Tetee tagata i le faatuina o se falepia
1/02/12 || Tusia: Leautuli Malaeta Sauvao ||
E faitau afe le tele o tusi tetee na faasalalauina i le pepa o le Kapi Mana ma City Life a Porirua e uiga i le faatuina o se falepia i le aai magaala o Mungavin i Porirua.
O ni isi o faaseā na ta‘ua ai le tetee ona o le lata i le aoga e iai le fanau (Porirua East School) aemaise o le faafesagai ma le fale (Community hall) e fai ai soo se aofiaga a le tele o tagata o le vaiaai. E lata foi i le fale fuimu e lē manaomia ai se faalavelave pe a logo atu se mu. Manatua foi e ‘onā loa le tagata inupia e lē popole lava poo fea le ogaeleele o iai. O atugaluga na o isi tagata o le vaiaai.
Na ta‘ua e ni isi tusi le tele o fale ua mafai ona maua ai le pia i aso nei, e lē tatau la ona toe mananao e toe faatu se isi falepia i le taulaiga o magaala e feoai ai tagata. O le tele lava o faaseā e mo le soifua saogalemu o tagata uma aemaise lava o tamaiti. Talosia ia manuia le finau a mātua ma tagata uma na tetee i lenei mataupu.
