Faatuputeleina le autalenia o alo o Samoa i musika

Na tusia e le Kapi Mana o le vaiaso na tea nei se molimau matagofie i lenei alo o le atunuu e faapea: O le susuga ia Viliamu Moala na taunuu mai i Amerika ma nofo i Porirua mai le 2008. O le tausaga na tea nei, a o lei faia Kirisimasi na ia auina atu ai i Samoa lana CD i lona uso faaletulafono (brother-in-law) na pue ma o le igoa o le pese o le “Nofo maia” (Please Stay).

O le uso faaletulafono o Viliamu e faigaluega i se leitio i Samoa ma sa molimauina le fiafia i ai o tagata i lea pese pe a taina. O lenei pese na pueina i le Wesley Community Action i Waitangirua, Porirua ma ua te‘i Viliamu i le tala ‘ave mai Samoa,  na te lei mafaufauina o le a avea ma se pese lauiloa ma fiafia iai tagata.

O Viliamu e fiafia tele i musika ma na te ofoina ona taimi e aunoa ma se totogi e galue ai i le a‘oa‘oina o le tupulaga talavou i le musika.

O loo iai le faamoemoe e faamae‘a lona tolu o ana lipine(CD) i le tausaga nei. Na saunoa Vili; o le tele o lo‘u olaga e faaaogā i le tusiina o pese. O le tele o ana pese o pese aualofa (love songs) ona o mafaufauga lava e tutupu mai ma ou tusitusia. O le tele foi o reggae love songs lea ua taatele nei i nei augatupulaga ma lo latou fiafia i ai.

Ona o le alumia ma fiafia tele o tagata i le “Nofo maia”; o lea ua faamoemoe ai Viliamu o le a faia ni ana faaaliga (show/Koneseti) i Samoa, Amerika ma Ausetalia i le tau faaiuiuga o le tausaga nei.

E lei faalauiloaina le pese o le Nofo maia i Niu Sila nei, ae o se faamoemoe o le alii pese o le a ia faataunuuina lea faamoemoe mo tagata o Niu Sila i se taimi lata mai.

Faamalo atu i lea alo sogasogā o le atunuu ua tulai mai foi i lenei vaitaimi e faatoatele atili le autalenia i musika o si o tatou atunuu. Ia manuia ou faiva Viliamu!