Ua faasolo ina faigata le maua o laisene avetaavale
22/02/12 || Tusia: Leautuli Malaeta Sauvao ||
Ua tele ni masina o galulue pea le ofisa o taavale (New Zealand Transport Agency) e tapenaina ni suega e sili atu ona luiina ai le iloa o le tupulaga ina ia taofia mai ai le tele o faalavelave tutupu auā le saogalemu o le tupulaga laiti ma soo se tagata. O le vaega lea o galuega a le malo mo le faasaogalemuina o faigamalaga. (Government Safer Journeys road safety strategy).
O le suega fou o le a faatinoina i le aso 27 o Fepuari. Ua fautuaina e le NZTA afai e manao le tagata e pasi, e ao ona tele se taimi e fesoasoani i ai mātua a o a‘oa‘oina le avetaavale a le tupulaga.
Ua iai foi le isi suega e toleni ai le au a‘oa‘o avetaavale ina ia oo atu i le 120 itula o ave le taavale faatasi ma le tagata o loo vaaia (supervisor). Ua faamaonia mai suesuega faamaumauina le 40% e maualalo ai faalavelave tutupu mai tagata ia e atoa le 120 itula o ave le taavale faatasi ma le tagata e vaaia i ona tafatafa, nai lo i latou e na o le 50 itula e gata ai ona ave le taavale ma le supavaisa.
O le suega fou lea ua iai nei ua faaagaaga mo ave taavale talavou ina ia fesoasoani ai i le faaitiitia o faalavelave/maliu i luga o le auala tele.
Ua ta‘ua foi e le alii pule Geoff Dangerfield e faapea o le a lē toe iai ni ofisa e 36 lea o loo sue ai laisene aoga avetaavale i le tele o vaega o Niu Sila.
O se feau aogā foi lea mo o tatou tupulaga talavou, ina ia nofouta i ai ma faaaogā lapataiga ua aumai e le ofisa o femalagaaiga i auala. O loo toatele pea le tupulaga o loo vaaia le aveina o taavale ae lei maua ni laisene. Faaaeteete o le soifua o tagata lena e i o outou lima pe a e faatamala. E lelei le usitai e saogalemu ai.
