$240,000 ua maua e le Malo mai le fale kasino

Ua faafiafiaina tele le pulega o taaloga petipetiga a Samoa le Gambling Control Authority, ona o lea e lei oo i se tolu masina ae ua palasi atu le sao tau seleni e pei ona faatulafonoina, o le taaloga kasino e pei ona tatala ai le uluai fale kasino i le faletalimalo o Aggies Resort i Mulifanua.

E $240,000 le komisi mai lea fale kasino ua maua ma tuuina atu loa i le pulega o taaloga petipetiga.
Faaalia e le alii pule o le White Sands Casino le susuga Lupesina Fred Grey, o se pisinisi lelei tele ona o le vave o seleni e maua ai. E lē tau fesiligia lea tulaga auā ua silafia ei latou e malamalama i ia ituaiga o fale mo taaloga faitupe, e sasaa i ai le tai fia afe ma le tai fia sefulu afe a tagata taaalo.

O le taimi a o lalata i le amatalia o le fono a atunuu laiti tau atiae o le lalolagi le SIDS (Small Island Developing States) na tatala ai le uluai fale kasino i Samoa.

O le sini o lea faaiuga a le Malo e faagaioia nei ituaiga o fale mo taaloga e faaalu ai seleni, ia maua ai ni tupe e fesoasoani i le atinaega o isi taaloga o loo ave i ai le faamuamua e pei o le lakapi, faipelega poo le fusu, taaloga afeleti ma isi lava taaloga o loo toatele le atunuu aemaise le tupulaga talavou o loo taaalo ai ma masii ai au taaalo i tausinioga faavaomalo ma isi atunuu.

O le seleni tele ua tuuina atu i le Malo mai le fale kasino muamua i Samoa ua tatala na faafetaia ai e le taitai o le Malo le afioga i le Palemia, Susuga Tuilaepa Lupesoliai Sailele Malielegaoi, le alii pule o Lupesina Fred Grey ona o le lelei faafoe o le taumafaiga lea ua tauaaoina ai lea faamanuiaga tau tupe e le Malo.

Sa toe faailo ai e le Palemia le aiaiga o le tulafono o fale kasino a Samoa, e lē faatagaina tagata Samoa ona taaalo ai, ae ua na o i latou e malaga mai fafo ma o loo umia tusifolau o tagatānuu o isi atunuu. O le White Sands Casino o loo pulea ma faagaioia e le Indo Pacific Gaming mai Ausetalia.

O le 80 pasene o lana aufaigaluega o tagatānuu o Samoa ma o ni avanoa lelei tele ua maua ai galuega mo o tatou tagata. E 110 masini e ta‘ua o slot machines ua iai, ma le sefulu laulau tetele mo isi taaloga faitupe.

O le lala o lea fale kasino o le a faatuina i Apia pe a tatala le faletalimalo o Aggie Grey lea o le a faaigoaina o le Sheraton i le masina o Iuni o le tausaga fou 2015, o le a iai slot machines e 220, ma le 24 laulau.
Se vaaiga i le fale kasino muamua ua tatalaina i Samoa lea ua na foai le $240 afe muamua o ana tupe mamā i le Malo e ala atu i le pulega o taaloga petipetiga ma kasino