E $20 miliona le seleni e toe faaleleia ai faletaalo ale atunuu i Tuanaimato. Ole tulaga lea ua faailoa ele Pule Sili ole Matagaluega a Taaloga ale atunuu, Moefaauo Salale Moananu. O lenei seleni ua maua mai ile fesoasoani a Saina, e faatupe ai le togafitia ole suavai ile Aquatic Centre poo le Faleaau i Tuanaimato. E aofia ai ma isi faaleleiga ole malae Netipolo ma isi malaetaalo i Apia Park. E ui ina e taugata le fausia o nei fale, e iai male Gym 1 male Gym 2 i Tuanaimato ae ole tausia lelei e matuā taugata lava.
Faailoa e Moefaauo ole seleni ole a faatupe ai le nofo ai i Samoa o alii Saina e toafā, e galulue faapitoa lava ile tausia lea ole Faleaau mole tausaga 2017. E iai lava ile tupe ale malo faaletausaga le vaega seleni mo ia tulaga, peitai o galuega mamafa ma taugata atu i luga, e iai le malae Netipolo male tausia pea ole Faleaau, o lea e iai le fesoasoani a Saina.
Ole galuega soosoo tau‘au a Saina ma Samoa ole a faaauau ai le tausia male faaleleia ole faleaau. O alii saienisi mai Saina ole a tausia le suavai ile faleaau, auā le saogalemu ole mamalu ole atunuu oloo faaaogāina faatanoavai e fā, oloo i totonu ole faleaau. E lua vai ta‘i 50 mita mole aau, tasi i fafo, tasi i totonu, ole Dive Pool e tasi male vaitaele a tamaiti laiti.
E iai foi ma pamu faapitoa oloo faagasolo ai le suavai auā le faamamāina mole toe faaaogāina ole suavai, ina ia taofia ai le suavai tia‘i. O aso uma lava e sueina ai le mamā ole suavai ma togafitia foi le suavai pe afai e sue atu ua faaletonu.
