Auai mai sui mamalu o le Ofisa o Tagata Pasefika ma le Ofisa o Aiā Tatau a Taugata i le fono a le Komiti Faafoe aoao a le FAGASA

O le Aso Toonai 28 o Ianuari i le Brentwood Hotel i le Laumua i Ueligitone, na usuia ai le uluai fono o lenei tausaga a le Komiti Faafoe aoao o le faalapotopotoga o le Aoaoina o le Gagana Samoa ma Aganuu i Aotearoa, lea e taitaifono aoao ai le Afioga ia Galumalemana Tuiletufuga Hunkin.

O le autū o lenei fonotaga o le vaai atu lea i itu e ao ona faatāua atili ai le gagana Samoa aemaise le alo atu i le faamanatuina o le 50 tausaga o le Tutoatasi o Samoa. Faapea tapenaga mo le fonotele i Dunedin ia Aperila i le tausaga nei.

Na saunoa le Komesina o le Ofisa o Aiā Tatau a Tagata (Human Rights Commission, le susuga ia Joris de Bres i lona agaga fiafia i le galuega a le FAGASA, o loo faia pea i tausaga taitasi i tauvaga tautagala ma le tapenaina o le Vaiaso o le Gagana Samoa lea ua faalauiloa i aoga uma i Aotearoa.

Na ia saunoa foi ina ia faia ni fesootaiga ma le Minisita o Aoga auā le lagolagoina atili o galuega a le FAGASA, aemaise o sona ofisa tuma‘oti ina ia faafaigaluega ai se tagata e taulai uma i ai fesootaiga a soo se ofisa o le malo i tulaga tau i le gagana Samoa.

O le Afioga ia Taefu Hecker Robertson na saunoa i le galuega lagolago o loo taumafai i ai le Ofisa o Tagata Pasefika (Ministry of Pacific Islands Affairs) mo le lagolagoina o soo se gagana a atumotu Pasefika, ma na ia fiafia foi e faaali le matagofie o galuega o loo tulai mai a le gagana Samoa ona o le taulagalaga pea o sui o le Komiti Faafoe a le FAGASA. E naunau foi ina ia faapea ona galulue sui o isi motu Pasefika auā lava a latou foi gagana.

O lea fonotaga na faapaseseina e le Ofisa o Tagata Pasefika femalagaina a peresitene o lala mai Inivekako, Dunedin, Kalaiesetete, ma le failautusi aoao mai Aukilani. E faafetaia ai foi le fesootai faifai pea a le Taitaifono Aoao o le FAGASA ma nei ofisa, ona e leai ni tupe a lenei faalapotopotoga,  e tagi lava i lima le faagaioiga.

Ia manuia le alo atu o le FAGASA i la latou fonotele i Dunedin aemaise ai foi le filifilia o ni sui agavaa mo le faafoeina o le faalapotopotoga i le isi 2 pe 4 tausaga i le lumanai.