Osofaia se ulugalii e se moetolo
22/02/12 || Tusia: Leautuli Malaeta Sauvao ||
O le va o le 5 ma le 5.30 i le vaveao o le Aso Sa 5 o Fepuari na faateia ai se tamaitai sefulufitu tausaga a o momoe ma lana paaga i le po, i le osofaia o ia e se tagata i totonu lava o lo latou fale i Leeward Drive, Whitby.
Na te‘i le tamaitai ina ua tagotago atu le tagata i lona suilapalapa ma le te‘i ane e ese lea tagata. Ua saofafai uma atu ma vaaia le tagata ua faataalise ese atu i autafa o potu ma maulu ese ai i le faitotoa faasee (sliding door).
E faapea le molimau a le pepa na oo atu i totonu lea tagata i le faitotoa e lei lokaina ae ua momoe le aiga.
O loo manaomia e le ofisa o leoleo ni isi na latou matauina ni gaioiga masalomia i lea auala ma ia logoina vave i latou. Telefoni: 04 381 2000.
O lenei foi faalavelave e fautuaina ai le mamalu o le atunuu ina ia mataala i le lokaina o maota ma laoa i le po pe a tofafa. Aemaise foi i latou o mau taitoatasi ina ia nofouta i tagata lē taupulea faapenei. Siaki lelei le loka o le faitotoa poo ua faamau, faapea foi faitotoa faasee (sliding doors) ina ia mautinoa lelei ua mau ona tapuni ma loka.
