Alo atu le lala o FAGASA i Ueligitone mo le latou fonotaga amata i Whitireia Aso Tofi, aso 16 o Fepuari
14/02/12 || Tusia: Leautuli Malaeta Sauvao ||
O le itula e 5:30 i le afiafi o le a faataunuuina ai le fono amata o le tausaga a lenei lala i le nofoaga ma le aso e pei ona tusia i luga. O le a soalaupuleina ai ni mataupu tāua mo le fonotele i Dunedin ia Aperila i le aso 10-13.
• Sui palota faatutū mo le Komiti Faafoe Aoao
• Lesitala masani a sui o le lala
• Palotaina o le Komiti o le laulau fou a le lala
• Pepa e tiliva i le fonotele i Dunedin
• Tapenaga o tauvaga tautalaga faasamoa ma le NCEA
• Se sao mo le Vaiaso o le Gagana Samoa ma le 50 tausaga o le Tutoatasi o si o tatou malo.
E tele ni tootoo lauiloa o le atunuu o le a autovaa mai e faasoa lo latou silafia i le gagana ma le aganuu i le taimi o le fonotele i Dunedin, e pei o le susuga i le Taitaifono aoao ia Lale Ieremia, faapea foi Maulolo Leaula Tavita Amosa, ma e fautuaina ai lo outou susū mai, talaaao mai ma maliu mai tatou te fefaasoaai i mataupu uma ua folasia i luga mo tapenaga uma a si o tatou lala i le Laumua nei. E maua foi sina faamalosi tino i lea afiafi.
