluai amataina lenei faamoemoe. Ua silia nei ile lua afe lima selau o fanau talavou faapea ē matutua oloo aotauina ile Best Pacific Institute of Education ile taimi nei.

O nisi ua fai ma Tausitusi, Loia, Fomai, Galuega faaofisa, Faiaoga, Freight, Tourism, Tusitala, Pueata ae o nisi ua i pulega o galuega faalemalo, kamupani ma pisinisi tumaoti. Na saunoa Anita, e maoae le atamamai ma le tumu i agavaa eseese, talenia, faapea le tauivi, loto tetele ma le sailimalo o tagata Pasefika, ae taulamua lava tagatanuu Samoa.

Ose tasi itu sa faamamafa ile saunoaga faafetai ale tamaitai Pule Sili ole BEST, Rachel Skudder ole faafetaia lea ole Aufaigaluega Paia ale Atua, aulotu ma ekalesia Pasefika eseese, ile latou lagolago ma faaavanoa taimi o autalavou ma tupulaga lalovaoa, e faatalatalanoa mataupu eseese tau aoaoga mo le taulai ile mauaina ma ausia le Tusipasi, Tipiloma ma le Tikeri mai i iunivesite ma aoaoga maualuluga.

Sa faamauina foi le faafetai i mātua Pasefika i la latou faitama, lagolagosua, aemaise lo latou talitonuina o aoaoga ale BEST e toe fanaufouina ai lagona ma tatala taleni ma le tomai sa nanā ma tanumia i totonu o aiga Samoa ma le Pasefika.

Ole faamanatuina ole 30 tausaga ole “Best Pacific Institute of Education” i lenei masina, ole faafetai ile Atua ile faaaogāina ma le valaauina o lenei tina o Anita Finnigan, ma le tamaitai Pule Sili o Rachel Skudder, Pulega ma le aufaigaluega ale “Best Pacific Institute of Education”.

Sa laualuga foi ma faaalia e sui sa sausaunoa le tele o aoaoga tāua ua maua ele BEST mai tupulaga talavou, alii ma tamaita aooga i totonu o lenei 30 tausaga. Manatu foi le tamaitai Pule Sili, Pulega ma le aufaigaluega, ole faaaogāina o nei faamaumauga e faaleleia ai polokalame ma le tuufaatasiga o mataupu talafeagai mo le siitiaina ole malosiaga o tusipasi taualoa mo tagata Pasefika mo le isi 30 tausaga o lumanai.

Ole tatalo amata na saunia e Pastor Friday, ona saunoa lea ole tamaitai Pule Sili o Rachel Skudder ile matatia ua ausia ele BEST ma le vaai mamao a lona tina o Anita Finnigan.

Ole aunoaga Autu sa feagai ma le afioga Sir Savae Laauli Michael Jones, na ia manatua ai lona tuaa o Maina Jones, sa amataina ma galulue vavalalata ma Anita Finnigan ile asaina ole vaofilifili ma le faigata ole amataga ole “BEST PACIFIC INSTITUTE OF EDUCATION”. Ole susuga ile Toeaina o Maafala Koko na saunia le Upu ole Afioga ale Atua.

Ole tamaitai ia Dr. Tagaloatele Peggy Fairbairn-Dunlop sa ia talatalaina le masaniga faafaiaoga, ma le atamai ma le lototele ole tamaitai o Anita Finnigan.

O Fata Ueligitone Malifa ole Oceania Communications 2000 na saunia le tala ile manulauti ma le vaai mamao a Anita, ole galuega ole fesootai, faalauiloa, faaaogāina o metotia eseese Faa-Pasefika, aemaise le faamatalaina ole naunautaiga maumaututu o Anita Finnigan, le moni o lona alofa i tagata Pasefika, ina ia tatala ana taleni e velo‘aso ai ile fausiaina ma le taaviliga ole manuia tuputupua‘e o Aukilani ma Niu Sila.

Ona faaiu lea i faafiafiaga na saunia lava ele PIPA, se tasi o lala faaleaoaoga ole BEST, e numera tele i alo Samoa ma Tonga. Maitauina i lea lava aso le mafutaga vavalalata ale aufaigalega e toatele lava i tamafanau ale Pasefika, aemaise Samoa.

O nisi ole auvalaaulia o paaga lava ale BEST, matagaluega ale Malo, Aufaipisinisi tumaoti, Auaunaga eseese, faapea le autusitala ma le aufaasalalau. Na faaiu ile taumafataga tele na saunia lava e le “Best Pacific Institute of Education.

Ole faletalimalo ole Novotel i Ellerslie na faailoga ai lenei matatia maoae tau aoaoga sa fitoitonu mo Tagata Atumotu, ua manuia ai le tele o aiga Pasefika i aoaoga, galuega, iunivesite ma isi aoaoga maualuluga, aemaise lava si o tatou atunuu o Samoa.

Manuia tele le atoaga ole 30 tausaga ole BEST PACIFIC INSTITUTE OF EDUCATION.

Comments

comments