Na faatumulia le faleaiga o le Mint Buffet i le po o le Aso Toonai, i le faamanatuina o le 21 tausaga o le tamaitai o Fusi Tupuola Lafaitele Te‘o.
Na muamua sii le viiga faafetai i le Atua ona o tausaga e 21 ua aulia mai e le tamaitai ia Fusi. O le afioga i le Sea ia Falema‘i Lafaitele Mika sa vaavaalua ma le susuga i le A‘oa‘o ia Michael Falema‘i Mika, auā le taulaga faafetai i le Atua.
O mātua o le tamaitai o Fusi, o si ona tamā o Tupuola Lafaitele Ionatana Te‘o, ma lona tina o Leafa Lafaitele Mika Te‘o. E lagona le agaga faafetai tele o mātua ona o se tamaitai loto fesoasoani aemaise ona uiga tausaafia i le va ma tagata. O loo aoaoina nei i le Iunivesite o le USQ i Springfield e saili lona faaailoga o le Bachelor of Human Services.
O le tofa ia Tuioti Anipale Lafaitele Mika sa fai ma fofoga o le po, auā foi faaaloaloga ma le polokalameina o le faamoemoe.
Na sagisagi fiafia le toatele o tauaiga faapea uncles ma aunties o le tamaiai o Fusi, sa malaga mai i Niu Sila, Sydney, Melepone faapea foi nisi vaega o Perisipeni ae lē gata i lea o uo ma paaga a le tamaitai fai aso fanau.
Na faafiafiaina le aofia i le tele o taumafa eseese na saunia e le faleaiga faapea foi nisi o faafiafiaga sa tapenaina auā le sila maimoa a le tamaitai ma le auvalaalia.
O le tofa ia Togia Palema Ugapo sa fai ma sui o le auvalaaulia e faafetaia mātua faapea le aiga o le tamaitai fai aso fanau, ona o faaaloaloga ua fata luga fata lalo i lona matagofie.
O le Faaili mālie a le 4114 sa faafiafiaina lea po atoa e ala i musika e pei ona masani ai po ma aso faapenei e fai ai sina faamalositino ona o le tele o taumafa ma teuteuga o le po atoa.
